Ungaya Na ‘EMasedoniya’?
1. Khuyini okwabangela uPowula nabangani bakhe bona baye eMasedoniya?
1 Ngomnyaka ka-49 C.E, umpostoli uPowula watjhiya i-Anthiyoka yeSiriya malungana nekhambo lakhe lesibili asithunywa sevangeli. Umnqopho wakhe bekukuvakatjhela i-Efesu nezinye iindawo ze-Asia Minor. Kunalokho wafumana isimemo ebesinqotjhiswa mumoya sokuya “eMasedoniya.” Yena nabangani bakhe basivuma ngokuzithandela, begodu baba nelungelo lokwakha ibandla lokuthoma endaweni leyo. (IZe. 16:9, 10; 17:1, 2, 4) Namhlanjesi, ezinye iingcenye zamasimu wephasi loke zizitlhoga kwamambala iinsebenzi zokuvuna. (Mat. 9:37, 38) Ungakghona ukuyokurhelebha?
2. Kubayini abanye bangazange bakucabangele ukufudukela kwenye inarha?
2 Mhlamunye unomoya onjengewakaPowula wokuba sithunywa sevangeli, kodwana awukathomi ukukucabangela ngokudephileko ukufudukela kwenye inarha. Ngokwesibonelo, kungaba kukuthi ifundo bandulo yeGiliyadi akusiyinto ekghonekako ngawe bona uyifumane ngebanga leemnyaka yakho namkha ngebanga lokuba ngudade ongakatjhadi namtjhana onabantwana abasesebancani. Mhlamunye azange khewukucabangele ukufudukela kwenye inarha ngebanga lokuthi unevalo lokufunda elinye ilimi. Nofana kungenzeka bona usifiki esize ngabonobangela bezomnotho enarheni ohlala kiyo, begodu ngalokho uyasaba ukufudukela kiyo. Nokho, ngemva kokukucabangela ngomthandazo, ungafumana bona ubujamo obunjalo akutlhogeki bona bukuvimbele ekufudukeleni kwenye inarha yalapho kunetlhogeko khona.
3. Kubayini ukubandulelwa ukuba sithunywa sevangeli kungasi yifuneko yokobana ukghone ukutjhumayela kwenye inarha?
3 Kuyifuneko Na Ukubandulelwa Ukuba Sithunywa Sevangeli? Khuyini okwenza uPowula nabangani bakhe bona baphumelele? Bathembela kuJehova nemoyeni wakhe ocwengileko. (2 Kor. 3:1-5) Ngalokho-ke, ngitjho nanyana ubujamo bakho bungakuvumeli bona ufumane ibandulo elikhethekileko, kusese yinto engenzeka ngawe bona utjhumayele ngokuphumelelako kwenye inarha. Khumbula godu bona usayifumana ifundo bandulo eragela phambili eSikolweni Sekonzo Sezulwini neMhlanganweni Wekonzo. Kandi nengabe unomnqopho wokuya eGiliyadi namkha kwesinye isikolo esifana naso, ukufudukela kwakho kwenye inarha ukuyokunambitha ikonzo yeenthunywa zevangeli, kuzokunikela ilemuko elinokuthenjelwa ongalisebenzisa ngokukhamba kwesikhathi nengabe uyabizwa bona uzokufumana ifundo engezelelweko.
4. Kubayini esebakhulile kungakafaneli bona bathi angekhe basakghona ukufudukela kwenye inarha?
4 Esebakhulile: Abavuthiweko nabakhulile ngokomoya nalabo abaphile kuhle, bangadlala ekulu indima eenarheni ezinetlhogeko. Sewulisile na emsebenzini wokuziphilisa? Ngitjho nalabo esele barhola umndende bangakghona ukuzinakekela kuhle iindleko zabo, kuhlanganise nemali yokuqalana nezepilo, ngombana lokho kusuke kutjhiphile kunenarheni abasuka kiyo.
