UngaziLinganiseli—UkuQalana NeHlelo EliMajadu
1. Kubayini abanye bazaza ukubawa isifundo seBhayibhili?
1 Abanye bayazaza ukubawa isifundo seBhayibhili ngombana bamajadu. Ukutlhogomela isifundo seBhayibhili kuthatha isikhathi. Kutlhoga isikhathi ukulungiselela isifundo, ukusiraga, nokusiza umfundi bona ahlule imirarwakhe mathupha. Umpostoli uPowula wathi unikele umphefumulwakhe ukusiza labo abaseTesalonika bona bazi uJehova. (1 Tes. 2:7, 8) Singasiraga njani isifundo seBhayibhili ngitjho nanyana simajadu?
2. Ithando esinalo ngoJehova liyithinta njani indlela esisebenzisa ngayo isikhathi sethu?
2 UkuKhonza UJehova KuTlhoga IsiKhathi: Iqiniso elilula kukobana ukukhulekela kutlhoga isikhathi. Ngokwesibonelo, sitlhoga isikhathi bona siye emihlanganweni, sihlanganyele ekonzweni, sifunde iBhayibhili, begodu sithandaze. Umuntu otjhadileko omajadu uzokwenza isikhathi sokuba nomlinganakhe. Qala bona kufuze ‘sisithenge’ kangangani isikhathi sokukhulekela uJehova ngombana simthanda! (Efe. 5:15-17; 1 Jwa. 5:3) NgokwakaJesu, ingcenye eqakathekileko yokukhulekela kwethu msebenzi wokwenza abafundi. (Mat. 28:19, 20) Ukucabanga ngalokhu kuzosisiza singazibambi ekwamukeleni umthwalo wefanelo wokuraga isifundo seBhayibhili.
3. Singasitlhogomela njani isifundo seBhayibhili ngitjho nanyana ubujamo buthikazisa ihlelo lethu lekonzo?
3 Kodwana kuthiwani nengabe ihlelo lethu lithikaziswa kusebenza kwethu, miraro yepilo, namtjhana izabelo ezingokwezulwini? Abanye abarhuweleli okufuze bathathe ikhambo ngezinye iinkhathi baraga isifundo seBhayibhili sabo ngomtato nofana ngokucoca ngekhomphyutha. Labo abathikaziswa miraro yokugula okungumahlalakhona bangahlela bona loyo abamfundelako eze emzinabo bazokufundela khona. Abanye bahlela bona umrhuweleli onokuthenjelwa ayobasiza ekurageni isifundo nebangafumanekiko.
4. Ngiziphi iimbusiso ezifumaneka ngokuhlanganyela emsebenzini wokuraga iimfundo zeBhayibhili?
4 UPowula wafumana ithabo elikhulu ngokunikela ngesikhathi sakhe namandla bona asize abanye bafunde iqiniso. (IzE. 20:35) Nekacabanga ngabo boke egade akghona ukubasiza eTesalonika, watjhukumiseleka bona athokoze uJehova. (1 Tes. 1:2) Ithabo nokwaneliseka ekonzweni kunganda nesingavumeli ihlelo elimajadu lisilinganisele ekuhlanganyeleni emsebenzini wokuraga iimfundo zeBhayibhili.