IsiKolo SeKonzo EsingokweZulwini Saka-2015 Sisisiza Bona Sithuthukise Ukufundisa Kwethu

¹ Umrhubi uDavida watlola: “Sengathi amezwi womlomami nemikhumbulo yehliziywami ingamukeleka kuwe [Jehova] Dwala lami nomHlengami.” (Rhu. 19:15 [19:14, NW]) Nathi sifuna amezwethu athabise uJehova, ngombana siyalazisa ilungelo lethu lokukhuluma iqiniso ebandleni nekonzweni. IsiKolo seKonzo esingokweZulwini singenye yeendlela uJehova asibandulela ngayo ikonzo. Ukubandulokhu sikufumana qobe veke emabandleni angaphezu kwe-111 000 ephasini mazombe. Kusize abazalwana nabodade bephasini loke nabavela kizo zoke iinzinda bona babe ziinkhonzi ezifanelekako zeendaba ezimnandi, abanekghono lokufundisa ngokukholisa, ngokuhlakanipha nangesibindi.—IzE. 19:8; Kol. 4:6.

² Ihlelo lesikolo saka-2015 lizokuhlanganisa iinhloko ezizokuvela “ku-Sethulo SeZwi LikaNkulunkulu [igw-ZU]” kuhlanganise neenhloko ezivela ku-Insight on the Scriptures, uMqulu 1, nezinye iincwadi. Ngaphezu kwalokho, kwenziwe amatjhuguluko wesikhathi esibekiwe sokunikela amaphuzu aveleleko weBhayibheli neSabelo sekulumo No. 1. Amatjhuguluko la kuhlanganise neenlayezo zendlela iingcenye zesikolo okufuze zinikelwe ngayo kuzokucocwa ngazo eengabeni ezilandelako.

³ Amaphuzu Aveleleko WeBhayibheli: Abazalwana ababelwe ingcenye le bazokusebenzisa imizuzu emibili ukucoca ngephuzu linye abalifumane likarisa lomTlolo wokufundwa kweBhayibheli kwaqobe veke. Ukulungiselela kuhle kuzokuba nomphumela omuhle wokuhlanganyela amaphuzu aqakathekileko nebandla ngesikhathi esibekiweko. Ngemva kwalokho, njengokuvamileko ibandla lizokunikelwa imizuzu esithandathu ukunikela ngeempendulo imizuzwana ema-30 namkha ngaphasi, ngamaphuzu abawafumane akarisa wokufundwa kweBhayibheli kwaqobe veke. Kutlhoga ukulungiselela nokuzikhalima ukutjho iphuzu elizwakalako ngemizuzwana ema-30, kodwana ukwenza njalo kulibandulo elihle kithi. Lokhu kunikela nabanye isikhathi sokutjho lokho abakufundileko nebenza irhubhululo labo mathupha.

⁴ Isabelo No. 1: Isikhathi esibekelwe ukufundwa kweBhayibheli sinciphiselwe emizuzwini emithathu nofana ngaphasi begodu kuzokuthatha isiquntu ukufunda indaba leyo. Labo abafumene isabelo sokufunda kufuze babuyekeze iinkhathi ezinengana ngokulifunda ngokuzwakalako begodu batjhejisise indlela abaphimbisela ngayo amagama, bafunde ngokutjhelelako ukwenzela bona badlulisele umqondo ngokuwuzwisisa. Boke abantu bakaJehova kufuze bazimisele ukufunda kuhle, njengombana ukufunda kudlala indima eqakathekileko ekukhulekeleni kwethu. Kuthabisa kangangani ukubona inengi labantwana bethu lifunda kuhle! Ababelethi bayabukwa ngemizamwabo yethando yokusiza abantwababo bona babe bafundi abaphumelelako.

⁵ Isabelo No. 2: Isabelwesi sizokuthatha imizuzu emihlanu sizokunikelwa udade. Kufuze kusetjenziswe isihloko abelwe sona. Nengabe isabelwesi asikasekelwa emntwini okukhulunywa ngaye eBhayibhelini, kufuze indaba ibe ngejayelekileko kutjengiswe nokuthi isebenza njani esimini yendawo. Nangabe isihloko sesabelwesi sizokusekelwa emntwini okukhulunywa ngaye eBhayibhelini namtjhana ebizweni elifumaneka ku-Insight on the Scriptures, Umqulu 1, ngalokho, umfundi kufuze athuthukise isihloko sekulumo begodu akhethe imitlolo efanelekako ukusetjenziswa, aveze lokho esingakufunda esibonelweni somuntu oseBhayibhelini. Kungafakwa nemitlolo engeziweko ekhambisana nesihloko. Umbonisi wesikolo uzokwabela umsizi munye.

