Ukuthuthukisa Amakghonwethu Ekonzweni—Asibanduleni Esibafundela IBhayibheli Babe Nemikghwa Emihle Yokufunda

Okwenza Kuqakatheke: Nabazakuthuthukisa ubuhlobo babo noJehova begodu babe maKrestu avuthiweko, labo esibafundela iBhayibheli kufuze bondle iinhliziyo neengqondo zabo ngeemfundiso zeliZwi lakaZimu, ezingaphezu kwalezo ezisisekelo. (Heb. 5:12–6:1) Umuntu kufuze azimisele nakazakufunda. Kufuze simadanise izinto ezitjha esizifundako nalezo ebesele sizazi, besizwisise kuhle ukuthi singazisebenzisa njani epilwenethu. (IzA. 2:1-6) Esibafundelako nabangafunda ukuzirhubhululela bona, bangakghona ukuphendula imibuzo yeBhayibheli basebenzisa iincwadi zethu zobuKrestu. Nabangenza ngokusemandlenabo bona basebenzise lokho abakufundako, bangakghona ukujamelana neenlingo amaKrestu aqalana nazo.—Luk. 6:47, 48.

Indlela Esingakwenza Ngayo:

Qobe ngaphambi kobana nithome isifundo, gandelela ukuqakatheka kokuthandaza, nibawe uJehova anisize.—Jwa. 14:26; 1 Kor. 2:10.
Zisuka, mkhuthaze umfundi ukuthi alungiselele lokho enizokufunda ngakho. Mtjengise yakho incwadi, umfundise ukuthalela amagama aphethe umqondo wendaba.
Mkhuthaze bona aphendule ngamezwakhe. Isifundo senu asingabi mibuzo neempendulo kwaphela. Nomfundi angaphenduli ngokufunda okusencwadini njengombana kunjalo.
Mkhuthaze bona afunde ingcenye ethileko eseliZwini lakaZimu qobe langa.Mtjengise ihlelo lokufunda iBhayibheli eliku-jw.org, elineendlela ezimtjengisa bona angakwenza njani lokho. Nawuzakuba nomukghwa wokufunda iBhayibheli qobe langa kufuze uzimisele, begodu angekhe uzisole ngokwenza njalo.—Rhu. 1:2, 3.
Mtjengise indlela yokufumana iimpendulo zemibuzo yeBhayibheli usebenzisa i-Watchtower Library namkha i-Watchtower ONLINE LIBRARY. Mfundise nokuthi kufuze azazi iinrhunyezo zeencwadi esijayele ukuzisebenzisa emihlanganweni yebandla.

Linga Naku Phakathi Nenyanga:

Ekupheleni kwesihlokwana namkha isahluko ngasinye, bawa loyo omfundela iBhayibheli bona athi fahlafahla ngemitjho embadlwana lokho esele akufundile. Nangabe usengakabi naye umuntu omfundelako, phrakthisa ukubuyekeza lokho okufunde eBhayibheli namkha esiThaleni ngemitjho embalwa, khona uzokuthuthukisa indlela ozwisisa ngayo lokho okufundako.