Imihlangano YeKonzo Yesimini Ifeza Umnqophwayo
1. Imihlangano yekonzo yesimini ifeza muphi umnqopho?
1 Kesinye isenzakalo, uJesu wahlangana nabafundi bakhe abama-70 ngaphambi kobana bangenele ijima lokutjhumayela. (Luk. 10:1-11) Wabakhuthaza ngokubakhumbuza ukuthi ngekhe bawenze bodwa umsebenzi lo, kodwana bebanqotjhiswa ‘yiKosi yesivuno,’ uJehova. Wabuye wabanikela iinqophiso ezabahlomisela ukwenza umsebenzi lo, wababa “ngababili.” Namhlanje, imihlangano esiba nayo ngaphambi kobana siye esimini ifeza umnqopho ofanako—wokusikhuthaza, ukusihlomisela, nokusenza sihleleke.
2. Umhlangano wekonzo yesimini kufuze uthathe isikhathi esingangani?
2 Okwanje, umhlangano wekonzo yesimini uthatha imizuzu eli-10 kuya kweli-15, ehlanganisa ukuhlela iinqhema, ukwabelana ngesimu, nokuthandaza. Lokhu sekutjhentjhiwe. Ukuthoma ngo-Apreli, umhlangano wekonzo yesimini, uzokuthatha imizuzu emihlanu ukuya kwelikhomba. Nanyana kunjalo, nakhibe umhlangano lo ulandela omunye umhlangano webandla, kufuze urhunyezwe khulu njengombana labo abeze emhlanganweni sebayifumene ingcoco ekhuthazako engokomTlolo. Ukuba nomhlangano wekonzo yesimini orhunyeziweko kuzokwenza boke babe nesikhathi esinengi ekonzweni. Ngaphezu kwalokho, nange amaphayona namkha abarhuweleli sebathomile ukutjhumayela ngaphambi komhlangano wekonzo yesimini, kuzokufanele bajame kancani, kuragwe umhlangano qangi.
3. Imihlangano yekonzo yesimini kufuze ihlelwe njani ukwenzela ukuthi ibe lisizo elikhulu kubarhuweleli?
3 Imihlangano yekonzo yesimini kufuze ihleleke ukwenzela bona ibe lisizo elikhulu kubarhuweleli. Emabandleni amanengi kuyasiza bona iinqhema zesimu zihlukane kunokuhlangana endaweni yinye. Lokhu kungenza kube bulula ngabarhuweleli ukuya emhlanganweni wekonzo yesimini mhlamunye nokuya endaweni yesimu esetjenzwako. Abarhuweleli bangahleleka msinyana, begodu kungaba bulula nangababonisi beenqhema ukutlhogomele abarhuweleli abangaphasi kwabo. Umkhandlu wabadala ungatjheja ubujamo uqunte ukuthi ngikuphi okufaneleko. Ngaphambi kobana kuphethwe ngomthandazo omfitjhani, boke kufuze bazi bonyana bazokutjhinga kuphi begodu bazokusebenza nobani.
4. Kubayini kungakafuzi siqale imihlangano yekonzo yesimini njengengakaqakatheki ukudlula eminye?
4 Uqakathekile Njengeminye Imihlangano Yebandla: Njengombana imihlangano yekonzo yesimini ibanjwa ngomnqopho wokuzuzisa labo abazokuya ekonzweni, kungenzeka kungabi yibandla loke elizokuya esimini. Nanyana kunjalo, lokhu akutjho bona kufuze uqalelwe phasi namkha uqalwe njengongakaqakatheki kuneminye imihlangano yebandla. Njengayo yoke eminye imihlangano yethu, imihlangano yekonzo yesimini ililungiselelo elivela kuJehova elisisiza bona sikhuthazane ethandweni nemisebenzini emihle. (Heb. 10:24, 25) Yeke, oraga umhlangano kufuze alungiselele kuhle ukwenzela ukuthi ingcoco ibe ngedumisa uJehova beyizuzise abalaleli. Nakusebenzako, abarhuweleli abaya ekonzweni yesimini kufuze benze umzamo wokuba khona emhlanganweni lo.
Imihlangano yekonzo yesimini akukafuzi iqalelwe phasi namkha iqalwe njengengakaqakatheki kuneminye imihlangano yebandla
5. (a) Iyini indima yombonisi wekonzo ekuhleleni imihlangano yekonzo yesimini? (b) Udade kufuze awurage njani umhlangano wekonzo yesimini?
