IPILO YAMAKRESTU

Siza Abantu Abangasondiko Bafunde NgoZimu

Kghani kuyakuvilaphisa ukutjhumayeza abantu abangakholelwa kuZimu ucabange ukuthi angekhe bakulalele? Nangabe kunjalo, khumbula ukuthi abantu abanengi ebebangasondi, kuhlanganise nabantu ebebangakholelwa kuZimu sebaboFakazi bakaJehova. Esikhathini esinengi, abakutlhogako kubasiza ukuthi bafumane ubufakazi bokuthi uZimu ukhona.—Rom 1:20; 10:14.

BUKELA IVIDIYO ETHI, KHUMBULA UKUTHI ABANTU ABANGANAKHO UKUKHOLWA BANGAKGHONA UKUBA NAKHO!—ABANTU ABANGAKHOLELWA KUZIMU, BESE UPHENDULA UMBUZO OLANDELAKO:

Okwenzeka ku-Tommaso kungakusiza njani bona ube nombono omuhle ngokutjhumayeza abantu abangasondiko?

Ipendulwakho

Indlela ongakwenza ngayo

Nangabe umuntu uthi akakholelwa kuZimu, yiba nomusa, ucabangisise begodu ube nekareko embonwenakhe nendleleni azizwa ngayo. (2Tm 2:24) Coca naye ngeenhloko angazithanda. Kghani angathanda ukukhuluma ngobufakazi obenze abantu abanengi bakholelwa ukuthi ukhona umuntu osidalileko? Nangabe kunjalo, sebenzisa iincwadi namavidiyo enzelwe abantu abangakholelwa kuZimu. Incwajana ethi, Ukuphila Kwabunjwa Na? nethi-The Origin of Life—Five Questions Worth Asking, zifakiwe emaThulusinethu wokuFundisa ukwenzela bona zifumaneke bulula.

Ekuthomeni kungakuthusa ukutjhumayeza umuntu ongakholelwako kuZimu. Kubayini ungabawi umrhuweleli onelemuko bona akusize? Khumbula ukuthi uJehova angasisiza bona sifumane boke abazimisele ukumazi, ngitjho nanyana ekuthomeni bebangakholelwa ukuthi ukhona.—IzE 13:48.