Qalani Abaphorofidi Njengesibonelo—UZefaniya
1. UZefaniya bekakhonza njengomphorofidi ngaphasi kwabuphi ubujamo, begodu uba njani sibonelo esihle kithi namhlanjesi?
1 Bekuhlangana nekhulu lekhomba leminyaka B.C.E., begodu ukukhulekela uBhali bekuyinto eyenziwa tjhatjhalazi kwaJuda. Bekusanda ukubulawa iKosi embi u-Amoni, begodu besele kubusa iKosi eseseyincani uJosiya. (2 Kron. 33:21–34:1) Hlangana nesikhatheso, uJehova wathumela uZefaniya bona amemezele umlayezo wesahlulelo sakhe. Ngitjho namtjhana uZefaniya kungenzeka bekalilunga lomuzi webukhosini bakwaJuda, akhenge awudlulise kabuthaka umlayezo kaJehova wokusola abadosaphambili bakwaJuda. (Zef. 1:1; 3:1-4) Nathi ngokufanako, silwela ukulingisa isibindi sakaZefaniya begodu asivumeli iinhlobo bona ziphazamise ukukhulekela kwethu uJehova. (Mat. 10:34-37) Ngimuphi umlayezo ebewudluliselwa nguZefaniya, begodu waba namuphi umphumela?
2. Ngiliphi igadango ekufuze silithathe bona sivikeleke elangeni lelaka lakaJehova?
2 Funani UJehova: NguJehova kwaphela ongakwazi ukusindisa abantu ngelanga lelaka lakhe. Kungebangelo, uZefaniya akhuthaza abantu bakwaJuda bona bafune uJehova, bafune ukulunga, begodu bafune nokuthobeka kusese nesikhathi. (Zef. 2:2, 3) Singatjho okufanako nangathi namhlanjesi. NjengoZefaniya, sikhuthaza abanye bona bafune uJehova, kodwana nathi kufuze silwele ukuzimisela bona ‘singahlanuki uJehova.’ (Zef. 1:6) Ngalokho, sifuna uJehova ngokufunda iliZwi lakhe ngokutjhejisisa nokuthandazela isinqophiso sakhe. Sifuna ukulunga ngokuphila ngokuziphatha okuhlwengileko. Sifuna ukuthobeka ngokuhlawulela umoya wokulalela nokuhlala sikulungele ukulalela isinqophiso esivela ehlanganweni kaJehova.
3. Kubayini kufuze sihlale sinombono omuhle ekonzweni?
3 Iimphumela Emihle: Umlayezo wokwahlulela kaZefaniya wathinta abanye kwaJuda kodwana khulukhulu uJosiya omncani, owathoma ukufuna uJehova esesemsanyana. Ngokukhamba kwesikhathi uJosiya wathoma ijima elikhulu lokuqeda ukukhulekela iinthombe kwaJuda. (2 Kron. 34:2-5) Namhlanjesi, ngitjho nanyana enye imbewu yomBuso iwela eqadi kwendlela, phezu kwelitje, namkha hlangana nameva, enye iwela phezu kwehlabathi ehle begodu iveza iinthelo. (Mat. 13:18-23) Siyaqiniseka bona uJehova uzokuragela phambili abusisa imizamwethu njengombana sihlala simajadujadu nokurhatjha imbewu yomBuso.—Rhu. 126:6.
4. Kubayini kufuze sihlale ‘silindele’ uJehova?
4 Abanye kwaJuda bebacabanga bona uJehova angekhe athathe igadango. Nanyana kunjalo, uJehova wabaqinisekisa boke bona ilanga lakhe elikhulu liseduze. (Zef. 1:12, 14) Isindiso beyizokufunyanwa kwaphela ngilabo abaphephela kuye. (Zef. 3:12, 17) Njengombana sihlala ‘silindele’ uJehova, kwanga singahlala sifumana ithabo ekukhonzeni ngebumbano nabakhulekeli esikunye nabo bakaZimethu omkhulu!—Zef. 3:8, 9.