“Ngisiphi Isipho Esizidlula Zoke Owakhe Wasifumana?”

Amezwi la atjhiwo mntazinyana oneminyaka eli-13 ubudala, aphiwe umdlwana. Umma ophumeleleko kezamabhizinisi naye uthi ikhomphyutha ayithengelwa nguyise nakasesikolweni sebanga eliphakemeko yaba sisipho esatjhentjha ukuphila kwakhe. Nendoda esafika emtjhadweni ithi, isipho sekarada lakamazenzela aliphiwa mkakhe nabahlanganisa umnyaka batjhadile, laba sisipho esamkghwatha ihliziyo.

Qobe mnyaka, abantu bathatha isikhathi sabo bafunana nesipho “esiphuma phambili” abangasipha umngani nofana isihlobo abasithandako nakunesehlakalo esithileko. Akakho ongeze athande ukuzwa amezwi afana nala esiwezwe esigabeni esingehla. Kuthiwani ngawe? Angeze wathanda na ukuphiwa izipho ezikukghwatha ihliziyo?

Mbono omuhle khulu lo, ingasi ngebanga lalokho isipho esingakutjho emuntwini ophiwa sona, kodwana nendlela isipheso esenza umuphi azizwe ngayo. Ngaphezu kwakho koke, iBhayibheli lithi: “Kubusiseke khulu ukupha kunokwamukela!” (IzEnzo 20:35) Kuba nethabo elingeziweko ekupheni nange umuntu ophiwakho simkghwathe ehliziyweni isiphweso.

Alo khuyini ongayenza nawuzakwenza isipho sakho sibe ngesiphuma phambili? Akhesithi-ke ubhalelwe ukupha umuntu isipho esiphuma phambili, khuyini ongayenza ngokuzako nawupha umuntu isipho?