Ibhoksi Leembuzo

◼ Khuyini equnta bona siyamtjhiyela umuntu incwadi namtjhana awa?

Into eqakathekileko yikareko yomuntu. Nengabe utjengisa ikareko yamambala, singamtjhiyela abomagazini ababili, incwajana, incwadi, namtjhana enye incwadi esiyikhambisako. Singakwenza lokhu ngitjho nanyana sibona bonyana unemali encani nofana akanayo yokunikelela umsebenzi womhlaba woke. (Job. 34:19; ISam. 22:17) Ngakelinye ihlangothi, akukafuzi iincwadi zethu sizitjhiyele abantu abangazithabeliko.—Mat. 7:6.

Singabona njani bona umninimuzi unekareko? Ukuzimisela ukukhulumisana nathi bufakazi obuhle bokobana unekareko. Ukulalelisisa nesikhulumako, ukuphendula iimbuzo nokuveza iimbono kutjengisa bona uhlanganyela kangangani engcocweni. Ukukhambisana nathi nesifunda iBhayibhili kutjengisa bona uyalihlonipha iLizwi lakaZimu. Kanengi kuyasiza ukubuza bona uzoyifunda na incwadi ekhanjiswako. Abarhuweleli kufuze basebenzise ukwahlulela okuhle ukubona ikareko yomuntu ngamunye. Ngokwesibonelo, nesifakaza endleleni ngeze kwafaneleka ukunikela woke umuntu odlula kithi abomagazini, iincwajana, namtjhana iincwadi. Nesingakghoni ukubona ikareko yomuntu, kungaba kuhle ukumnikela isimemo namtjhana iphetjhana.

Ngokufanako, inani leencwadi umrhuweleli azifumanako endaweni yeencwadi kufuze lisekelwe kilokho umrhuweleli azokutlhoga ekonzweni, ingasi emandlenakhe wokunikela. Iimnikelo akusingeyokubhadela incwadi kodwana ngeyokusekela zoke iingcenye zomsebenzi wethu wokutjhumayela. Kungakhathaliseki bona ubujamo bethu obungokweemali bunjani, ukuthokozela kuzosenza sinikele ngokutjhaphulukileko ekukhwahleni kwethu, ingasi ngesalela yalokho esinakho, bona sisekele iinkareko zoMbuso. (Mar. 12:41-44; 2 Kor. 9:7) Godu kuzosenza sithathe kwaphela iincwadi esizitlhogako, singamorosi iimnikelo esetjenziswe nekwenziwa iincwadezo.

[Umkhangiso osekhasini 2]

Abarhuweleli kufuze basebenzise ukwahlulela okuhle ukubona ikareko yomuntu ngamunye