Izinto Ozikhethako, Zitjho Ingomuso Lakho

NGINGAKGHONA NA UKUKHETHA INGOMUSO LAMI? Abanye abantu bakholelwa ukuthi kunamandla athileko alawula bewaqunte ingomuso lomuntu. Kuzokuthi umuntu angabhalelwa kufikelela umnqopho ebekafuna ukuwenza, umuzwe athi leli bekulitshwayo elitjengisa ukuthi “intwele vele bekufanele ingenzeki!” begodu bengeze ngayibalekela.

Kuthi-ke abanye bafikelwe kudana nabaqala igandeleleko nokungabi nobulungiswa ephasini esiphila kilweli. Kungenzeka khebalinga ukwenza amaphilwabo ngcono kodwana nababona izipi, ubugebengu kunye neenhlekelele zemvelo zididanisa ikusasa labo, baphelelwa mamandla. Bagcine ngokutjho amezwi anjengokuthi ‘koke kuyafana.’

Kujayelekile ukuthi kesinye isikhathi ubujamo bungaba nomthelela ezintweni esihlele ukuzenza. (UMtjhumayeli 9:11) Nanyana kunjalo, nasiza endabeni yengomuso kuzokufanele ukhethe. NeBhayibheli iyatjho ukuthi ikusasa lakho lidzimelele kozokukhetha. Naku okhunye ekutjhoko.

UMosi obekamdosi phambili wesitjhaba sama-Israyeli, ngaphambi kokuthi bangene enaRheni yesiThembiso wathi: “Ngibeka phambi kwenu ipilo nokufa, iimbusiso namanikelela. Ngalokho khethani ukuphila ukuze niphile nina neenzukulwana zenu, nikhathalele uSomnini uZimenu, nilalele ilizwi lakhe, nikakarele kuye.”—Duteronomi 30:15, 19, 20.

“Ngibeka phambi kwenu ipilo nokufa, iimbusiso namanikelela. Ngalokho khethani ukuphila ukuze niphile.”—Duteronomi 30:19

UZimu wawatjhaphulula ama-Israyeli ebugqileni beGibhida. Ngemva kwalokho wabathembisa ipilo yetjhaphuluko ethabisako enaRheni yesiThembiso. Kodwana lokho bekungatjho ukuthi bazokumane baphuthe imikhono izinto zizenzakalele. Nabazakufumana iimbusiswezo bekufuze ‘bakhethe ukuphila.’ Alo bebazokwenza njani lokho? ‘Ngokukhathalela uSomnini uZimabo, balalele ilizwi lakhe, bakakarele kuye.’

Nanamhlanjesi kusese ngisweso, okukhethako ngikho okuzokutjho ukuthi ikusasa lakho lijame njani. Nawukhetha ukuthanda uZimu, ulalele akutjhoko bewukakarele kuye uzokufumana ukuphila okungapheliko epharadesini elizokuba sephasini. Alo yini ebandakanyekileko nawuzakuthatha igadangwelo?

KHETHA UKUTHANDA UZIMU

Ithando bubuntu bakaZimu obukhamba phambili. Umpostoli uJwanisi wathi, “uZimu ulithando.” (1 Jwanisi 4:8) Yeke uJesu nabambuza ukuthi ngimuphi umlayo oqakatheke ukuyidlula yoke, wathi: “Kufuze uthande uJehova uZimakho ngehliziywakho yoke nangomphefumulwakho woke nangomkhumbulwakho woke.” (Matewu 22:37) Akukafuzi ubuhlobo bethu noJehova uZimu sibusekele kwaphela ekutheni siyamsaba kodwana kufuze kusekelwe ekutheni siyamthanda. Alo kubayini kufuze sikhethe ukuthanda uZimu?

Indlela uJehova athanda ngayo abantu ifana nendlela ababelethi abathanda ngayo abantwababo. Ngitjho nanyana ababelethaba banesono, bafundisa, bakhuthaze, basekele, bebaluleke abantwababo. Lokhu bakwenza ngebanga lokobana bafuna bathabe bebaphumelele. Ngokwenza lokhu, balindele ini ebantwaneni babo? Balindele ukuthandwa bantwababo, nokuthi basebenzise lokho abakufundisiweko. Lokhu kutjengisa ukuthi uZimu ulindele bona sithande lokho asenzele khona.