5. Itjho okuhlangabezanwe nakho komzalwana owalisa umsebenzi owafudukela kwenye inarha.
5 Umzalwana wenarheni yabakhuluma isiNgisi owalisa umsebenzi, nje osele angumdala oyiphayona, wafudukela endaweni ebeyithandwa ziimvakatjhi zangaphandle, eSewula-tjhingalanga yange-Asiya bona ayokusiza isiqhema sabarhuweleli abalithoba abakhuluma isiNgisi. Isiqhemesi satjhumayeza abantu abayi-30 000, beenarha zangaphandle ebebahlala lapho. Ngeemnyaka eembili abama-50 besele baya emihlanganweni. Umzalwana watlola: “Ukufudukela la kwangilethela ikarisomraro yeembusiso kunengakhe ngazifumana, kangangobana nangingakhuluma ngazo zoke nesikhathi angeze sangivumela!”
6. Itjho okuhlangabezanwe nakho ngodade ongakatjhadi owafudukela enarheni ebeyinetlhogeko ekulu.
6 Abodade Abangakatjhadi: UJehova ubasebenzise ngezinga elikhulu abodade ekurhatjheni iindaba ezimnandi eenarheni ezinetlhogeko ekulu. (Rha. 68:11) Omunye udade ongakatjhadi bekanomnqopho wokuthuthukisa ikonzwakhe kwenye indawo, kodwana ababelethi bakhe bebatshwenyeke khulu ngokuphepha kwakhe. Ngalokho, wakhetha indawo ebeyijame kuhle ngokwezombanganarha nangokwezomnotho, watlolela i-ofisi legatja, wafumana nemininingwana enqophileko nelisizo. Phakathi neemnyaka esithandathu ayihlala enarheni leyo, wafumana iimbusiso ezinengi. Uyanaba: “Ekhaya bewamancani amathuba wokuba nesifundo seBhayibhili. Kodwana ukukhonza lapho kunetlhogeko ekulu khona kungenze ngakghona ukuraga iimfundo ezinengi begodu kwathuthukisa nekghono lami lokufundisa.”
7. Itjho okuhlangabezanwe nakho komndeni owafudukela kwenye inarha.
7 Imindeni: Nengabe unabantwana, inga-kghani lokhu kuyakuvimbela bona ufudukele kwenye indawo malungana nokuthuthukisa indaba ezihle? Omunye umndeni onabantwana ababili, abaneminyaka ebunane nelitjhumi, waqunta ukukwenza lokhu. Unina ulandisa ngokuhlangabezanwe nakho kwabo: “Kulithabo kithi ukuthi sikhulisele abantwana bethu la, ngombana batjhomana namaphayona akhethekileko kunye neenthunywa zevangeli. Ukukhonza kwethu lapho kunetlhogeko ekulu khona kwakuthuthukisa ukuphila kwethu.”
8. Kuyakghoneka na ukuyokukhonza kwenye inarha ngaphandle kokufunda elinye ilimi? Hlathulula.
8 Ukutshwenyeka Ngelimi: Inga-kghani ukufunda ilimi lakwenye inarha kukukhandela bona ufudukele kiyo? Ilimi lakho kungenzeka bona liyakhulunywa nakwenzinye iinarha ezitlhoga abarhuweleli beendaba zoMbuso. Esinye isibili esikhuluma isiNgisi safudukela enarheni yabakhuluma isi-Spanish ebeyinewomakazi labantu abakhuluma isiNgisi abaziimfiki. Ngemva kokufumana imininingwana evela e-ofisini legatja emalungana nerhelo lamabandla ambalwa wabantu abakhuluma isiNgisi anetlhogeko, bakhetha linye bese balivakatjhela kabili. Babuyela ekhaya, bayokusula zoke iindleko zabo bese babulunga imali isikhathi esingangomnyaka. Njengombana gade sele bakulungele ukufuduka, abazalwana bendaweni leyo babasiza bona bafumane indlu enobubhadekelo.
9, 10. Khuyini abafuduka enarheni yabo abangakucabangela, begodu kubayini?
9 Abaphalali: Khewaphalala enarheni yakwenu, mhlamunye ngaphambi kobana ufunde amaqiniso? Kungaba netlhogeko ekulu yeensebenzi zokuvuna enarheni yakho yendabuko. Ungakucabangela na ukubuyela emva bona uyokurhelebha? Kungaba bulula ngawe bona ufumane umsebenzi nendawo yokuhlala kunomuntu ovela kwenye inarha. Kakade vele sewukhuluma ilimi lalapho. Ekungezeleleni, abantu bangakuthabela ukulalela umlayezo woMbuso othulwa nguwe kunaloyo owethulwa ngomunye umuntu abamqala njengesifiki.
