Ikonzwethu—Yenziwa Ngesineke
1. UJehova usitjengise njani isineke ngesintu?
1 Isineke litshwayo lakaZimu lokusebenzelana nesintu. (Eks. 34:6; Rha. 106:41-45; 2 Pit. 3:9) Esinye seembonelo ezivelele khulu sineke sethando lakhe esibonakala emsebenzini wokutjhumayela ngoMbuso ephasini mazombe. UJehova usebenzelane nesintu iimnyaka epheze ibe zi-2 000, nokho usaragela phambili bona adosele abaneenhliziyo ezithembekileko kuye. (Jwa. 6:44) Singasilingisa njani isineke sakaJehova ekonzwenethu?
2. Singasitjengisa njani isineke nesisebenza esimini yethu?
2 Ikonzo Yendlu Nendlu: Silingisa isineke sakaJehova ngokutjhumayela ‘ngaphandle kokuliselela’ esimini lapho abantu abangatjengisi khona ikareko. (IZe. 5:42) Ngesineke sikghodlhelelela ukungatjhejwa, ukuhlekwa ubudlhayela nokuphikiswa enkonzwenethu. (Mar. 13:12, 13) Godu sitjengisa isineke ngokuragela phambili eemzamenethu wokuthelelela imbewu yeqiniso ngitjho nanyana kubudisi ukufumana abantu abanekareko emakhaya.
3. Kubayini isineke sitlhogeka nesenza amabuyelo nokuraga iimfundo zeBhayibhili?
3 Iimfundo ZeBhayibhili: Ukukhulisa isitjalo kutlhoga isineke. Singasitlhogomela, kodwana angekhe sisirhabe bona sikhule. (Jak. 5:7) Ngokufanako, ukukhula ngokomoya kwenzeka kancanikancani begodu nangamazinga ahlukahlukeneko. (Mar. 4:28) Labo esifunda nabo bangafumana kubudisi ukulisa iinkolelo zamala nofana amasiko angasi ngokomtlolo. Akukafuzi bona silinge ukukhulisa msinyana ngokugandelela abafundi bethu bona benze amatjhuguluko. Isineke siyatlhogeka bona sivumele isikhathi esithileko bonyana umoya kaZimu usebenze ehliziyweni yomfundi—1 Kor. 3:6, 7.
4. Isineke singasisiza njani bona sifakaze ngokuphumelelako eenhlobeni ezingakholwako?
4 Iinhlobo Ezingakholwako: Nanyana sinesifiso esiqinileko sokobana iinhlobo zethu ezingakholwako zifunde iqiniso, sitjengisa isineke ngokulinda isikhathi esifaneleko bona sihlanganyele ikholo lethu nazo, ngokutjheja bona singabanikeli imininingwana eemnengi. (Mtj. 3:1, 7) Okwanje, sivumela isibonelo sethu kube ngiso esitjhoko bona sibabantu abanjani, begodu sihlale sikulungele ukutjengisa ikholo lethu ngomoya omnene nangehlonipho edephileko. (1 Pit. 3:1, 15) Kwamambala, ikonzo eyenziwa ngesineke izokuphumelela khulu begodu ithabise uBabethu wezulwini.