UmBuso KaZimu Uzokuthoma Nini Ukubusa Ephasini?

NGIZIPHI IZENZAKALO UJESU ATHI ZIZOKWENZEKA?

UJesu wathi: “Isitjhaba sizokulwa nesitjhaba, umbuso ulwe nombuso. Kuzokuba nokusikinyeka kwephasi okukhulu, nokutlhayela kokudla nezifo ezibulalako.” (Lukasi 21:10, 11) Zoke izenzakalwezi zisibonakaliso sokufika komBuso kaZimu. Ukwenzeka kwezenzakalwezi ngesikhathi sinye kutjengisa ukuthi “umBuso kaZimu useduze.” Kuliqiniso na ukuthi izenzakalwezi zenzeka ngesikhathi sinye ephasini mazombe? Tjheja ubufakazi obulandelako.

1. IZIPI

Ngo-1914, kwaba nepi eyathinta abantu nee narha ezinengi ukudlula izipi ekhezaba khona emlandweni. Izazimlando zibiza umnyaka ka-1914 ngokuthi mnyaka wamatjhuguluko emlandweni ngombana mnyaka okwaqubuka ngawo ipi yephasi. Ngomnyaka loyo kwasetjenziswa amabhomu, iingidi ezikulu, amarhasi ayingozi nezinye iinkhali ngendlela ezingakhenge zisetjenziswe ngazo ngaphambilini. Ngemva kwalokho kwalandela ipi yephasi yesibili, epini leyo kwasetjenziswa iinthuthumbisi ze-atomic kokuthoma emlandweni. Kusukela ngomnyaka ka-1914, kwathoma ukuba nezipi eenarheni ezinengi begodu izipezi sele zibulele abantu abanengi.

2. UKUSIKINYEKA KWEPHASI

I-Encyclopædia Britannica ithi, qobe mnyaka kuba nokusikinyeka kwephasi okumbi khulu okwenzeka pheze iinkhathi ezili-100. Umbiko we-United States Geological Survey uthi: “Ngokuya ngemininingwana ebulungiweko, kusukela ngeminyaka yabo-1900 kwaba nokusikinyeka kwephasi okukhulu pheze iinkhathi ezili-16 qobe mnyaka. Abanye bangathi ukusikinyeka kwephasi akusese yingozi kangako ngombana abantu sele banemitjhini yokubona ukuthi kuzokwenzeka kuphi begodu nini. Iqiniso kukuthi, ukusikinyeka kwephasi okwenzeka ephasini mazombe kubulala abantu abanengi ngendlela engakhenge yenzeke ngaphambilini begodu kutjhiya abantu batlhaga.

3. UKUTLHAYELA KOKUDLA

Ephasini mazombe ukudla kuyatlhayela ngebanga lezipi, ubugebengu, imiraro yezomnotho, ukungatlhogonyelwa kuhle kweentjalo namkha ubujamo bezulu. I-The World Food Programme’s “2018 Year in Review” ithi: “Ephasini mazombe, iingidi ezima-821 zabantu zitlhayela ngokudla—kuthi iingidi ezili-124 azinakudla.” Qobe mnyaka kuhlongakala abantwana abapheze babe ziingidi eziyi-3.1 ngebanga lendlala. Ngomnyaka ka-2011, kwahlongakala abantwana abapheze babe maphesende ama-45 ephasini mazombe ngebanga lokutlhayela kokudla.

4. UKWANDA KWEZIFO

I-World Health Organization yathi: “Eminyakeni ema-20 adlulileko kube nokwanda okukhulu kwamalwelwe. Kubuye amalwelwe wakade ikholera, i-plague neyellow fever—begodu isibalo sangezeleleka ngamanye amalwelwe amatjha—i-SARS, i-pandemic influenza, i-MERS, i-Ebola ne-Zika.” Nanyana abososayensi nabodorhodere bathuthukile kwezepilo kodwana abakghoni ukulapha woke amalwelwe begodu abakghoni ukuvimba isibalo esikhulako samagulo.

5. UMSEBENZI WOKUTJHUMAYELA OWENZIWA EPHASINI LOKE

UJesu wabikezela ngesinye isenzakalo wathi: “Nje-ke iindaba ezimnandezi zomBuso zizokutjhunyayelwa kilo loke iphasi bona kube bufakazi kizo zoke iintjhaba, ngemva kwalokho isiphelo sizokufika.” (Matewu 24:14) Nanyana iphasi liqalene nemiraro engaka, abantu abangaphezu kweengidi ezibu-8 abavela eentjhabeni zoke batjhumayela iindaba ezimnandi zomBuso kaZimu eenarheni ezima-240 ngamalimi angaphezu kwayi-1 000. Into enje iyathoma ukwenzeka.

IZENZAKALWEZI ZITJHO UKUTHINI KITHI?

Izinto uJesu athi zizokwenzeka siyazibona namhlanjesi. Kubayini kufuze singakuthatheli phasi koke lokhu? Ngombana uJesu wathi: “Nanibona izintwezi zenzeka, yazini ukuthi umBuso kaZimu useduze.”—Lukasi 21:31.

Nasihlolisisa izinto uJesu athi zizokwenzeka, senza neembalo sisebenzisa iBhayibheli, sikghona ukubona ukuthi uZimu wahloma umBuso lo ezulwini ngomnyaka ka-1914.a Ngesikhatheso, wabeka iNdodanakhe uJesu Krestu bona ibe yiKosi. (IRhubo 2:2, 4, 6-9) UmBuso kaZimu nasele ubusa ephasini uzokuqeda boke aborhulumende babantu ngemva kwalokho wenze loke iphasi libe yipharadesi abantu abazokuphila kilo ngokungapheliko.

Kungasikade, amezwi akhulunywa nguJesu emthandazweni osibonelo athi: “Umbuso wakho awufike, intando yakho yenziwe ephasini njengombana kunjalo ezulwini,” azokuzaliseka. (Matewu 6:10) Yeke yini umBuso kaZimu osele uyenzile soloko wahlonywako ngo-1914? Khuyini esingalindela bona umBuso kaZimu uyenze nasele ubusa ngokupheleleko ephasini?