Amasimu Avuthiwe Alungelwe Ukuvunwa
1. Ngimuphi umsebenzi oqakathekileko owenziwako?
1 Ngemva kokunikela ubufakazi emfazini omSamariya, uJesu watjela abafundi bakhe wathi: “Kodwana ngithi kini qalisisani kuhle amasimu; amabele avuthiwe alungelwe ukuvunwa!” (Jwa. 4:35, 36) Ukuvunwa okungokomoya gade kutjhidele, begodu uJesu wabikezela bona umsebenzi lo uzokuba mkhulu ephasini loke. Njengombana asesikhundleni sakhe ezulwini, uJesu uyahlanganyela ekuvunweni. (Mat. 28:19, 20) Ngimaphi amatshwayo akhona atjengisa bona umsebenzi lo urhabile njengombana uya ekupheleni?
2. Ngiyiphi ithuthuko etjengisa bona umsebenzi wokuvuna ephasini loke uyanda?
2 Ukuvunwa Kwephasi Loke: Ngomnyaka wekonzo ka-2009, kwaba nokwanda kwabarhuweleli abamaphesenti ayi-3.2 ephasini loke. Iindawo lapho umsebenzi wokutjhumayela gade uvinjelwe khona wande ngamaphesenti ali-14. Inani leemfundo zeBhayibhili zekhaya ezibikwa qobe ngenyanga lande laba zii-7 619 000—inani elikhulu elidlula labarhuweleli, elipheze libe siquntu sesigidi okulinani elidlula iimfundo ezibikwe ngomnyaka ogadungileko. Njengombana umsebenzi ukhula ngokubuyelelweko kezinye iimfunda, kuba neembawo ezinengi zokubandulwa kweenthunywa zevangeli eGiliyadi. Amasimu wezinye iinlimi zakezinye iinarha akhiqiza khulu eenarheni ezinengi. Kuyakhanya bona uJehova uyawurhabisa umsebenzi esikhathini sokuphela kokuvunwa. (Isa. 60:22) Unombono omuhle “ngesimu” yangekhenu?
3. Abanye bangaphetha ngokuthini malungana nokuvuna esimini yabo?
3 Ukuvuna Endaweni Yangekhenu: Abanye bangathi “ikonzwethu ayitheli.” Kuliqiniso bona amanye amasimu akatheli njengawabanye namtjhana akasatheli njengaphambilini. Abanye AboFakazi bangaphetha ngokobana ukuvuna akusekho eendawenezo begodu nje umsebenzabo wehlile kusele idlanzana labantu elifumanekako. Kwamambala kunjalo na?
4. Ngimuphi umbono omalungana nekonzwethu ekufuze siwuhlawulele, begodu kubayini?
4 Kusukela ekuthomeni bekubesekupheleni, ukuvuna sikhathi somsebenzi omkhulu. Tjheja umuzwa wokurhaba emezwini kaJesu athi: “Isivuno sikhulu, kodwana iinsebenzi zilibindzana ezingasibuthelela. Yeke bawani iKosi yesivuno bona ithumele iinsebenzi ekuvuneni kwayo.” (Mat. 9:37, 38) UJehova, iKosi yesivuno, nguye owaziko bona isivuno sizokuthela nini begodu kuphi. (Jwa. 6:44; 1 Kor. 3:6-8) Khuyini isabelo sethu? IBhayibhili iyaphendula: “Tjala imbewu yakho ekuseni bekube ntambama ungavumeli isandla sakho bona siphumule.” (Mtj. 11:4-6) Kwamambala, lokha ukuvuna nekufikelela isiphelo sakho akusisikhathi sokuvumela isandla sakho bona siphumule!
5. Kubayini kufuze siragele phambili nokutjhumayela ngetjiseko ngitjho nesimini ebonakala ingatheli?
5 Ragela Phambili Novuna: Ngitjho namtjhana isimethu ihlanganiswa ngokubuyelelweko begodu ibonakala ingatheli, kunebanga elihle lokobana sisebenze ngetjiseko nangomoya wokurhaba. (2 Thi. 4:2) Izinto ezithusako ezenzeka ephasini zingabangela abantu bona batjhentjhe indlela abaziphatha ngayo begodu bacabange ngokudephileko ngengomuso labo. Njengombana abantu abatjha bakhula, bangazizwa batlhoga ivikeleko nokuthula kwengqondo. Ukukghodlhelela kwethu kungakhuthaza abanye. Kuliqiniso, labo abangakhenge balalele esikhathini esidlulileko bangalalela esikhathini esizako. Ngitjho nalabo ababhala ngekani ukulalela umlayezo wethu kutlhogeka bayeleliswe.—Eze. 2:4, 5; 3:19.
6. Nengabe isimethu ineentjhijilo, khuyini ezosirhelebha bona sihlale sinombono wetjiseko?
6 Nengabe isimethu ineentjhijilo, khuyini ezosirhelebha bona sibulunge itjiseko? Mhlamunye singandisa ikonzwethu yendlu ngendlu ngokusebenzisa ezinye iindlela zokutjhumayela, njengokuya eendaweni zamabhizinisi namtjhana ukufakaza ngomrhala. Nofana singatjhentjhatjhentjha itjumayelo yethu bona sibe neendlela ezihlukahlukeneko zokunikela ubufakazi. Singantjhentjha ihlelo lethu begodu siye esimini ntambama namtjhana ngeenkhathi lapho inengi labantu lifumaneka khona ekhaya. Mhlamunye singafunda elinye ilimi bona sikghone ukutjhumayeza abantu abanengi ngeendaba ezimnandi. Singandisa ikonzwethu ngokungenela ikonzo yokuphayona. Namtjhana singathuthela endaweni eneensebenzi ezimbalwa zokuvuna. Nengabe sinombono omuhle ngokuvuna, sizokulwela ukuhlanganyela ngendlela esingakghona ngayo eemsebenzini oqakathekileko lo.
7. Kufuze siragele phambili siwenze bekube kunini umberego wokuvuna?
7 Abalimi banesikhathi esincani sokubuthelela isivuno, ngalokho abaphumuli nofana behlise amandla bekube kulapho baqeda umsebenzi. Ukuvuna okungokomoya kufuna umbono wokurhaba ofanako. Kufuze siwurage bekube kunini umsembenzi lo? Kufuze siwenze bekube “sekupheleni kobujamo bezinto” begodu ‘nekupheleni kwesikhathesi.’ (Mat. 24:14; 28:20, NW) NjengeSikhonzi sakaJehova esikhulu, sifuna ukuqeda umsebenzi esinikelwe wona. (Jwa. 4:34; 17:4) Ngalokho asirageleni phambili ngekonzwethu ngetjiseko, ngethabo, begodu nangombono omuhle bekube sekupheleni. (Mat. 24:13) Ukuvuna akukapheli!
[Umkhangiso osekhasini 2
Kusukela ekuthomeni bekube sekupheleni, ukuvuna sikhathi somsebenzi omkhulu