10 Enye indoda yasuka e-Albania yaya e-Italy njengomphalali, yafumana umsebenzi begodu beyikghona nokuwuthumelela imali umndeni wayo ebewuse-Albania. Ngemva kokufumana iqiniso, wathoma ukufundisa isiqhema samaphayona akhethekileko we-Italy ebewafudukela ukuyokukhonza lapho kunetlhogeko ekulu khona. Umzalwana uyanaba: “Bebaya esimini engayitjhiya. Bebangalazi ilimi begodu bazimisele ukuya. Ilimi lami kunye nesiko ngekwe-Albania. Manje bengifunani e-Italy?” Umzalwana waqunta ukubuyela e-Albania bona ayokurhelebha ekurhatjheni iindaba ezihle. Uthi: “Ngiyazisola na ngokunghala kwami umsebenzi nemali e-Italy? Akusinjalo nakancani! Ngafumana umsebenzi wamambala e-Albania. Ngokuya ngokwami, umsebenzi oqakatheke khulu noletha ithabo elihlala unomphela, kukhonza uJehova ngakho koke esinakho!”
11, 12. Labo abacabangela ukufudukela kwenye inarha kufanele benzeni?
11 Indlela Yokukwenza: Ngaphambi kokuya eMasedoniya, uPowula nabangani bakhe bebahlele ukutjhinga ngetjhingalanga, kodwana ‘umoya ocwengileko akhange ubavumele,’ ngalokho bajikela ngetlhagwini. (IZe. 16:6) Bathi nababandamela iBhithiniya, uJesu wabavimba. (IZe. 16:7) Ngokusebenzisa uJesu, uJehova uragela phambili ngokwengamela umsebenzi wokutjhumayela. (Mat. 28:20) Ngalokho-ke, nengabe ucabangela ukufudukela kwenye indawo, sibawe ngomthandazo isinqophiso esivela kuJehova.—Luka 14:28-30; Jak. 1:5; qala ibhoksi elithi, “Indlela Yokwazi Bona Indawo Oyicabangelako Inetlhogeko.”
12 Bawa imibono enqophileko kubadala nakwamanye amaKrestu avuthiwe. (Iziy. 11:14; 15:22) Ifunde imininingwana egadangisiweko emalungana nokukhonza kwezinye iinarha begodu wenze nerhubhululo ngananyana ngiyiphi inarha oyicabangelako. Ungayivakatjhela na inarha okhanuka ukufudukela kiyo, mhlamunye lokho ukwenze isikhathi esingaphezu kwamalanga ambalwa? Nengabe uzimisele ukufudukela kwenye inarha, ungatlolela i-ofisi legatja lenarha leyo malungana nemininingwana enabileko, usebenzisa isiphande esiseNcwadini Yonyaka yamuva. Nokho, kunokobana uthumele incwadakho ngokunqophileko e-ofisini legatja, ungayinikela abadala bebandla okilo, abazokufaka amazizo wabo ngaphambi kokuyithumela.—Qala Ukuhlelelwa Ukwenza Intando KaJehova, amakhasi 111-112.
13. I-ofisi legatja lizokusiza ngayiphi indlela, kodwana wena uyini umthwalo wakho?
13 I-ofisi legatja lizokuthumelela imininingwana elisizo malungana nenarha leyo, bona likusize ekwenzeni iinqunto, kodwana angekhe likwazi ukukunikela iincwadi zokukusekela ngeemali namtjhana indawo yokuhlala, ama-visa, namkha amanye amaforomo amalungana nendawo yokuhlala. Lezi ziindaba zomuntu mathupha ezitlhoga bona uzicabangele kuhle ngomthandazo ngaphambi kobana ufuduke. Ekungezeleleni, kuzokuba mthwalo wakho ukuthinta abazenda namkha amakhansela bona ufumane imininingwana ephathelene neemfuneko zama-visa nemvumo yomsebenzi. Labo abafudukako kufuze bakghone ukunakekela iintlhogo zabo neemfuneko ezingokomthetho.—Gal. 6:5.
14. Ngiziphi iinyeleliso ekufuze sizicabangele nesivakatjhela namkha sifudukela enarheni yalapho umsebenzi uvunjelwe khona?
