Ukuzwisisa Ubuhloko Ebandleni

1. Khuyini eyenza umndeni kaJehova ube nobunye?

SIYAKUTHABELA ukuba yigcenye yomndeni kaJehova. Kubayini umndenethu unobunye nokuthula? Kungombana senza koke okusemandlenethu bona sihloniphe ilungiselelo lobuhloko elibekwe nguJehova. Ekhabo lakhona, lokha nasizwisisa kuhle indima yobuhloko, kulapho siba nobunye khona.

2. Ngimiphi imibuzo esizoyiphendula esihlokwenesi?

² Esihlokwenesi sizokucoca ngokuthi ngubani ihloko yebandla. Sibuye siphendule imibuzo nasi: Abodade badlala yiphi indima? Kghani kuliqiniso bona boke abafowethu baziinhloko zabo boke abodade ebandleni? Inga-kghani indima yabadala bebandla iyafana nendima kababa emndeninakhe? Kokuthoma, akhesicoce ngokuthi kufuze sibaphathe njani abodadwethu.

KUFUZE SIBAPHATHE NJANI ABODADWETHU?

3. Khuyini engasenza sithokoze khulu ngemisebenzi abodadwethu abayenzako?

³ Siyabathokoza abodadwethu abasebenza budisi ukutlhogomela imindenabo, batjhumayele iindaba ezimnandi bebasekele nebandla. Ukufunda indlela uJehova noJesu ababaqala ngayo kungasenza sibathokoze khulu abodadwethwaba. Kuzosisiza nokuqala indlela umpostoli uPowula abekabaphatha ngayo abodade.

4. IBhayibheli ikuveza njani ukuthi uJehova ubaqala njengaba qakathekileko abodade?

⁴ IBhayibheli iveza ukuthi abodade baqakatheke khulu kuJehova njengamadoda. Ngokwesibonelo iBhayibheli iveza ukuthi ngesikhathi sabapostoli bakaJesu, uJehova wanikela abafazi ummoya ocwengileko kunye namadoda bewabasiza nokuthi benze imikarisomraro nokukhuluma ngamalimi ahlukahlukeneko. (IzE. 2:1-4, 15-18) Iincubuthu ezimbilezi zizeswe ngommoya ocwengileko begodu zinelungelo lokuyobusa noKrestu. (Gal. 3:26-29) Amadoda kunye nabafazi bazokufumana umvuzo wokuphila ngokungapheliko ephasini. (IsAm. 7:9, 10, 13-15) Kokubili amadoda nabafazi banelungelo lokutjhumayela nokufundisa ngeendaba ezimnandi. (Mat. 28:19, 20) Incwadi yezEnzo ikhuluma ngomsebenzi kaPeresila lokha nakakhambisana nobabakwakhe u-Akhwila, basiza u-Apholo indoda efundileko ngokuyihlathululela imitlolo.—IzE. 18:24-26.

5. ULukasi 10:38, 39, 42 uveza ini malungana nombono kaJesu ngabodade?

⁵ UJesu bekabahlonipha abodade. Akhenge alingise abaFarisi ebebangabahloniphi abodade begodu bangafuni nokukhuluma nabo tjhatjhalazi, ingasaphathwa yokucoca nabo ngemitlolo. UJesu bekacoca nabo ngemitlolo njengombana bekacoca nabo boke abafundi bakhe.b (Funda uLukasi 10:38, 39, 42.) Wabavumela nokuthi bakhambe naye nakayokutjhumayela. (Luk. 8:1-3) Wabavumela nokuthi bayokutjela abapostoli bakhe ukuthi sele avusiwe kwabafileko.—Jwa. 20:16-18.

6. Umpostoli uPowula watjengisa njani ukuthi uyabahlonipha abodade?

⁶ Umpostoli uPowula wakhuthaza uThimothi bona ahloniphe abodade. UPowula wamkhuthaza ukuthi aphathe “abafazi abadala njengabomma” begodu aphathe “iintombi njengabodade.” (1 Thim. 5:1, 2) Kunengi umpostoli uPowula akwenzako ukuthi asize uThimothi abemKrestu oqinileko, nanyana kunjalo wavuma bona ngummakhe nogogwakhe abamfundisa qangi “imitlolo ecwengileko.” (2 Thim. 1:5; 3:14, 15) Lokha nakatlolela amaKrestu weRoma incwadi walotjhisa abodade bewababiza ngamagama. Akhenge atjheje imisebenzi abadade laba abayenzako kwaphela kodwana wabuye wabathokoza.—Rom. 16:1-4, 6, 12; Flp. 4:3.