MLALELENI

Ilimi elisetjenziswe eBhayibhelini, ibizo elithi “lalela” linomnqondo “wokuzithoba.” Kuhlekuhle ngilokho esikutjhoko nasithi emntwaneni, ‘Lalela ababelethi bakho.’ Yeke ukulalela uZimu kutjho ukuthi sifunda besithobele lokho akutjhoko. Ngitjho nanyana singalizwa ilizwi lakhe ngendlela ejayelekileko, simlalela ngokufunda nangokusebenzisa esikufumana eBhayibhelini.—1 Jwanisi 5:3.

UJesu nakaveza ukuqakatheka kokulalela uZimu, kobunye obujamo wathi: “Umuntu akaphili ngesikwa sodwa, kodwana nangawo woke amezwi aphuma emlonyeni kaJehova.” (Matewu 4:4) Ukungenisa ilwazi ngoZimu kuqakatheke njengokudla kithi. Sikutjhwiso yini lokho? IKosi uSolomoni ebeyihlakaniphe khulu yathi: “Ukuhlakanipha kusiphephelo. Imali nayo isiphephelo, kodwana ubuhle belwazi ngilokhu: Ukuhlakanipha kunikela ipilo kilabo abanakho.” (UMtjhumayeli 7:12) Ukungenisa ilwazi nokufumana ukuhlakanipha okuvela kuZimu kungasivikela esikhathini sanamhlanjesi, begodu kungasisiza senze isiqunto esingasinikela ukuphila okungapheliko esikhathini esizako.

KAKARELANI KUYE

Nasikhumbula umfanekiso kaJesu ekhesakhuluma ngawo esihlokweni esidlulileko lokha nakathi: “Lincani isango elitjhinga ekuphileni nendlela yakhona iminyene, bambalwa abayifumanako.” (Matewu 7:13, 14) Kwamambala sizokuzuza ngokuhlala sitjhidelene khulu nencwadi esilayela indlela esikhamba ngayo besiragele phambili ngokukhamba kiyo. Kunebanga elizwakalako elisenza bona sihlale sitjhidelene noZimu. (IRhubo 16:8) Singakwenza njani lokho?

Qobe lilanga kunezinto ezinengi ekufuze sizenze nesingathanda ukuzenza. Izinto ezinjalo zingasenza sibe nezinto ezinengi esizenzako namkha zisithikazise singasabi nesikhathi sokucabangisisa ngalokho uZimu afuna sikwenze. Kungebangelo iBhayibheli lisikhumbuza: “Ngalokho-ke tjhejisisani bona niziphethe njani, ningabi ziindlhayela, kodwana nihlakaniphe ngokusebenzisa elinye nelinye ithuba ngombana imihla le esiphila kiyo mimbi.” (Efesu 5:15, 16) Sihlala sitjhidelene noZimu ngokubeka itjhebiswano lethu naye qangi ekuphileni kwethu.—Matewu 6:33.

ZIKHETHELE

Ayikho into ongayenza bona utjhugulule isikhathi esidlulileko, nanyana kunjalo kunezinto ongazenza ezingenza ukuthi wena nalabo obathandako nibe nekusasa elihle. IBhayibheli lembula ukuthi uBabethu wezulwini uJehova usithanda kwamambala begodu lisitjela nokuthi khuyini angathanda bona siyenze. Tjheja amezwi womphorofidi uMikha:

“USomnini ukwazisile wena muntu lokho okulungileko. Yini-ke okhunye uSomnini akulindele kuwe ngaphandle kokwenza akutjhwileko nokwethembeka esivumelwaneni sakhe bewukhambe noZimakho ngokutjhejisisa na?”—Mikha 6:8.

Kghani uzosamukela na isimemo sakaJehova sokobana ukhambe naye bewufumane iimbusiso ezingapheliko azibekele labo abakhamba naye? Ithuba ngelakho bona uzikhethele!