14 Eenarheni Lapho Umsebenzi Uvinjelwe Khona: Kwezinye iindawo abazalwana nabodade kufuze bakutjheje khulu ukukhulekela kwabo. (Mat. 10:16) Abarhuweleli abavakatjha namkha bafuduke kungakalindeleki bafaka umsebenzi wethu nabanakwethu engozini. Nengabe ucabangela ukufudukela endaweni enjalo, sibawa utlolele i-ofisi legatja usebenzisa isihlopha sabadala bakwenu ngaphambi kobana uragele phambili.
15. Labo abanganawo amabanga wokufuduka bangayithuthukisa njani ikonzo endaweni abakiyo?
15 Nengabe Akukghonakali Bona Ufuduke: Nengabe awusisebujamweni bokobana ufudukele kwenye inarha, ungadani. Mhlamunye ‘uvulekelwe mathuba amahle wokusebenza lapha.’ (1 Kor. 16:8, 9) Umbonisi onikhambelako angazazi iindawo ezinetlhogeko hlanu kwalapho uhlala khona. Ungakghona ukufunda elinye ilimi lendawo bese usize amabandla namkha isiqhema esikhuluma ilimelo? Mhlamunye ungasiza ebandleni eliseduze labakhuluma ilimi lezandla, isiqhema namtjhana ibandla elikhuluma ilimi langaphandle, njengesiTjhayina, isiFrentji, nesiPutukezi. Mhlamunye ungakghona nokwandisa ikonzo yakho ebandleni okilo. Kungakhathaliseki bona ungaphasi kwabuphi ubujamo, into eqakatheke khulu kukuthi uzinikele ngomphefumulo woke ekukhulekeleni.—Khol. 3:23.
16. Kufuze sisabele njani kulabo abakhanuka ukufudukela kwenye inarha?
16 KunomKrestu ovuthiweko omaziko onomgomo wokuyokhonza kwenye inarha? Nakunjalo mkhuthaze! Ngesikhathi uPowula asuka e-Anthiyoka yeSiriya, bekuyidorobha lesithathu elikhulu eMbusweni weRoma (ngemva kweRoma no-Alekzandriya). Njengombana belinesimu ekulu, ibandla le-Anthiyoka belikutlhoga ukurhelejwa nguPowula kangangobana belizomkhumbula nakhambako. Nanyana kunjalo, iBhayibhili ayitjho bona abazalwana bamalela uPowula bona akhambe. Kuyakhanya bona kunokobana bacabangele indawo yabo kwaphela, bakhumbula bona “isimu liphasi.”—Mat. 13:38.
17. Ngibaphi abonobangela ekufuze sibacabangele nesiya “eMasedoniya”?
17 UPowula nabangani bakhe babusiswa khulu ngokusabela kwabo esimemweni sokuya eMasedoniya. Nges’khathi basedorobheni leMasedoniya yeFilipi, bathola uLidiya, begodu ‘[uJehova] wavula umkhumbulo wakhe bona alalelisise lokho uPowula akutjhoko.’ (IZe. 16:14) Cabanga ngethabo uPowula nabangani bakhe abaziinthunywa zevangeli ababa nalo ngesikhathi uLidiya nawo woke umndenakhe babhabhadiswa! Eendaweni ezinengi, kunabantu abaneenhliziyo ezithembekileko njengoLidiya abangazange khebawuzwe umlayezo woMbuso. Nengabe uya “eMasedoniya” uzokuba nethabo lokubafumana nokubasiza.
[Ibhoksi elisekhasini 5]
Indlela Yokwazi Bona Indawo Oyicabangelako Inetlhogeko
• Qala i-Ncwadi Yonyaka yamuva. Sitjheje khulu isilinganiso sabarhuweleli nabantu bendawo.
• Sebenzisa i-Index bona urhubhulule ngeenhloko nokuhlangabezanwe nakho kwakwezinye iinarha.
• Khuluma nabarhuweleli ekhebavakatjhela namkha bahlala enarheni leyo.
• Nengabe ucabangela indawo ezokukosa bona utjhumayele ngelimi lendabuko, qala imithombo yephasi, njenge-Internet ukubona bona bangakhi abantu abakhuluma ilimi lakho enarheni leyo.
• Kunetlhogeko ekhethekileko yemindeni eqinileko ngokomoya namaphayona wesikhathi esizeleko eBotswana neNamibia.