Ukuthandaza Nokuzindla—Kuyatlhogeka Eenkhonzini Ezitjhisekako
1. Khuyini eyarhelebha uJesu bona agegede ukuthikanyezwa emsebenzinakhe oyihloko?
1 UJesu waberegisa isikhathi sakhe ntambama apholisa abantu begodu akhipha namademoni. Ngelanga elilandelako abafundi bakhe nabamtholako bathi: “Boke bayakufuna,” bamkhuthaza bona aragele phambili ngomsebenzakhe wamandla. Nanyana kunjalo, uJesu khenge athikaziseke emsebenzinakhe oyihloko wokutjhumayela iindaba ezimnandi. Waphendula wathi: “Nambani siye kweminye imizi bona ngiyotjhumayela nakhona. Ngikho lokho engikuphumeleko.” Khuyini eyarhelebha uJesu bona ahlale adzimelele? Beka vuka ekuseni khulu ayokuthandaza begodu azindla. (Mar. 1:32-39) Ukuthandaza nokuzindla kungasirhelebha njani bona sibe batjhumayeli abatjhisekako?
2. Khuyini esingazindla ngakho okungasirhelebha bona sihlale sitjhiseka ekonzweni?
2 Kufuze Sizindle Ngani? UJesu wabona abantu “balahlekile njengezimvu ezinganamelusi.” (Mat. 9:36) Ngokufanako, nathi singazindla ngendlela abantu abatlhoga ngayo khulu iindaba ezimnandi. Singazindla ngokurhaba kweenkhathi. (1 Kor. 7:29) Singazindla ngeemsebenzi kaJehova neemfanelo zakhe, ngelungelo lokuba BoFakazi BakaJehova, nangamagugu angokomoya esiwafunde eLizwini lakaZimu angaziwa babantu abasesiminethu.—Rha. 77:11-13; Isa. 43:10-12; Mat. 13:52.
3. Singazindla nini?
3 Singazindla Nini? Njengombana uJesu enza, abanye bazindla ekuseni nakuthulileko. Abanye bakuthola kukuhle ukuzindla ntambama ngaphambi kobana bayokulala. (Gen. 24:63) Ngitjho nalokha simajadujadu, singasifumana isikhathi sokuzindla. Abanye benza njalo nabakhamba ngeenthuthi zomphakathi. Abanye baberegisa isikhathi sabo sedina bona bangathikanyezwa nabazindlako. Abanengi bazindla ngaphambi kobana bahlanganyela esimini, ngitjho isikhathi esincani, kubarhelebha bona batjhumayele ngetjiseko ekulu nangesibindi.
4. Kubayini kufuze sizindle?
4 Ukuthandaza nokuzindla kuzokudephisa ikhanuko yethu yokukhonza uJehova, kuzosirhelebha bona siqale ukukhulekela kwethu njengento eqakatheke khulu epilwenethu, begodu kuqinise ukuzimisela kwethu ngokuragela phambili nokutjhumayela. Isikhonzi esiyiHloko sakaZimu, uJesu, sazuza ngokuzindla begodu nathi sizokuzuza.