7. Ngimiphi imibuzo esizokucoca ngayo?

⁷ Iingaba ezidlulileko zitjengisile ukuthi asikho isizathu esisemtlolweni esiveza ukuthi abodade abakaqakatheki ukudlula abafowethu ebandleni. Abodadwethwaba abanomusa balisizo khulu ebandleni, nabadala bathembele kibo ukuthi benze kube nokuthula ebandleni. Nanoma kunjalo, kuseseneminye imibuzo etlhoga iimpendulo. Ngokwesibonelo: Kubayini uJehova afuna abodade bathwale ehloko ngezinye iinkhathi? Njengombana kubafowethu kwaphela abathola amalungelo wokuba badala bebandla neenceku ezisizako, kghani lokho kutjho ukuthi baziinhloko zabo boke abodade ebandleni?

INGA-KGHANI BOKE ABAFOWETHU BAZIINHLOKO ZABO BOKE ABODADE EBANDLENI?

8. Ngokomtlolo webe-Efesu 5:23, inga-kghani woke umfowethu osebandleni uyihloko yabo boke abodade? Hlathulula.

⁸ Ipendulo ingu-awa! NguKrestu kwaphela oyihloko yebandla. (Funda yebe-Efesu 5:23.) Emndenini, indoda ngiyo ihloko yomfazi. Indodana nanyana ibhajadisiwe, ayisi yihloko kanina. (Efe. 6:1, 2) Ebandleni, ilawulo labadala kunalapha eliphelela khona nakuziwa kibodadwethu nabafowethu. (1 Thes. 5:12; Heb. 13:17) Abodadwethu abangakatjhadi nanyana bangasahlali nababelethi babo kufuze baragele phambili babahlonipha. Njengamadoda ebandleni, nabo banehloko yinye, uJesu.

9. Kubayini ngezinye iinkhathi kufuze abodade bathwale ehloko?

⁹ Kuliqiniso, uJehova nguye obeke amadoda bona adosephambili ekufundiseni nekulotjheni ebandleni kodwana akhenge anikele abodade isabelwesi. (1 Thim. 2:12) Kubayini? Ukwenzela bona umndenakhe uhleleke, okulibanga elifanako nalelo abeke ngalo uJesu njengehloko yebandla. Nakwenzeka udade enza isabelo ekufuze senziwe mfowethu, kufuze athwale ehloko.c (1 Kor. 11:4-7) Ngokwenza lokho, akutjho bona uJehova ubehlisa isithunzi kodwana ufuna batjengise ihlonipho, elungiselelweni lobuhloko ahlele ukuthi libekhona. Sisacabanga ngalokho, akhe siphendule naku umbuzo: Lingangani ilawulo iinhloko zomndeni nabadala abanikelwe lona?

INDIMA YEHLOKO YOMNDENI NABADALA

10. Kubayini umdala ngezinye iinkhathi angafuna ukubekela ibandla umthetho?

¹⁰ Abadala bayamthanda uKrestu bebathanda “izimvana” uJehova noJesu abazibeke ngaphasi kwabo. (Jwa. 21:15-17) Ngebanga lokuthi umdala uyalithanda ibandla kungenzeka agcine sele acabanga ukuthi ungubaba nebandleni. Njengombana akghona ukubeka umthetho ukuthi avikele umndenakhe njengehloko yomndeni, angacabanga ukuthi angabeka umthetho ebandleni ukuvikela izimvu zakaZimu. Abanye abafowethu nabodadwethu bangabawa abadala ukuthi babathathele iinqunto. Nanyana kunjalo, kghani abadala bebandla neenhloko zemindeni banelawulo elifanako?

11. Zifana ngani iindima zabadala neenhloko zomndeni?

¹¹ Umpostoli uPowula ukhe waveza ukuthi ilawulo leenhloko zemindeni linokufana kancani naleli abadala abanalo. (1 Thim. 3:4, 5) Ngokwesibonelo, uJehova ufuna umfazi nabentwana bahloniphe ubaba wekhaya. (Kol. 3:20) Ufuna amalunga webandla athobele abadala. UJehova ulindele ukuthi kokubili iinhloko zomndeni nabadala baqinisekise ukuthi laba abangaphasi kwabo baba netjhebiswano elihle naye, bebabathande. Njengeenhloko zemindeni kufuze baqiniseke ukuthi amalunga webandla ayalifumana isizo lokha nakaqalene nemiraro. (Jak. 2:15-17) Ngaphezu kwalokho, uJehova ulindele abadala neenhloko zomndeni bona basize abanengi ukuthi bathobele umthethwakhe. Nanoma kunjalo, abadala akukafaneli ‘badlulele ngale kwezinto ezitlolwe,’ eBhayibhelini.—1 Kor. 4:6.

