Bona Okuhle NgomSebenzakho Obudisi
1. Yini enganciphisa itjisekwethu ngekonzo?
1 Umuntu wabunjelwa bona ‘abone okuhle ngomsebenzakhe obudisi.’ (Mtj. 2:24) Nokho, nesibhalelwa kubona imiphumela emihle ekonzwenethu, ukudana kungasiqedela ithabo begodu kusenze sinciphise itjisekwethu. Khuyini okungasisiza sibulunge umoya omuhle?
2. Kubayini kufuze singalindeli okukhulu malungana nokusabela kwabantu ekonzweni?
2 UngaLindeli OkuKhulu: Khumbula bona nanyana labo abasabelako kuJesu bebambalwa, ikonzwakhe yaba yipumelelo ongeze wayizaza. (Jwa. 17:4) Emfanekisweni wakhe womtjali, uJesu wabikezela bona iinhliziyo ezinengi ekugcineni bezingekhe ziwamukele umlayezo womBuso onjengembewu. (Mat. 13:3-8, 18-22) Nokho, imizamo yethu yokuzimisela isafikelela okukhulu.
3. ‘Singazithela njani iinthelo’ ngitjho nanyana sibona ukusabela okuncani nesitjhumayelako?
3 INdlela EsiThela Ngayo IinThelo EziNengi: Ngokomfanekiso kaJesu, labo abamukela umlayezo ‘bazokuthela.’ (Mat. 13:23) Ngemva kobana isiqu sekoroyi sihlume begodu sakhula, asitheli iziqu zekoroyi ezincani, kodwana imbewu etja. Ngalokho, isithelo esivezwa maKrestu aphumeleleko asisibafundi abatjha, kodwana siyimbewu yomBuso ebuyelelwe kanengi—ukukhuluma kwethu ngomBuso. Lokhu kuphumela ‘ebuhleni’ obukhulu esingafumana kibo ukwaneliseka, kungakhathaliseki bona abantu bayasabela nofana awa. Siba nengcenye ekucwengisweni kwebizo lakaJehova. (Isa. 43:10-12; Mat. 6:9) Sithabela ilungelo lokuba ziinsebenzi ezikunye noZimu. (1 Kor. 3:9) ‘Iinthelo zomlomo’ ezinjalo zithabisa uJehova.—Heb. 13:15, 16.
4. Ngimiphi imiphumela ikonzwethu engaba nayo singazi?
4 Ngaphezu kwalokho, umsebenzi wethu obudisi ungaba nemiphumela esingayiboniko. Kungenzeka bona abanye abezwa uJesu atjhumayela akhenge babe bafundi bakhe bekwaba kulapho aqeda ikonzo yakhe yephasini. Ngokufanako, imbewu yomBuso esiyitjalako kungenzeka ingahlumi begodu ikhule ehliziyweni yomuntu bekube ngesinye isikhathi, umuntu loyo angagcina alamukele iqiniso thina singazi. Kwamambala, ikonzo yethu yenza ubuhle obukhulu. Ngalokho, ‘singaragela phambili sithela iinthelo ezinengi’ begodu siziveze sibafundi bakaJesu.—Jwa. 15:8.