Iindlela Eentathu Zokuthuthukisa Ukufundisa Kwakho
1. Kubayini kufuze sifune ukuthuthukisa ukufundisa kwethu?
1 Zoke iinkhonzi ezimaKrestu zibafundisi. Kungakhathaliseki bona senza ukukhambela kokuthoma, siyabuyela ukuyokuthuthukisa ikareko, namtjhana siraga isifundo seBhayibhili, sidlulisa umlayezo. Begodu umlayezo esiwufundisako ukhethekile. Sinikela ukukhanya ‘kwemitlolo ecwengileko,’ okungenza abantu ‘bahlakaniphele ukuphuluswa.’ (2 Thi. 3:15) Qala bona lilungelo elihle kangangani leli! Nanzi iindlela eentathu esingathuthukisa ngazo ukufundisa kwethu.
2. Singafundisa njani ngendlela ebulula?
2 Kwenze kube bulula: Nesiyazi kuhle indaba, singakhohlwa lula bona komunye umuntu ongayaziko ukwazisokho kungaba budisi kangangani. Ngalokho newuraga isifundo seBhayibhili, ungafaki iimniningwana eemnengi engatlhogekiko. Kunalokho, veza amaphuzu ayihloko. Ukukhuluma khulu akutjho ukufundisa ngcono. (Iziy. 10:19) Ngokujayelekileko kuhle khulu ukufunda iimtlolo eyihloko kwaphela. Ngemva kokufunda umtlolo, dzimelela engcenyeni enicoca ngayo. Itjumayelo yeNtabeni, etlolwe kuMatewu izahluko 5 kuya 7, imumuthe amaqiniso adephileko, begodu uJesu wafundisa ngendlela elula asebenzisa namezwi ambalwa akhethwe kuhle.
3. Iqakatheke ngani iimfanekiso, begodu mifanekiso enjani ephumelelako?
3 Iimfanekiso: Iimfanekiso yenza umuntu acabange, ikghwatha amazizo begodu iyasiza ekukhumbuleni. Ungacabangi bona kutlhogeka ube nekghono lokucoca indaba bona ukwazi ukwenza iimfanekiso. UJesu kanengi wasebenzisa iimfanekiso emfitjhani enganazinto ezinengi. (Mat. 7:3-5; 18:2-4) Iinthombe ezilula ezigwalwe ephepheni nazo zingaba lisizo elikhulu. Ukulungiselela kusesengaphambili kungakusiza ufumane iimfanekiso ephumelelako.
4. Singayisebenzisa njani iimbuzo ngendlela ephumelelako?
4 Iimbuzo: Iimbuzo yenza umuntu omfundelako acabange. Ngalokho, iba nesineke ngemva kokubuza umbuzo. Newurhaba ukuphendula wena ngokwakho, ngeze wazi bona khuyini umuntu omfundelako ayizwisisako. Nekanikela ipendulo ekungasiyo, kunokobana umlungise, kungaba ngcono ukumrholela esiphethweni esifaneleko usebenzisa iimbuzo. (Mat. 17:24-27) Kwamambala, soke asisibafundisi abapheleleko. Ngalokho, iBhayibhili isikhuthaza bona sitjheje indlela esifundisa ngayo. Ukwenza kwethu njalo kuzosilethela iinzuzo zokuphila okungapheliko nalabo abasilalelako.—1 Thi. 4:16.