Abomagazini Bethu—Benzelwe Ukukara Abantu Abanengi
1. Isigaba senceku ethembekileko nehlakaniphileko simlingisa njani umpostoli uPowula?
1 Njengombana umpostoli uPowula atjhintjhatjhintjha indlela athula ngayo iindaba ezihle bona azuze “boke abantu,” isigaba senceku ethembekileko nehlakaniphileko sisebenzisa abomagazini bethu ukufikelela abantu beenzinda neenkolelo ezihlukahlukeneko. (1Kor. 9:22, 23) Bona sikwazi ukusebenzisa kuhle ISithalasokulinda ne-Phaphama! senza kuhle ukukhumbula abafundi bakamagazini lo.
2. I-Phaphama! yenzelwe ukukara abobani?
2 I-Phaphama!: Umnqopho kamagazini lo kufikelela ihlobo labantu abafana nalabo umpostoli uPowula akhuluma ngabo nekathi ‘madoda we-Atheni.’ (IZe. 17:22) Amadoda layo gade anganaso isizinda sobuKrestu, begodu gade anelwazi elincani leMitlolo. Ngokufanako, abantu abatlolelwe i-Phaphama! banelwazi elincani namtjhana abanalwazi ngeBhayibhili. Kungenzeka bona abazi litho ngeemfundiso zobuKrestu, kungenzeka bona abayithembi ikolo, namtjhana abatjheji bona iBhayibhili iyasiza. Umnqopho oyihloko we-Phaphama! kuqinisekisa abafundi bayo bona uZimu weqiniso ukhona. Umnqopho kamagazini lo kukwakha ikholo eBhayibhilini nokusiza abafundi bazwisise bona aboFakazi BakaJehova bahlukile kezinye iinkolo.
3. Sitlolelwe abobani ISithalasokulinda ngasinye?
3 ISithalasokulinda: ISithalasokulinda somphakathi sitlolelwe labo abahlonipha uZimu neMitlolo ngezinga elithileko. Banelwazi elithileko ngeBhayibhili kodwana abazizwisisi iimfundiso ezinembileko. Bafana neenlaleli uPowula aqalisa kizo nekathi ‘abarhuluphele uZimu.’ (IZe. 13:14-16) ISithalasokulinda esifundwako ngokuyihloko sitlolelwe aboFakazi BakaJehova. UPowula wacabanga bona labo abafunda iincwadi zakhe gade bajayelene neMitlolo begodu banelwazi elinembileko leqiniso. (1 Kor. 1:1, 2) Ngokufanako, iinhloko ezifundwako zitlolelwe labo ababa khona emihlanganwenethu begodu abajayelene namabizo neemfundiso zaboFakazi.
4. Kubayini kufuze sijayelane nomagazini ngamunye esiwusebenzisa esimini?
4 Nanyana sijayele ukukhambisa abomagazini ngababili, ngokuvamileko sikhulumela owodwa kwaphela etjumayelwenethu. Ngalokho, kwenze umnqophwakho ukujayelana nomagazini ngamunye. Lokho kuzokwenza ube sebujamweni obuhle khulu bokukhetha okuzokukara ohlangana nabo.