Irhelebho Elenzelwe Iimndeni
1. ISabatha laqobe veke layizuzisa njani iimndeni yama-Israyeli?
1 Ukubulunga iSabatha bekuyilungiselelo lethando elivela kuJehova egade lizuzisa iimndeni. Ama-Israyeli bekaphumula eemsebenzini yawo ejayelekileko begodu gade anesikhathi sokucabanga ngobuhle bakaJehova nobuhlobo babo naye. Ababelethi bekufuze basebenzise amathuba la bona bafake umthetho eenhliziyweni zabantwana babo. (Dut. 6:6, 7) ISabatha belinikela abantu bakaJehova isikhathi sokobana badzimelelise ubuhlobo babo noJehova qobe veke.
2. ISabatha lisifundisani ngoJehova?
2 Kuliqiniso, uJehova akasafuni bona iimndeni ibulunge iSabatha. Nanyana kunjalo, umthetho loyo usifundisa okuthileko ngoZimethu. Bekalokhu anekareko edephileko ngehlalakuhle engokomoya yabantu bakhe. (Isa. 48:17, 18) Namhlanjesi, enye indlela uJehova atjengisa ngayo bona uyasithanda yilungiselelo lokuKhulekela Komndeni.
3. Uyini umnqopho wokuKhulekela Komndeni?
3 Uyini Umnqopho WokuKhulekela Komndeni? NgoJanabari 2009, Isifundo Sencwadi Sebandla sathoma ukubanjwa ngelanga linye neSikolo Sekonzo Sezulwini noMhlangano Wekonzo. Elinye ibanga lokutjhentjhokhu gade kukunikela iimndeni ithuba lokuqinisa ubuhlobo bayo noJehova njengomdeni ngokuhlela ilanga elikhethekileko lokukhulekela komndeni evekeni. Umndeni omunye nomunye wakhuthazwa bona utjhidisele isifundo somndeni ebusukwini egade busetjenziselwa isifundo sencwadi, nekukghonekako, begodu basebenzise isikhathesi ngokungarhabi bacoce ngeBhayibhili nesifundo esikhambelana neentlhogo zomndeni.
4. Umndeni kufuze umede ingcoco yawo nge-awara elilodwa kwaphela ? Hlathulula.
4 Bona siye eSifundweni Sencwadi Sebandla, sitlhoga isikhathi sokwembatha, sokukhamba nokhunye. Inengi lethu, bekusithatha isikhathi esinengi kune awara linye esiba khona ngalo emhlanganweni lo. Ngokwenziwa kwetjhuguluko lehlelo lomhlangano wethu, nje-ke sesinesikhathi sokukhulekela uJehova njengomndeni. Ngalokho, akukafuzi bona simede ukuKhulekela Komndeni bona kube li-awara elilodwa kwaphela. Kunalokho, kufuze sicabange ngeentlhogo nokulinganiselwa kweemndeni yethu begodu nokubeka isikhathi esaneleko enizosisebenzisa.
5. Kufuze soke isikhathi sisetjenziselwe ukucoca njengomndeni? Hlathulula.
5 Kufuze Soke Isikhathi Sisetjenziselwe Ukucoca Njengomndeni? Lapho isibili esitjhadileko neemndeni enabantwana bacoca ngeenhloko ezingokoMtlolo ndawonye, bayakhuthazana. (Rom. 1:12) Umndeni uyatjhidelana. Ngalokho-ke, iinkulumiswano ezingokoMtlolo kufuze zibe yingcenye eqakatheke khulu ekuKhulekeleni Komndeni. Nanyana kunjalo, ilungu elinye nelinye lomndeni lingasebenzisa isikhathi salo esifundweni somuntu mathupha. Isibonelo, ngemva kokucoca njengomndeni, umndeni ungaragela phambili undawonye ngesikhathi abanye baragela phambili bazifundela babodwa, mhlamunye baqedelele ukulungiselela iimhlangano nofana ukufunda abomagazini. Eminye iimndeni ikhetha ukungavuleli umabonakude ngelangelo.
