Ragela Phambili Wenza Abafundi
1. Khuyini etlhogekako ukuthi abantu basinde?
1 Umbiko wekonzo ka-2014 waqobe mnyaka ubike ukuthi kunetjiseko nokuzimisela kwabantu bakaZimu bona batjhumayele iindaba ezimnandi zomBuso. (Mat. 24:14) Ngokwenza umsebenzi wokutjhumayela umuzi nomuzi, amajima akhethekileko ukukhambisa amaphetjhana neememo, nangokutjhumayela tjhatjhalazi, sifikelela abantu abanengi ngomlayezo weBhayibheli ukudlula ngaphambili. Nanyana kunjalo, nangabe abantu kufuze basinde, kutlhogeka sibasize babe bafundi bakaJesu ngokuthi sifunde nabo iBhayibheli.—1 Thim. 2:4.
2. Ngimiphi imibuzo okufuze sizibuze yona ezosisiza bona sihlale silungele ukuthoma isifundo seBhayibheli?
2 Hlala Ukulungele Ukuthoma Isifundo SeBhayibheli: Umuntu nakatjengisa ikareko, uyazimisela na ukufumana imininingwanakhe bese ubuyela kuye msinyana unomnqopho wokuthoma isifundo seBhayibheli? Wagcina nini ukutjengisa ukuthi isifundo seBhayibheli siragwa njani ekukhambeleni kokuthoma? Wagcina nini ukubawa ukuraga isifundo seBhayibheli kilabo ohlale ubapha abomagazini qobe nyanga? Khewabatjengisa na abantu osebenza nabo, ofunda nabo esikolweni, abomakhelwana, iinhlobo, nabanye obajayeleko ividiyo ethi, Kubayini Kufuze Ufunde IBhayibheli? nethi, Kwenziwani Esifundweni SeBhayibheli? Nawusebenzisa itjhadi elikhangisa ngeencwadi, kghani uyazimisela bona ubazise labo abathatha incwadi yokufunda ukuthi bangathola nesifundo seBhayibheli sasimahla?
3. Khuyini etlhogekako, ukuthi sifundise iqiniso ngokuphumelelako?
3 Isizo Elivela KuJehova NoJesu: Ngokuthoma umyalwakhe ‘wokwenza abafundi’ ngebizo elithi “khambani,” uJesu bekaveza ukuthi kufuze senze umzamo ongeziweko nokuthatha igadango kokuthoma. Nanyana kunjalo, akhenge asitjhiye sisodwa kodwana uthembise ukuthi uzokuba nathi. (Mat. 28:19, 20) Ngaphezu kwalokho, uJehova usiphe umoyakhe ocwengileko kuhlanganise namathulusi nebandulo esilitlhogako ukuthi sifundise abantu iqiniso. (Zak. 4:6; 2 Kor. 4:7) Singathandazela ‘kokubili isifiso namandla’ wokuhlanganyela emsebenzini oqakathekileko lo.—Flp. 2:13, NW.
4. Kubayini kufuze siragele phambili ekwenzeni abafundi?
4 Ukutjhumayela iindaba ezimnandi kusilethela ithabo. Nokho, ithabo lethu liyanda nesifundisa umuntu iqiniso, simsize akhambisane nathi ‘endleleni eya ekuphileni.’ (Mat. 7:14; 1 Thes. 2:19, 20) Okuqakatheke khulu, ngokuragela phambili ekwenzeni abafundi, sithabisa uJehova ‘ongathandi bonyana kubhubhe namunye, kodwana kobana boke baphenduke.’—2 Pit. 3:9.