⁶ Isabelo No. 3: Isabelwesi sizokuthatha imizuzu emihlanu sizokunikelwa umzalwana namkha udade. Nasabelwe udade, kufuze sibekwe njengeSabelo sekulumo No. 2. Nakungumzalwana onikela isabelwesi begodu singanalo iphawu leli, indaba esekelwe encwadini i-Insight kufuze ayinikele njengekulumo acabanga ngabalaleli. Umfundi kufuze athuthukise isihloko sekulumo begodu akhethe imitlolo efanelekako ukusetjenziswa, bekatjengise lokho esingakufunda eembonelweni zabantu okukhulunywa ngabo eBhayibhelini.

⁷ Isici Esitjha Sesabelo No. 3 Sabazalwana: Nengabe ikulumo inetshwayeli begodu yabelwe umzalwana, kufuze ayinikele njengomboniso wesifundo somndeni namkha ikonzo yesimini. Ngokuvamileko, umbonisi wesikolo uzokwabela umsizi nokuhlelwa kwekulumo. Umsizi kufuze abe lilunga lomndeni womfundi namkha umzalwana webandleni. Kungafakwa nemitlolo engeziweko ekhanyisa iinkambisolawulo zeBhayibheli ezikhambisana nesihloko. Ngezinye iinkhathi kungabelwa umdala bona enze ingcenye le. Abadala bangazikhethela abasizibabo nokuhlelwa kwekulumo. Ngokungazazi, kuzolikhuthaza ibandla ukubona abadala batjengisa ikghono lokufundisa nelunga lomndeni nofana omunye umzalwana.

⁸ ISILULEKO: Umbonisi wesikolo uzokusebenzisa imizuzu emibili ngemva kobana umfundi ngamunye anikele ikulumo uzombuka kuhlanganise nesiluleko esicatjengelwe kuhle esisekelwe encwadi ethi, Zuza Emfundweni YeSikole Senkonzo Esingokwasezulwini. Umbonisi wesikolo nakethula ingcenye yomfundi esikolweni, angekhe atjho iphuzu lesiluleko umfundi asebenzela kilo. Ngemva kobana umfundi abeke ikulumwakhe, umbonisi wesikolo kufuze ngamezwi wokumbuka, atjho iphuzu umfundi ebekasebenzela kilo, begodu atjho nokuthi kubayini umfundi enze kuhle ephuzwinelo nofana ngomusa amhlathululele bonyana kubayini kuzomzuzisa ukuhlolisisa iphuzwelo ngokunabileko.

⁹ Iphepha lesiluleko lomfundi lingafumaneka emakhasini 79 kuya ku-81 encwadinakhe yeSikole Senkonzo. Ngemva kobana umfundi enze isabelo sakhe, umbonisi wesikolo uzokumerega incwadi yomfundi begodu uzokubuza umfundi ngemsitheleni ukuthi usenzile na isivivinyo sesiluleko abelwe sona. Angambuka ngemva komhlangano namtjhana ngesinye isikhathi kuhlanganise nokumsiza lapho asalela khona. Isikhathi umfundi aba naso nombonisi wesikolo kufanele siqalwe njengethuba lokumsiza athuthuke ngokomoya.—1 Thim. 4:15.

¹⁰ Nengabe ikulumo yomfundi ibethwa sikhathi, umbonisi wesikolo namkha umsizi kufuze bakuphaphamela ukumenza akubone lokho, njengokulilisa isimbi, ukutjengisa ngokuhlakanipha ukuthi isikhathi somfundi siphelile. Umfundi kufuze atjheje bona isikhathi sakhe siphelile ngokuphetha ikulumwakhe bese uyehla esiteji.—Qala incwadi yeSikole Senkonzo, k. 282, isig. 4.

¹¹ Boke abafanelekako bakhuthazwa bona batlolise esiKolweni seKonzo esingokweZulwini. (Qala incwadi yeSikole Senkonzo, k. 282, isig. 6.) Ifundiso esiyifumana esikolwenesi isiza abantu bakaJehova ukutjhumayela nokufundisa iindaba ezimnandi zomBuso ngokukholisa, ngesithunzi nangethando. Akunakuzaza bona uJehova uyathaba ngokudunyiswa ngibo boke abazuza khulu efundisweni yobuKrestu!—Rhu. 148:12, 13; Isa. 50:4.