Kuzokunikelwa Ubufakazi Obunamandla
1. Ngaphandle kwekulumo, yini enye ezokukara iimvakatjhi eSikhumbuzweni? Hlathulula.
1 Nini? Ngobusuku beSikhumbuzo. Kwenziwe umzamo omkhulu wokumemela abantu eSikhumbuzweni. Lokho iimvakatjhi ezizokuzwa akusikuphela kwento ezozikara. Ngemva kokuba khona eSikhumbuzweni, omunye umfazi wakhuluma ngalokho akubonako—ngobungani boke abanabo, ngobuhle nangokuhlanzeka kwesakhiwo esakhiwe nesitlhogonyelwa ziinsebenzi zokuzithandela. Ngalokho-ke, soke, ingasi isikhulumi kwaphela, sihlanganyela ekunikeleni ubufakazi esenzakalweni somnyaka esiqakathekilekwesi.—Efe. 4:16.
2. Ngamunye wethu angabunikela njani ubufakazi eemvakatjhini?
2 Lotjhisa Iimvakatjhi Ngethando: Ukumomotheka kwethu ngethando nokulotjhisa iimvakatjhi ngobungani kuzokunikela ubufakazi. (Jwa. 13:35) Ngitjho nanyana ungekhe ukwazi ukukhuluma nabo boke abantu, ungakwazi ukuzithula ngethando ebantwini abahlanu kwakho. (Heb. 13:1, 2) Qala iimvakatjhi ezibonakala zinganamuntu ezimaziko. Kungenzeka zifumene isimemo nekwenziwa ijima. Ungabuza, “Uyathoma ukuza la?” Babawe bona bahlale nawe, begodu ubatjele bonyana ukulungele ukuphendula nanyana ngimiphi iimbuzo abangaba nayo. Nengabe ibandla lenu kufuze likhambe msinyana bona ibandla elilandelako lisebenzise indawo, ungathi: “Ngithanda ukwazi bona ucabangani ngomhlangano lo. Ikhona indlela engingakwazi ukukuthinta ngayo?”
3. Singabamukela njani abapholileko?
3 Mukela Abapholileko: Akunakuzaza bona abarhuweleli abapholileko bazokuba khona, kuhlanganise nalabo ababa khona eSikhumbuzweni qobe mnyaka. Bamukele, ubenze bazi bona ukuthabele kwamambala ukubabona. (Rom. 15:7) Msinyana ngemva kweSikhumbuzo abadala bangabavakatjhela, babakhuthaze bona baragele phambili bahlanganyela nebandla. Sithandazela bona abanengi egade bakhona batjhukumiseleke ukudumisa uZimu ingasi ngalokho abakuzwileko kwaphela, kodwana godu nangalokho abakubonileko ‘ngebanga lezenzo zethu ezihle.’—1 Pit. 2:12.