Ungathandaza Njani Bona UZimu Akuzwe?
UJehova uZimu ‘uzwa imithandazo.’ (IRhubo 65:3) Singakhuluma naye ngaso soke isikhathi kungakhathaliseki bona sikuphi begodu singakhuluma naye ngokuzwakalako namkha sikhulume naye ngehliziyo. UJehova ufuna simbize ngokuthi “Baba” begodu akekho omunye uBaba ofana naye. (Matewu 6:9) UJehova usifundisa ukuthi singathandaza njani kuye bona asizwe.
THANDAZA KUJEHOVA UZIMU USEBENZISE IBIZO LAKAJESU
“Nanibawa nanyana yini kuBaba, uzonipha yona ngebizo lami.”—Jwanisi 16:23.
Amezwi kaJesu la atjengisa ukuthi uJehova ufuna sithandaze kuye, singathandazi eenthombeni, eengilozini namkha ebantwini abahlongakeleko kodwana sithandaze ebizweni lakaJesu Krestu. Nasithandaza kuZimu sisebenzisa ibizo lakaJesu sitjengisa ukuthi siyazwisisa ukuthi uZimu uzwa imithandazwethu ngebanga lalokho uJesu asenzela khona. UJesu wathi: “Akakho oza kuBaba ngaphandle kokuthi eze ngami.”—Jwanisi 14:6.
KHULUMA NAYE NGOKUSUKA EHLIZIYWENI
“Thululani Iinhliziyo Zenu Phambi Kwakhe.”—IRhubo 62:9.
Nasithandaza kuJehova kufuze sikhulume naye njengalokha nasikhuluma nobaba onethando. Kunokuthi sitjho into etlolwe encwadini nofana esiyazi ngehloko, kufuze sikhulume naye ngokusuka ehliziyweni begodu senze njalo ngehlonipho.
THANDAZA NGOKUVUMELANA NENTANDO KAZIMU
“Nanyana yini esiyibawa ngokuvumelana nentandwakhe, uyasizwa.”—1 Jwanisi 5:14.
EBhayibhelini, uJehova uZimu usitjela ngokuthi khuyini azosenzela khona begodu usitjela nokuthi khuyini afuna simenzele khona. Imithandazwethu nayizakwamukeleka kuZimu, kufuze sithandaze “ngokuvumelana nentandwakhe.” Nasizakwenza njalo, kufuze sifunde iBhayibheli ngombana lizosisiza simazi kuhle. Nasenza njalo, imithandazwethu izomthabisa.
KHUYINI ESINGAYITHANDAZELA?
Thandazela Izinto Ozitlhogako. Singathandaza kuZimu sibawe izinto esizitlhoga qobe langa—ukudla, izambatho nendawo yokuhlala. Singathandaza sibawe ukuhlakanipha kokuthatha iinqunto ezivuthiweko namandla wokukghodlhelela iintjhijilo esiqalana nazo. Singathandazela isizo lakaZimu, ukukholwa nokulitjalelwa.—Lukasi 11:3, 4, 13; Jakopo 1:5, 17.
Thandazela Abanye. Ababelethi abathanda abantwana babo bayathaba lokha nabababona bathandana. UJehova naye ufuna bona abantwana bakhe abasephasini bathandane. Kuqakathekile ukuthandazela abantu esitjhade nabo, abantwana bethu, umndenethu nabangani bethu. Umfundi uJakopo wathi “nithandazelane.”—Jakopo 5:16.
Hlala Uthokoza. UZimu uMdalethu begodu iBhayibheli nalikhuluma ngaye lithi: ‘Ngezinto ezihle azenzako, uninikela izulu elivela ezulwini neenkhathi zenala yesivuno, ananelisa ngokudla begodu azalisa iinhliziyo zenu ngethabo.’ (IzEnzo 14:17) Nasicabanga ngalokho uZimu asenzele khona, sizokuba nesifiso sokumthokoza ngomthandazo. Kuliqiniso, kufuze sitjengise ukuthi siyamthokoza uZimu ngendlela esiphila ngayo.—Kolose 3:15.
