Isebenzise Ngokuphumelelako Incwadi Okufundiswa YiBhayibhili

Njengombana umfundi weBhayibheli afunda lokho okufundiswa liBhayibheli kwamambala begodu asebenzisa lokho akufundileko, uzokuthuthuka ebuhlotjeni bakhe noZimu. (Rhu. 1:1-3) Singamsiza umuntu esifunda naye iBhayibheli ukuthi athuthuke ngokusebenzisa kuhle ezinye iingcenye ezilisizo ezisencwadini ethi, Okufundiswa yiBhayibhili.

Imibuzo Yesethulo: Isahluko ngasinye sithoma ngemibuzo ephendulwa sifundweso. Ungabuza imibuzo engatlhogi ipendulo bona uvuse ikareko yomfundi engcocwenenu elandelako. Namkha ungambawa ukuthi aphendule kafitjhani umbuzo ngamunye. Nangabe ipendulo akusingiyo, akutlhogeki bona umlungise ebujamwenobu. Iimpendulo zakhe sizokusiza bona ulemuke ukuthi ngimaphi amaphuzu okufuze uwayelele namkha uwagandelele.​—IzA. 16:23; 18:13.

Isithasiselo: Nangabe umfundi uyazwisisa, begodu uyayamukela indaba esencwadini, ungamkhuthaza ngokuthi azifundele ngokwakhe isithasiselo esikhambisana nendaba le. Esifundweni esilandelako, sebenzisa imizuzu embalwa ukuqinisekisa ukuthi uyakuzwisisa na lokho. Nanyana kunjalo, nange lokho kuzomzuzisa, kufuze wenze isikhathi nanifundako ukuthi nicoce ngendaba namkha isigaba esikusithasiselo, begodu ubuze imibuzo oyilungiselele kusesengaphambili.

Ibhoksi Lokubuyekeza: Ibhoksi lokubuyekeza ekupheleni kwesahluko ngasinye linamezwi aphendula imibuzo yesethulo. Ungasebenzisa amezwi la ukuqinisekisa ukuthi umuntu ofunda naye iBhayibheli uyazwisisa begodu angahlathulula amaphuzu ayihloko. Fundani ndawonye umutjho ngamunye ngokuzwakalako nanyana ngimiphi imitlolo ekhambisana nendaba le. Bese ubawa umfundi asebenzise imitlolo ukuhlathulula bona kubayini amezwi la ayiqiniso.​—IzE. 17:2, 3.