UNkulunkulu Ukhuluma Nathi NgoJeremiya
1. Ngiyiphi incwadi eyatjhatjhululwa emhlanganweni wesigodi ka-2010, begodu sizoyisebenzisa njani?
1 Qala bona sathaba kangangani nekutjhatjhululwa incwadi etja Emhlanganweni Wesigodi ka-2010 othi “Hlala Hlanu KwakaJehova!” Incwadi le iveza iimfundo zokuphila kwethu kwaqobe langa ezifumaneka encwadini kaJeremiya neyeSililo. (Rom. 15:4) Yenzelwe bona isetjenziswe Esifundweni SeBhayibhili Sebandla, izokufundwa ukuthoma ngeveke kaNovemba 5, 2012.
2. Kubayini singazuza ekufundeni incwadi yeBhayibhili kaJeremiya neyeSililo?
2 Iyazuzisa Namhlanje: UJeremiya, umtloli wencwadi yeBhayibhili ephefumulelweko le, waporofida hlangana nesikhathi sokutjharagana kwaJuda. Ekuthomeni, wazizwa angasifanelekeli isabelo sakhe. (Jer. 1:6) Godu watjhutjhiswa babantu ajayelene nabo mhlamunye iinhlobo ezivela endaweni yekhabo, e-Anathoti. (Jer. 11:21, 22) Kuyazwisiseka bona uJeremiya ngezinye iinkhathi bekazizwa adanile. (Jer. 20:14) Njengombana senza ukuthunywa kwethu ‘kokwenza abantu zoke iintjhaba babe bafundi,’ kanengi siqalana neentjhijilo namazizo afana newakaJeremiya. (Mat. 28:19, NW) Ukufunda lokho akutlolako kusisiza bona senze ikonzwethu ngokuthembeka nangetjiseko.
3. Sizozisebenzisa njani iingcenye ezithileko zencwadi kaJeremiya?
3 Iingcenye Zayo: Imitlolo eyihloko ekufuze ifundwe hlangana nengcoco itlolwe ngokutjhigamileko. Ukuphela kwesifundo seveke ngasinye kubonakala ngombuzo oqakathekileko namtjhana ngemida eembili enzima khulu eveza amaphuzu ayihloko wesifundo. Iimbuzo le kufuze ibuzwe abalaleli ngomnqopho wokubuyekeza. Encwadini le kuneenthombe ezihle ibandla elingathanda ukuzikhulumela.
4. Singazuza njani ngokuzeleko ekufundeni incwadi kaJeremiya?
4 Bona uzuze ngokuzeleko, lungiselela isifundo ngasinye kusesengaphambili. Qala amaphuzu ongawasebenzisa ekuphileni kwakho nekonzweni. Hlanganyela ngokuzeleko ekuphenduleni. Ngesibusiso sakaJehova, uJeremiya wasizalisa ngethabo nangokwaneliseka isabelo sakhe. (Jer. 15:16) Kwanga ukufunda kwethu incwadi etja le kungasisiza bona senze ikonzwethu ngendlela efanako.