Ukukhambisela Abantu Abathileko Abomagazini Qobe Nyanga—Kulisizo Ekuthomiseni Iimfundo ZeBhayibheli
1. Kubayini ihlangano kaJehova yakhuthaza abarhuweleli bona bakhambisele abantu abomagazini qobe nyanga?
1 Abantu abanengi abafuni ukufunda nathi iBhayibheli, kodwana bayakuthanda ukufunda abomagazini bethu. Ngalokho-ke, sekusikhathi eside ihlangano kaJehova ikhuthaza abarhuweleli bona bakhambisele abantu abomagazini qobe nyanga. Njengombana abantu bafunda abomagazini bethu qobe, ngokuvamileko baba nesifiso sokufunda iliZwi lakaZimu. (1 Pit. 2:2) Ngokukhamba kwesikhathi, bangafunda okuthileko okubathintako, kubenze bamukele isifundo seBhayibheli.
2. Singayihlawulela njani ikareko yalabo esibakhambisela abomagazini qobe?
2 ‘Sezela’ Imbewu Yeqiniso: Kunokobana utjhiye abomagazini kwaphela, coca nomninimuzi ulinge ukwakha ubuhlobo naye. Lokhu kuzokusiza wazi ubujamo bakhe, izinto azithandako neenkolelo zakhe, kuzokwenza ukhulume ngokuhlakanipha. (IzA. 16:23) Lungiselela ivakatjho ngalinye. Nakukghonekako, ngobufitjhani khanyisa iphuzu elithileko begodu ulisekele ngomtlolo okumagazini, ngokwenza njalo usezela nanyana ngiyiphi imbewu yeqiniso ehliziywenakhe. (1 Kor. 3:6) Tlola ilanga levakatjho ngalinye, incwadi ekhanjisiweko, isihloko nomtlolo ebekucocwa ngawo.
3. Kufuze sibuyele kangaki kilabo esibakhambisela abomagazini qobe?
3 Kufuze Ubuyele Kangaki? Kufuze ubuyele kanye ngenyanga ubalethele abomagazini bamva. Nanyana kunjalo, ngokuya ngobujamo bakho nangekareko yomuntu, ungakhetha ukubuyela kanengana. Ngokwesibonelo, ngemva kweveke yinye namkha eembili utjhiye abomagazini, ungabuyela uthi, “Ngithe angidlule ngapha bona ngikutjengise okuthileko kibo magazini engikutjhiyele bona.” Lokho kuzomenza afune ukufunda isihloko esithileko. Nangabe sekasifundile, ungambuza bona ucabangani ngesihlokweso begodu nicoce ngaso kafitjhani. Nangabe umuntu uyakuthabela ukufunda iincwadi zethu, ungabuyela umnikele iphetjhana, incwajana, nofana incwadi esiyikhambisako ngenyanga leyo.
4. Yini esingayenza ngeenkhathi ezithileko bona siqunte bonyana esibakhambisela abomagazini qobe bazimisele na ukuba nesifundo seBhayibheli?
4 Ungalindeli umninimuzi bona kube nguye ozibawela isifundo seBhayibheli. Thatha igadango. Ngitjho nanyana asala isifundo seBhayibheli ekuthomeni, ngezinye iinkhathi newumvakatjhelako ungamtjengisa isihloko esithi “Imibuzo YeBhayibheli Iyaphendulwa” ku-siThala ubone bonyana uzimisele ukucoca nawe ngaso. Mhlamunye ungathomisa isifundo ujame emnyango. Nanyana kunjalo, nengabe awukghoni ukuthomisa isifundo, ungaragela phambili umlethela abomagazini bona uhlawulele ikarekwakhe.