6. Ngiyiphi Indlela engasetjenziswa bona kuragwe ingcoco?
6 Ngiyiphi Indlela Engasetjenziswa Bona Kuragwe Ingcoco? Akutlhogeki bona indlela yokucoca ibe mbuzo neempendulo qobe. Bona ukuKhulekela Komndeni kuphile begodu kuthabise, iimndeni eemnengi inehlelo elifana neleemhlangano yethu yaphakathi kweveke. Ihlukaniselana phakathi lokho ezokucoca ngakho ngeengcenye ezimbalwa begodu bazenze ngeendlela ezihlukahlukeneko. Isibonelo, ingafunda ndawonye iBhayibhili, ilungiselele ingcenye yeemhlangano iphrakthise neengeniso zesimini. Ikhasi 6 lisinikela ezinye iimphakamiso.
7. Ababelethi kufuze balwele ukukwenza njani ukuKhulekela Komndeni?
7 Ababelethi Kufuze Balwele Ukukwenza Njani UkuKhulekela Komndeni? Umndenakho uzokufunda ngcono ngaphasi kobujamo obutjhaphulukileko nebunethando. Ngezinye iinkhathi ningafundela ngaphandle nengabe ubujamo bezulu buyavuma. Zizweni nitjhaphulikile ukuthatha ikhefu nenikutlhogako. Ngemva kokufunda, eminye iimndeni ihlanganisa nokudliwako. Njengombana ababelethi kufuze bagegede ukusebenzisa ukuKhulekela Komndeni bona bakgharameje namtjhajna bajezise abantwana babo, kungatlhogeka bona basebenzise esinye isikhathi ukurarulula umraro othileko okufuze ulungiswe. Nokho, kungaba kuhle ukucoca ngezinto ezithinta umntwana mathupha ngemsithelweni ngesinye isikhathi phakathi kweveke ukwenzela bona ungamphathisi iinhloni phambi kwabantwana bekhabo. UkuKhulekela Komndeni akukafuzi bona kube sidina nofana kuncame khulu kodwana kufuze kutjengise bona sikhulekela uZimu othabileko.—1 Thi. 1:11.
8, 9. Ngikuphi ukulungiselela okutlhogeka bona iinhloko zomndeni zikwenze?
8 Ihloko Yomndeni Ingalungiselela Njani? Umndeni uzokuzuza khulu nengabe ihloko yomndeni ikulungiselela kusesengaphambili ukuKhulekela Komndeni okhunye nokhunye ngokuqunta okufuze kucocwe ngakho nendlela ekufuze kwenziwe ngayo ngendlela ehle. (Iziy. 21:5) Indoda yenza kuhle bona ibonisane nomkayo malungana nalokhu. (Iziy. 15:22) Nhloko zeemndeni, kubayini ngezinye iinkhathi ningabuzi abantwana benu bona beze neemphakamiso? Nanenza njalo, nizokufumana ilwazi ngalokho okubakarako nokubatshwenyako.
9 Eemvekeni ezinengi ihloko yomndeni angekhe kutlhogeke bona isebenzise isikhathi esinengi ilungiselela. Ngokuthabisako, umndeni uzokuthabela ukwenza izinto ojayele ukuzenza qobe veke, njengokufunda ingcenye ethileko yeBhayibhili, begodu angekhe kutlhogeke bona ihloko yomndeni ize nehlelo elitjha ngamalanga. Ingakufumana kuyinzuzo ukulungiselela ngemva kobana baqede ukufunda njengombana isakhumbula iintlhogo ezingokomoya zomndenayo. Ezinye iinhloko zomndeni zitlola ngobufitjhani i-ajenda bese ziyibeka lapho umndeni ongayibona khona lula, njengokuyinamathisela efrijini. Lokhu kwenza umndeni uthabe uqale phambili begodu uwunikele isikhathi esaneleko sokulungiselela nengabe kuyatlhogeka.
