Usakhumbula?

Uzifundisise kuhle na iinThala zomnyaka lo? Linga ukuphendula imibuzo elandelako:

Kufuze sibaphathe njani abazesiweko?

Siyakuthokoza begodu siyakubuka ukuthembeka kwabo; kodwana asibabuki ngokudluleleko. Siyakubalekela ‘ukubuka’ khulu ubuntu babantu. (Jud. 16) Asifuni ukusolo sibabuzabuza imibuzo eminengi emalungana nethemba labo lokuphila ezulwini.—w20.01, k. 29.

Yini ekufuze ikuqinisekise ukuthi uJehova unendaba nawe?

IBhayibheli litjengisa ukuthi wakwazi ungakabelethwa nokubelethwa. Begodu ulalela imithandazwakho. Uyazi ukuthi ucabangani, wazi nokusehliziywenakho, izinto ozenzako ziyamthinta. (1 Kron. 28:9; IzA. 27:11) Ukudosele kuye.—w20.02, k. 12.

Kunini la kufuze sikhulume khona nalapho ekufuze singakhulumi khona?

Siyakuthabela ukukhuluma ngoJehova. Siyakhuluma nasibona umuntu athoma ukukhamba endleleni emtjhingisa esonweni. Abadala bayakhuluma bona banikele isiyalo nasitlhogekako. Asikhulumi bona sifumane (namkha sinikele) ilwazi elimalungana nokuthi umsebenzethu uragwa njani eenarheni lapha ukhandelwe khona. Asikhuphi iindaba eziyifihlo.—w20.03, kk. 20-21.

Isikhonyani esikuJuweli isahluko 2 sihluke njani kulesi esikusAmbulo isahluko 9?

KuJuweli 2:20-29 uZimu uqotjha isikhonyani bese athembise ukulungisa umonakalo esiwenzileko. Ngemva kwalokho, uZimu uzokuthulula umoyakhe. Lokho kwazaliseka ngesikhathi iBhabhiloni ihlasela ama-Israyeli nangemva kwalokho. IsAmbulo 9:1-11 sifanisa abazesiweko besikhathi sethu nesikhonyani ngombana batjhumayela ngeengwebo zakaZimu malungana nephasi elimbeli, lokho kwenza abasekeli balo bangatjhaphuluki.—w20.04, kk. 3-6.

Ngubani ikosi yetlhagwini namhlanjesi?

YiRussia nabasekeli bayo. Iinqunto abazithetheko zibathinte bunqopha abantu bakaZimu, bakhandele umsebenzi wokutjhumayela bebatjengisa nehloyo ngaboFakazi. Ikosi yetlhagwini iphikisana nekosi yesewula.—w20.05, k. 13.

Inga-kghani azisekho ezinye “iinthelo zommoya” ngaphandle kwalezo ezitlolwe kuGalatiya 5:22, 23?

Zikhona. Ummoya ocwengileko usisiza sitjengise obunye ubuntu obuhle, njengokulunga. (Efe. 5:8, 9)—w20.06, k. 17.

Ngiyiphi enye ingozi ekhona ngokufaka iindaba zakho emahlelweni wezokuthintana?

Okufakileko kungakwenza ubonakale njengomuntu ozikhakhazisako, ingasi othobekileko.—w20.07, kk. 6-7.

AmaKrestu angafundani kubathiyi beemfesi abanobukghwari?

Bathiya endaweni nangesikhathi abazi kuhle bona bazokubamba iimfesi. Babandulwe bona basebenzise amathulusi afaneleko. Basebenza ngesibindi ngitjho nanyana ubujamo butjhuguluka. Singenza okufanako nemsebenzini wokutjhumayela.—w20.09, k. 5.

Khuyini engasiza umfundi weBhayibheli akhulise ithando lakhe ngoZimu?

Singabakhuthaza bona bafunde iBhayibheli begodu bazindle ngalokho abakufundako. Singabafundisa nokuthi bathandaze.—w20.11, k. 4.

Bobani okukhulunywa ngabo emezwini athi: “kuKrestu boke bazokufumana ukuphila”?—1 Kor. 15:22.

Umpostoli uPowula bekangatjho ukuthi woke umuntu ozokuvuswa. Bekakhuluma ngamaKrestu azesiweko, ‘bewasebunyeni noKrestu uJesu begodu abizelwa bona abe ngabacwengileko.’ (1 Kor. 1:2; 15:18)—w20.12, kk. 5-6.

Bazokwenzani abazesiweko ‘nabatjhugululwa ngokuphazima kwelihlo nakulila ibhorompita’?—1 Kor. 15:51-53.

Bazokuhlanganyela noJesu ekwaluseni abantu ngentonga yesimbi. (IsAm. 2:26, 27)—w20.12, kk. 12-13.