12-13. Ngokuya ngokomtlolo webeRoma 7:2, indima yehloko yomndeni ihluke njani kweyabadala?

¹² Nanyana kunjalo kunomehluko omkhulu hlangana kwabadala neenhloko zomndeni. Ngokwesibonelo, uJehova unikele abadala amandla wokwahlulela bewabanikela nomthwalo wokususa isoni esingatjhugulukiko ebandleni.—1 Kor. 5:11-13.

¹³ Ngakelinye ihlangothi, uJehova unikele iinhloko zomndeni ilawulo angakalinikeli abadala. Ngokwesibonelo, ulindele iinhloko zomndeni ukuthi zibeke umthetho, beziqinisekise bona uyalandelwa emndeninazo. (Funda kwebeRoma 7:2.) Ihloko yomndeni inelungelo lokubeka isikhathi ekufuze abantwana babuye ngaso ekhaya, nabangawulaleli umthetho loyo unelungelo lokubakhalima. (Efe. 6:1) Ngaphambi kokuthi ihloko ibeke imithetho yangendlini, kufuze ikhulumisane nomamakwayo ngombana “bayinyama yinye.”d—Mat. 19:6.

HLONIPHA UKRESTU NJENGEHLOKO YEBANDLA

14. (a) Ngokuya ngokomtlolo kaMarkosi 10:45, kubayini kufaneleka ukuthi uJehova abeke uJesu njengehloko yebandla? (b) IsiHlopha esiBusako sidlala yiphi indima? (Qala ibhoksi elithi, “Indima YesiHlopha esiBusako.”)

¹⁴ UJehova wathenga ipilo yomunye nomunye osebandleni ngesihlengo, nawo woke umuntu otjengisa ukukholwa kuJesu. (Funda uMarkosi 10:45; IzE. 20:28; 1 Kor. 15:21, 22) Kungebangelo kufaneleka ukuthi uJehova abeke uJesu njengehloko yebandla ngombana wanikela ngokuphila kwakhe. Njengehloko yebandla, unelungelo lokubeka imithetho bekenze nesiqinisekiso sokuthi siyayilandela emindenini nebandla. (Gal. 6:2) UJesu akasibekeli imithetho kwaphela, uyasitlhogomela bekasithande.—Efe. 5:29.

15-16. Khuyini esingayifunda kilokhu okutjhiwo ngudadwethu uMarley nomfowethu uBenjamin?

¹⁵ Abodadwethu batjengisa ukuthi bayamhlonipha uKrestu ngokuthi balalele zoke iinqophiso abazithola emadodeni abekwe nguJehova bona abatlhogomele. Abodadwethu abanengi bavumelana nalokhu okutjhiwo nguMarley ohlala United States nakathi: “ Ngikuqala njengento eqakatheke khulu ukubamfazi nodade ebandleni. Kufuze ngihlale ngisebenza budisi bona ngithobele imithetho uJehova ayibekileko, malungana nokuhlonipha ubabakwami nabadala. Ubabakwami kuhlanganise nabafowethu ebandleni bakwenze kwabalula kimi lokho ngombana bayangihlonipha bebatjengise nokuthi bayangithokoza ngomsebenzi engiwenzako.”

¹⁶ Abafowethu batjengisa ukuthi bayalizwisisa ilungiselelo lobuhloko elenzwe nguJehova ngokuthi bahloniphe bebathokoze abodadwethu ngalokho abakwenzako. Umfowethu uBenjamin ohlala e-England uthi: “Kunengi engikufundileko endleleni abodadwethu abaphendula ngayo esifundweni nangendlela abaraga ngayo iimfundo esimini. Umsebenzi abawenzako lo uqakatheke khulu.”

17. Kubayini kufuze sihloniphe ilungiselelo lakaJehova lobuhloko?

¹⁷ Lokha woke umuntu osebandleni kuhlanganise amadoda, abafazi, iinhloko zemindeni nabadala nabazwisisa kuhle bebahloniphe ihlelo lakaJehova lobuhloko, ibandla liba nethabo nokuthula. Okuqakatheke ukudlula koke, sisuke siphazimulisa uBabethu weZulwini uJehova.—Rhu. 150:6.