10. Labo abahlala babodwa balingasebenzisa njani ilanga lokuKhulekela Komndeni?
10 Kuthiwani Nengabe Uhlanganyela Wedwa Ekhaya Nanyana Uhlala Wedwa? Labo abahlala babodwa bangasebenzisa ilanga lokuKhulekela Komndeni ekwenzeni isifundo somuntu mathupha. Ihlelo lesifundo somuntu mathupha esisisekelo kufuze sihlanganise ukufunda iBhayibhili, ukulungiselela imihlangano nokufunda ISithalasokulinda nePhaphama! Abanye abarhuweleli benza lokhu ndawonye nesifundo somuntu mathupha. Ngezinye iinkhathi bangamema omunye umrhuweleli namtjhana ilungu lomndeni bona lihlanganyele nabo engcocweni engokoMtlolo ekhuthazako.
11, 12. Ngiziphi iinzuzo ezifumaneka ngokuKhulekela Komndeni kwaqobe?
11 Ngiziphi Iinzuzo Ezifumaneka NgokuKhulekela Komndeni Kwaqobe? Labo abahlanganyela ngehliziyo yoke ekukhulekeleni kweqiniso batjhidelana noJehova. Ngaphezu kwalokho, iimndeni ekhulekela ndawonye iqinisa ubunye babo. Esinye isibili esitjhadileko satlola okulandelako malungana neembusiso esizithabeleko: “Njengesibili esiphayonako esinganabantwana, siqala phambili ekukhulekeleni komndeni kwamhlokho. Sizizwa sitjhidelene begodu sitjhidelene noBabethu wezulwini. Nje nasivukako ngelanga esihlele ukufunda ngalo ndawonye, sithi komunye nomunye: ‘Raya bona namhlanjesi yilanga lani? Lilanga lokuKhulekela Komndeni!’”
12 Ilungiselelo lokobana kube nokukhulekela komndeni godu lirhelebha iimndeni emajadujadu. Omunye umma oyedwana okhulisa amadodana amabili noyiphayona lesikhathi esizeleko watlola wathi: “Esikhathini esidlulileko, isifundo sethu somndeni besibogaboga. Besitjhentjhatjhentjha begodu singabi khona qobe ngombana bengihlala ngidiniwe. Bengingazi bona ngingakuhlela njani. Ngalokho nginitlolela bona nginithokoze khulu ngelungiselelo lokuKhulekela Komndeni. Siragela phambili siba nesifundo somndeni saqobe begodu sifumana neenzuzo.”
13. Khuyini okuqunta bona umndenakho uzokuzuza kangangani elungiselelweneli?
13 NjengeSabatha, ilanga lokuKhulekela Komndeni lisisipho esivela kuBabethu osezulwini esingarhelebha umndeni. (Jak. 1:17) Indlela iimndeni yama-Israyeli egade isebenzisa ngayo iSabatha ngiyo ebeyiqunta indlela ezuze ngayo ekuthuthukiseni ubuhlobo babo noJehova. Ngokufanako, indlela esisebenzisa ilanga esiliphiweko lokobana senze ukukhulekela komndeni ngikho okuzokuqunta bonyana iimndenethu izokuzuza kangangani. (2 Kor. 9:6; Gal. 6:7, 8; Khol. 3:23, 24) Ngokulisebenzisa kuhle ilungiselelweli, umndenakho ungatjho amezwi afana newomrhalani athi: “Kodwana nakungimi, kuhle ukuba seduze noZimu; ngenze iKosi uSomandla [UJehova] isiphephelo sami.”—Rha. 73:28.
[Umkhangiso osekhasini 5]
UkuKhulekela Komndeni akukafuzi bona kube sidina nofana kuncame khulu kodwana kufuze kutjengise bona sikhulekela uZimu othabileko
[Ibhoksi elisekhasini 6]
SIBEKE KUHLE
Ezinye Zeemphakamiso Zokukhulekela Komndeni
IBhayibhili:
• Fundani ndawonye ingcenye yokufundwa kweBhayibhili kwaqobe veke. Okhunye ukulandisa kweBhayibhili kutlolwe ngendlela yokobana omuye angafunda ukulandisa, abanye bafunde amezwi wabantu abahlukahlukeneko abasendabeni leyo.