BEKEZELA BEGODU URAGELE PHAMBILI UTHANDAZA
Ngezinye iinkhathi, singazizwa sidanile ngebanga lokungafumani ipendulo esiyilindeleko ngesikhathi esithandaza ngaso. Kghani kufuze siphethe ngokuthi uZimu akanandaba nathi? Awa, akusinjalo! Tjheja ukuthi iindaba ezilandelako ziyigandelela njani itlhogeko yokuragela phambili sithandaza.
USteve, okukhulunywe ngaye ekuthomeni uthi, “Ngathana bengingathandazi qobe, bengizokulahla ithemba lokuthi ngingalifumana godu ithabo epilweni.” Khuyini eyamsiza bona atjhuguluke? Wathoma ukufunda iBhayibheli wafunda ngokuqakatheka kokuthandaza nokuthi kubayini kufuze aphikelele emthandazweni. Nakaragako uSteve uthi: “Ngathandaza kuZimu ngamthokoza ngethando nesekelo engilifumene ebanganini bami. Nje, sengithabe khulu ukudlula ngaphambilini.”
Kuthiwani ngoJenny obekazizwa ngasuthi akasililitho kuZimu? Uthi, “Lokha nangizizwa ngingasililitho khulu, ngancenga uZimu bona angisize ngizwisise ukuthi kubayini ngizizwa ngalendlela.” Lokho kwamsiza njani? “Ukukhuluma noZimu kwangisiza ngaziqala ngendlela angiqala ngayo, ngabona nokuthi nanyana ihliziywami ingitjela ukuthi angisililitho yena akangiqali njalo. Godu kwangisiza bona ngingaphelelwa lithemba kodwana ngiragele phambili.” Waba yini umphumela? “Ukuthandaza kwangisiza ngabona ukuthi uJehova unguZimu otlhogomelako begodu unguBaba noMngani onethando, ozokuhlala angisiza lokha nangiragela phambili ngenza lokho akufunako.”
U-Isabel nakabona umntwanakhe uGerard athabela ukuphila ngitjho nanyana akhubazekile wathi: “Ngiyalemuka ukuthi uyipendulo yemithandazwami.”
Cabanga ngo-Isabel. Nakabasidisi abodorhodera bamtjela ukuthi umntwanakhe uzokubelethwa akhubazeke khulu. Wadana khulu. Abanye bamtjela ukuthi arhulule umbungu. U-Isabel uthi: “Ngazizwa ngasuthi boke ubuhlungu ebengibuzwa ehliziywenami buzongibulala.” Khuyini ayenzako? Uthi: “Ngathandaza khulu kuZimu ngambawa bona angisekele.” Ngemva kwesikhathi esithileko, wabeletha umntwana womsana ibizo lakhe nguGerard begodu wabelethwa akhubazekile. Kghani u-Isabel wezwa ngasuthi uZimu uyiphendulile imithandazwakhe? Iye! Yaphendulwa njani imithandazwakhe? U-Isabel uthi: “Nangiqala indodanami nje esele ineminyaka eli-14 ubudala, ithabela ukuphila ngitjho nanyana ikhubazekile, ngiyalemuka ukuthi iyipendulo yemithandazwami begodu isibusiso esikhulu uJehova angiphe sona.”
Amezwi amnandi la asuka ehliziyweni asenza sicabange ngamezwi womrhubi athi: “Wena Somnini, ulalela ukulangazela kwabathobileko, iye, ihliziywabo uyayikhuthaza nendlebakho uyibeke kibo.” (IRhubo 10:17) Qala ukuthi la mabanga amahle kangangani wokuragela phambili sithandaza kuZimu!
IBhayibheli inemithandazo eminengi kaJesu. Owaziwa khulu ngilo awufundisa abafundi bakhe. Khuyini esingayifunda emthandazweni loyo?