Kghani Iphaseli Lizokuphela?
Mhlamunye uyazi ukuthi iBhayibheli likhuluma ngokuphela kwephasi. (1 Jwanisi 2:17) Kghani likhuluma ngokupheliswa kwabantu? Kghani iplanethi eliphasi angekhe isaba nokuphila, izokuba mummango namkha itjhatjalaliswe ngokupheleleko?
IPENDULO YEBHAYIBHELI EMIBUZWENI LE YOMIBILI INGU-AWA!
Khuyini Engekhe Iphele?
BABANTU
IBhayibheli lithi: UZimu “Azange [iphasi] alidalele ihlangahlangano, kodwana walibumba bonyana kuhlalwe kilo.”—ISAYA 45:18.
IPLANETHI ELIPHASI
IBhayibheli lithi: “Iinzukulwana ziyafika zibuye zidlule, kodwana iphasi linzinzile nini nanini.”—UMTJHUMAYELI 1:4.
LOKHO KUTJHO UKUTHI: NgokweBhayibheli, iphasi angekhe latjhatjalaliswa begodu lizokuhlala linabantu. Yeke, litjho ukuthini nalikhuluma ngokuphela kwephasi?
CABANGA NGALOKHU: IBhayibheli limadanisa ukuphela kwephaseli nalokho okwenzeka esikhathini sakaNowa. Ngesikhatheso, iphasi “beligcwele umguruguru.” (Genesisi 6:13) Nanyana kunjalo, uNowa bekalungile. Nje-ke, uZimu wasindisa uNowa nomndenakhe kodwana watjhabalalisa abantu abambi ngomthwalela. Nalikhuluma ngalokho okwenzeka, iBhayibheli lithi: “Iphasi langesikhatheso latjhatjalaliswa lokha nalirhurhulwa mamanzi.” (2 Pitrosi 3:6) Lokho bekukuphela kwephasi. Alo, khuyini eyatjhatjalaliswako? Akusiliphasi, kodwana babantu abambi abasephasini. Nje-ke, iBhayibheli nalikhuluma ngokuphela kwephasi alikhulumi ngokutjhatjalaliswa kweplanethi, kunalokho likhuluma ngokupheliswa kwabantu abambi ephasina nezinto ezimbi abazenzileko.
Khuyini Ezokuphela?
IMIRARO NOBUMBI
IBhayibheli lithi: “Kuzakuba muzuzwana isikhohlakali singasabi khona nalokha uhlola indawaso, awusoze usasifunyana. Kodwana abathobekileko bazakuzuza inarha, bathabele ukuthula okukhulu.”—IRHUBO 37:10, 11.
LOKHO KUTJHO UKUTHI: UMthwalela wangesikhathi sakaNowa akhenge uqede ubumbi ngokupheleleko. Ngemva komThwalela, abantu abambi benza ipilo yabantu boke yababudisi godu. Nanyana kunjalo, msinyana uZimu uzokuphelisa ubumbi. Njengombana umrhubi atjho: “Isikhohlakali” angekhe sisaba khona. UZimu uzokuphelisa ubumbi ngomBuswakhe—urhulumende wephasi loke uzokubusa abantu abalungileko usezulwini.
CABANGA NGALOKHU: Labo ababusa iphasi kwanje kghani bazowamukela umBuso kaZimu? IBhayibheli litjengisa ukuthi angekhe bawamukele. Ngobudlhadlha, bazokuphikisana nomBuso kaZimu. (IRhubo 2:2) Umphumela uzokuba yini? UmBuso kaZimu uzokujamiselela boke aborhulumende babantu begodu “wona uzakujama nini nanini.” (Danyela 2:44) Kodwana kubayini ukubusa kwabantu kufuze kuphele?
ESIKUTLHOGAKO—Kupheliswa Kwemibuso Yabantu
IBhayibheli lithi: “Akusisemuntwini ukuzikhambela nokunqophisa amagadangwakhe.”—JOROMIYA 10:23.
LOKHO KUTJHO UKUTHI: Abantu abakabunjelwa bona bazibuse. Bayabhalelwa ukubusa abanye abantu nokusombulula imirarwabo.
CABANGA NGALOKHU: I-Britannica Academic ithi, aborhulumende abakghoni “ukurarulula imiraro enjengomtlhago, indlala, amagulo, iinhlekelele zemvelo, izipi namkha inturhu”. Nayiragako ithi: “Abanye . . . bakholelwa bona ngurhulumende wephasi loke kwaphela ongaletha iinsombululo zemiraro le.” Nanyana boke aborhulumende babantu bangahlangana begodu bavumelane iphasi lizabe lisabuswa babantu abanesono abangekhe bakghone ukurarulula imiraro etjhiwo ngaphezulu. MBuso kaZimu kwaphela ongurhulumende onamandla ongakghona ukurarulula imiraro yephasi loke ngokupheleleko.
Yeke ngokwalokho esikufunda eBhayibhelini, ukuphela kwephasi—kwezinto ezimbi ezenzekako—akusiyinto abantu abalungileko ekufuze bayisabe. Kunalokho, kuyinto esiqale phambili kiyo ngebanga lokuthi iphasi elimotjhakelekweli nelidala lizokujanyiselelwa liphasi lakaZimu elitjha nelihle khulu!
Kuzokwenzeka nini koke lokhu? Isihloko esilandelako sizokuhlathulula ipendulo yeBhayibheli.