5 Ukulungiselela Okwenziwa Mragi Womhlangano: Bona alungiselele kuhle umhlangano, umragi kufuze afumane isabelo sakhe kusesenesikhathi. Lokhu kuyafana nalokha afumana isabelo somhlangano wekonzo yesimini. Iye, nakhibe iinqhema zekonzo yesimini ziyahlukana, ababonisi namkha abasizi babo baraga umhlangano eenqhemeni zabo. Nokho, nangabe ibandla loke liyahlangana bona libe nomhlangano wekonzo yesimini, umbonisi wekonzo uzokwabela omunye ukuthi arage umhlangano. Abanye ababonisi bekonzo banikela boke abaraga umhlangano lo irhelo lamabizo bese balifaka nebhodini yezaziso. Umbonisi wekonzo kufuze enze ukwahlulela okuhle nakabela abazokuraga umhlangano, akhumbule ukuthi izinga lomhlangano lo lizokuya ngokufundisa nekghono lalabo abazokuraga umhlangano. Nengabe akekho umdala, inceku ekhonzako, namkha omunye umzalwana obhajadisiweko ofanelekako bona arage umhlangano ngezinye iinkhathi, umbonisi wekonzo kufuze abele udade obhajadisiweko ofanelekako ukuthi arage umhlangano.—Qala isihloko esithi, “Udade Nakufuze Arage Umhlangano.”
6. Kubayini kuqakathekile ngomragi owabelweko bona alungiselele kuhle?
6 Nasifumana isabelo sesiKolo seKonzo esingokweZulwini namkha somHlangano weKonzo, sisithatha njengesiqakathekileko begodu sisilungiselela kuhle. Bambalwa kithi abangacabanga ngalokho abazokutjho emhlanganweni lokha nabasendleleni eya khona. Isabelo sokuraga umhlangano wekonzo yesimini kufuze naso siqalwe njengesiqakathekileko. Yeke, njengombana umhlangano wekonzo yesimini uzokurhunyezwa, ukulungiselela kuhle kuqakatheke khulu ukwenzela bona umhlangano ube lisizo bewuphele ngesikhathi. Ukulungiselela kuhle kufaka hlangana nokufumana isimu ezokusetjenzwa kusesenesikhathi.
7. Ngiziphi ezinye zezinto umragi womhlangano angacoca ngazo?
7 Okuzokucocwa Ngakho: Njengombana ubujamo besimu ngayinye bungafani, inceku ethembekileko ayinalo ihlaka lomhlangano wekonzo ngamunye. Ibhoksi elithi “Phakathi noMhlangano weKonzo Yesimini, Ungacabangela” amanye amahlaka nakukghonakalako. Ngokujayekileko, umhlangano uzokuragwa njengengcoco. Ngezinye iinkhathi ungahlanganisa nomboniso olungiselelwe kuhle namkha ividiyo efanelekako efumaneka ku-jw.org. Nekalungiselela umhlangano wekonzo yesimini, umragi kufuze acabange ngalokho okungakhuthaza bekuhlomisele labo abaya ekonzweni yesimini ngelangelo.
Nakalungiselela umhlangano wekonzo yesimini, oragako kufuze acabange ngalokho okungakhuthaza begodu kuhlomisele labo abaya ekonzweni yesimini ngelangelo
8. Yini engaba lisizo khulu bona kucocwe ngayo phakathi nemihlangano yekonzo yesimini ngaboMgqibelo nangaboSonto?
8 Ngokwesibonelo, ngaboMgqibelo abarhuweleli abanengi bakhambisa isiThala ne-Phaphama! Abanengi ababasekonzweni ngaboMgqibelo ababikhona phakathi kweveke, yeke bangaba nobudisi bokukhumbula itjumayelo ebebayiphrakthiza hlangana nokuKhulekela kwabo koMndeni. Ngalokho-ke, kungaba lisizo bona umragi abuyekeze enye yeentjumayelo ezizimbonelo ezingemuva kwe-Konzwethu YomBuso. Ezinye iindlela zihlanganisa ukucoca ngokuthi singazifaka njani iindaba ezaziwako emphakathini, izenzakalo, namkha amaholideyi lokha nasikhambisa umagazini nofana lokho esingakutjho kumninimuzi ukwenzela bona akulungele lokho esizokucoca ngakho evakatjhweni elilandelako, nangabe ubamukele abomagazini. Nengabe bakhona abanye esele bathomile ukusebenzisa abomagazini abakhanjiswako, umragi womhlangano angababawa ukuthi basicocele okuhlangabezanwe nakho okukhuthazako namkha ezinye iimphakamiso abangaba nazo. NgaboSonto, umragi angakhetha ukwenza okufanako nakukhanjiswa isipho senyanga. Iincwajana zokuraga isifundo, ezinjengethi, Iindaba Ezimnandi nethi-Lalela UZimu kunye nencwadi ethi, Okufundiswa YiBhayibhili zingakhanjiswa nanyana kukunini, yeke oraga umhlangano angacoca kafitjhani ngokuthi zingakhanjiswa njani ezinye zeencwadezi.
9. Yini okungacocwa ngakho ngepelaveke lokha nasisejimeni elikhethekileko?
9 Nengabe ibandla lisejimeni elikhethekileko ngepelaveke, umragi womhlangano angacoca ngokuthi singabakhambisa njani abomagazini kunye nesimemo nofana iphetjhana, namkha angacoca ngalokho esingakwenza lokha umuntu nakatjengisa ikareko. Okhunye angacoca ngokuhlangabezanwe nakho okutjengisa ukuqakatheka kwamajima la.
