Bobani Abazokuba NeKareko?
1. Nesifunda ISithalasokulinda sethu namtjhana iPhaphama! khuyini okufuze siyicabange begodu ngani?
1 ISithalasokulinda ne-Phaphama! zilungiselelwe kucatjangwa ngesimu yephasi loke. Ngalokho, abomagazinaba bakhuluma ngeenhloko ezihlukahlukeneko. Njengombana sifunda isihloko ngasinye emakhophinethu, kufuze sicabange ngabantu okungenzeka sibakare isihlokweso, ngemva kwalokho qiniseka bona uyamkhambisela umuntu loyo.
2. Ngiziphi iinhloko ezikibomagazini bethu ezingakara abanye?
2 Inga-kghani iSithalasokulinda samva nje sikhuluma ngesihloko seBhayibhili enikhe nacoca ngaso nomuntu osebenza naye? Sikhona na isihloko esikhuluma ngokuphila komndeni esingaba lisizo esihlobeni? Unomngani ohlela ikhambo lokuya enarheni okukhulunywe ngayo ku-Phaphama!? Inga-kghani omunye wabomagazini laba ungakara endaweni yamabhizinisi namtjhana ema-ofisini karhulumende wesimini yangekhenu? Ngokwesibonelo, umagazini okhuluma ngeentjhijilo zabantu abalupheleko abaqalana nazo ungakara khulu labo abahlala emakhaya atlhogomela abalupheleko. Kilabo abasebenza kezomthetho bangaba nekareko kumagazini okhuluma ngobulelesi.
3. Landisa okuhlangabezanwe nakho okutjengisa ukuqakatheka kokukhambisa abomagazini abathileko ebantwini esicabanga bona bangabanekareko kibo.
3 ImiPhumela: Esinye isibili seSewula Afrika, ngemva kobana sifumene i-Phaphama! ka-Octoba 2011 enesihloko esithi, “Ukukhulisa Izingane Ezikwazi Ukuzimela,” sadosela umtato iinkolo ezima-25 esimini yaso yebandla. Ezima-22 zawamukela amakhophi begodu zanikela abafundi. Esinye isibili enarheni leyo senza okufanako, naso sakhambisela iinkolo ezisesimini yaso abomagazini labo. Kesinye seenkolwezi abotitjhere baqunta ukusebenzisa umagazini lo ehlelweni labo lokufunda laqobe veke. Isibilesi sakucocela umbonisi wesifunda lokhu. Ngemva kwalokho, wakhuthaza amabandla asesifundeni sakhe bona atjhumayele eenkolweni ezisesiminabo. I-ofisi legatja lafumana ama-oda amanengi wabomagazini abangeziweko, kangangobana umagazini lo kwatlhogeka bona ugadangiswe godu!
4. Kubayini sifuna ukukhambisela abantu abanengi abomagazini ngendlela esingakghona ngayo?
4 Abomagazini bethu banikela ngehlathululo yamambala ngezenzakalo zanje begodu badosela ukunaka eBhayibhilini nemBusweni kaZimu. Ngibo kwaphela abomagazinaba ephasini loke ‘abamemezela isindiso.’ (Isa. 52:7) Ngalokho, sifuna ukubakhambisela abantu abanengi ngendlela esingakghona ngayo. Indlela ehle yokwenza lokhu kuzibuza bona, ‘Bobani abazokuba nekareko?’