• Lingisani ingcenye yokufundwa kweBhayibhili.
• Yabela elinye nelinye ilungu lomndeni bona lifunde iingcenye ezithileko zezahluko zeBhayibhili kusesengaphambili begodu litlole phasi umbuzo owodwa namtjhana eembili elinayo endabeni leyo. Ngemva kwalokho yenzani irhubhululo lombuzo womuntu ngamunye ndawonye.
• Qobe veke lungiselelani ikarada elinevesi leBhayibhili kilo bese nilinge ukulibamba ngehloko nokulihlathulula. Yenzani amakarada ambalwa, niwabuyekeze qobe veke ukubona bonyana mingaki imitlolo eniyikhumbulako.
• Lalelani ukufundwa kweBhayibhili okurikhodiweko nikhambisane neBhayibhili.
Imihlangano:
• Lungiselelani ndawonye iingcenye ezithileko zemihlangano.
• Phrakthisani iingoma zoMbuso ezizokubhinwa iveke ezako.
• Nengabe omunye unekulumo eSikolweni Sekonzo Sezulwini namtjhana umboniso eMhlanganweni Wekonzo, cocani ngendlela angawenza ngayo namtjhana awenze phambi komndeni.
Iintlhogo Zomndeni:
• Cabangelani indaba esencwadini ethi, Intsha Iyabuza namtjhana ethi, Funda KuMfundisi Omkhulu.
• Phrakthisani indlela eningaqalana ngayo nobujamo ekungenzeka buphakame esikolweni.
• Phrakthisani indlela lapho ababelethi badlala indima yabantwana, abantwana badlale indima yababelethi. Abantwana benza irhubhululo ngendaba ethileko ngemva kwalokho babonisane nababelethi.
Esimini:
• Phrakthisani iindlela zokulungiselela iintjumayelo zangepelaveke.
• Cocani ngeminqopho efikelelekako umndeni ongayibeka ukwandisa ukuhlanganyela kwawo esimini hlangana nesikhathi sesikhumbuzo namtjhana ngesikhathi samaholideyi.
• Nikela elinye nelinye ilungu lomndeni iimzuzu embalwa bona lenze irhubhululo endleleni abangaphendula ngayo iimbuzo ehlukahlukeneko engaphakama ekonzweni yesimini, ngemva kwalokho kuphrakthiseni lokho.
Iimphakamiso Ezingeziweko:
• Fundani ndawonye isihloko sabomagazini bamva nje.
• Ilunga elinye nelinye lomndeni alifunde isihloko esilikarileko kibo magazini bamva nje, ngemva kwalokho licoce ngaso ekuKhulekeleni Komndeni kwamhlokho.
• Ngezinye iinkhathi ungamema umrhuweleli namtjhana isibili esitjhadileko bona sihlanganyele nani ekuKhulekeleni Komndeni mhlamunye ningababawa banicocele okuhlangabezwene nakho abakufumene ekonzweni namtjhana banitjele bona bawafumene njani amaqiniso.
• Bukelani enye yama-video wethu bese nicoce ngayo.
• Cocani ndawonye ngencwadi ethi, “Intsha Iyabuza” namtjhana “Ukubukeza Komkhaya” kuPhaphama!
• Cocani ndawonye ngesihloko esithi, “Fundisa Izingane Zakho” namtjhana “Ezentsha Yethu” kuNqabayokulinda.
• Fundani benicoce ngengcenye yamva Yencwadi Yonyaka namtjhana incwadi etjhaphulwe emhlanganweni wesigodi odlulileko.
• Ngemva kokuya emhlanganweni wesifunda namtjhana wesigodi, buyekezani amaphuzu aveleleko.
• Bukelani indalo kaJehova ngokunqophileko begodu nicoce ngalokho enifundisa khona ngoJehova.
• Yenzani umtlamo othileko ndawonye, njengokwenza umboniso, imebhe namtjhana itjhadi.