10, 11. Kubayini ukulungiselela kwabarhuweleli kuqakathekile bona umhlangano wekonzo wesimini uzuzise?
10 Ukulungiselela Okwenziwa Mrhuweleli: Abarhuweleli nabo banengcenye ekwenzeni umhlangano wekonzo yesimini ube ngozuzisako. Lokho bangakwenza ngokulungiselela ikonzo kusesenesikhathi, mhlamunye phakathi nokukhulekela komndeni, bangaba nokuthileko abangakuhlanganyela nabanye abarhuweleli. Ukulungiselela kuhle kutjho ukuthola abomagazini neencwadi esizozikhambisa ngaphambi kokufika emhlanganweni wekonzo yesimini ukwenzela bona soke sitjhinge esimini ngaphandle kokuriyada.
11 Kuqakathekile nokuhlela ukufika emhlanganweni wekonzo yesimini kusesenesikhathi ngaphambi kobana uthome. Iye, siyazidela bona sibekhona ngesikhathi kiyo yoke imihlangano yekonzo. Nanyana kunjalo, kungathikameza khulu nasingafika emhlanganweni wekonzo yesimini sekudlule isikhathi. Njani? Umzalwana oraga umhlangano unezinto ezinengi azicabangelako ngaphambi kobana ahlele isiqhema. Nengabe kunabarhuweleli abambalwa, angakhetha bona kuyiwe esimini engasetjenzwa njalo. Nengabe abanye bakhamba ngeenyawo bona baye emhlanganweni wekonzo yesimini begodu bakhamba amabanga amade, angaba abarhuweleli labo kunye nalabo abakhamba ngeenkoloyi. Nengabe isimu esetjenzwako isendaweni enobugebengu, angabela abazalwana bona basebenze lapho nofana basebenze hlanu kweenqhema zabodade. Abarhuweleli abanepilo ebuthakathaka bangabelwa bona basebenze endaweni enganamkhuphukelo namkha imizi eneentepisi ezimbalwa. Abarhuweleli abathoma ukutjhumayela bangabelwa bona basebenze nabanelemuko. Kodwana nangabe bafika sekudlule isikhathi, ukwabiwa okwenziweko ngokujayelekileko kungafanele bona kubuyekezwe godu namkha kwenziwe kabutjha ukwenzela ukuthi kusizwe abafike lada. Ngezinye iinkhathi singaba neenzathu ezizwakalako zokufika lada. Nanyana kunjalo, nengabe sikwenza umkhuba ukufika lada, kuzokufuze sizibuze ukuthi kungebanga lokuthi sibhalelwa kukwazisa imihlangano yekonzo yesimini nofana sibhalelwa kuhlela ubujamo bethu kusesenesikhathi.
12. Nawujayele ukuzenzela amalungiselelo wakho, yini okufuze uyicabangele?
12 Ngaphambi kokuthoma komhlangano wekonzo, abarhuweleli bangakhetha ukwenza wabo amalungiselelo kusesengaphambili namkha bangabelwa umuntu abazokukhamba naye. Nengabe ujayele ukuzenzela wakho amalungiselelo, angeze wakghona na ‘ukutjhaphuluka’ usebenze nabarhuweleli abahlukahlukeneko kunokobana usebenze nabangani obajayeleko ngaso soke isikhathi? (2 Kor. 6:11-13) Angeze na ngezinye iinkhathi uhlele ukusebenza nomrhuweleli osathomako ukutjhumayela bona umsize athuthukise amakghonwakhe wokufundisa? (1 Kor. 10:24; 1 Thim. 4:13, 15) Lalelisisa zoke iinqophiso onikelwa zona, kuhlanganise nesinqophiso sokuthi nizokuthoma kuphi ukutjhumayela. Nakuphetha umhlangano, ungatjhentjhi amalungiselelo asele enziwe, nasele nabiwe, tjhingani endaweni okusetjenzwa kiyo msinyana.
13. Nengabe soke siyazimisela begodu sidlala indimethu, imihlangano yekonzo yesimini ezosizuzisa njani?
13 Ngemva kokutjhumayela, abafundi abama-70 uJesu ababela umsebenzi wokutjhumayela “babuya bathabe kwamambala.” (Luk. 10:17) Asinakho ukuzaza, ngokuthi ukuba kwakaJesu nomhlangano nabo ngaphambi kobana bayokutjhumayela kwabasiza baphumelela. Namhlanjesi, imihlangano yekonzo yesimini nayo ingaba ngezuzisako. Nakhibe boke abarhuweleli bayazimisela begodu badlala indimabo, imihlangano yekonzo yesimini izokuba ngekhuthazako, ehlomisako, nesihlelela bona sifeze umsebenzi esithunywe wona wokunikela ‘ubufakazi kizo zoke izizwe.’—Mat. 24:14.