Ukuvuselela Ubungani Bakho NoJehova

QOBE mnyaka, zinengi izimvu eziligugu ezibuyiselwako ebandleni lobuKrestu. Cabanga ‘ngethabo elikhulu ezulwini’ eliba khona qobe nakubuya imvu yinye! (Luk. 15:7, 10) Nawuqeda ukubuyiselwa ingasikade, ungaqiniseka ukuthi uJesu, iingilosi noJehova bathabe khulu ukuthi uyingcenye yebandla godu. Nanyana kunjalo, njengombana uvuselela ubungani bakho noJehova, kungenzeka uqalane neentjhijilo. Ngiziphi ezinye zazo begodu khuyini engakusiza uphumelele?

NGIZIPHI IINTJHIJILO ONGAQALANA NAZO?

Abafowethu nabodadwethu balwisana namazizo angakhiko ngemva kokubuyiselwa ebandleni. Kungenzeka uyizwisisa kuhle indlela iKosi uDavida ebeyizizwa ngayo. Ngitjho nangemva kokulitjalelwa izono zakhe, wathi: ‘Iimphambeko zethu ziyasidisibeza.’ (Rhu. 40:13; 65:4) Ngemva kobana othileko abuye kuJehova, angazizwa anomlandu namkha aneenhloni isikhathi eside. U-Isabelle, owasuswa iminyaka engaphezu kweyi-20.a Wathi, “Ngakufumana kubudisi khulu ukwazi ukuthi uJehova angangilibalela.” Nawudanako, lokho kungabogabogisa itjhebiswano lakho noZimu. (IzA. 24:10) Ungakuvumeli kwenzeke lokho kuwe.

Abanye batshwenywa kukuthi kunengi khulu ekufuze bakwenze nabazakulungisa itjhebiswano labo noJehova. Ngemva kokubuyiselwa, u-Antoine wathi, “Ngazizwa ngasuthi ngikulibele koke okuphathelene nobuKrestu.” Ngebanga lokuzizwa ngendlela le, abanye bayazaza ukwenzela uJehova okunengi.

Ngokwesibonelo, nange indlu yothileko yonakaliswa siwuruwuru, angaphelelwa mamandla nakacabanga ngomsebenzi omkhulu nesikhathi esizokutlhogeka ukuyivuselela. Ngendlela efanako, nangabe ubungani bakho noJehova bonakele khulu, ungazizwa ngasuthi kunengi khulu ekufuze ukwenze bona ubuvuselele. Likhona isizo.

UJehova uyasimema uthi: “Seningeza-ke, sikhulumisane.” (Isa. 1:18) Bekube nje, sele usebenze budisi “ukukhulumisana” noJehova. UZimu ukuthanda khulu ngalokho. Ngebanga lokuthi ubuyele kuJehova, angakusebenzisa ukutjengisa ukuthi uSathana unamala!— IzA. 27:11.

Ngokwenza lokhu, sele uthomile ukutjhidela kuJehova begodu naye uthi uzokutjhidela kuwe. (Jak. 4:8) Kuhle ukuthi abanye bakubone bona sewubuyile ebandleni kodwana kutlhogeka okungaphezu kwalokho. Kutlhogeka urage nokuqinisa ithando lakho ngoBabakho noMnganakho, uJehova. Ungakwenza njani lokhu?

ZIBEKELE IMINQOPHO ONGAYIFIKELELA

Linga ukubeka iminqopho engasibudisi khulu. Kungenzeka usawakhumbula amaqiniso asisekelo owawafunda ngoJehova nangeenthembiso zakhe. Nanyana kunjalo, nje utlhoga ukuphila njengomKrestu, okuhlanganisa ukutjhumayela, ukuya esifundweni nokuba nesikhathi nabafowenu nabodadwenu. Ungazibekela imigomo nasi elandelako.

Khuluma noJehova qobe. UBabakho wezulwini uyazwisisa ukuthi kungenzeka ulokhu unemizwa yomlandu bewukufumane kubudisi ukuthandaza kuye. (Rom. 8:26) Nanyana kunjalo, ‘phikelela emthandazweni,’ utjele uJehova ngendlela ofuna ngayo ukuba mnganakhe. (Rom. 12:12) U-Andrej nakakhumbulako, uthi: “Ngazizwa nginomlandu omkhulu begodu ngineenhloni. Qobe ngemva komthandazo, amazizo layo bekehla. Bengizizwa nginokuthula.” Nawungazi ukuthi uthandazele ini, cabangisisa ngemithandazo yeKosi eyatjhugulukako uDavida etlolwe kumaRhubo 51 no-65.

Funda iBhayibheli qobe. Lokho kuzokusiza ukuthi ube nokukholwa begodu ithando lakho ngoJehova lizokukhula. (Rhu. 19:7-11) U-Felipe wathi: “Ukungabi nehlelo lokufunda iBhayibheli, kwabogabogisa itjhebiswano lami noZimu bekwangenza ngamdanisa. Bengingafuni ukudanisa uJehova godu, ngalokho ngenza ukuzifundela iBhayibheli kwaba sivikelo sami.” Nawe ungenza okufanako. Nange utlhoga isizo lokuthi ngiziphi iinhloko ongazifunda, kubayini ungabawi umngani ovuthiweko ukuthi akusize?

Vuselela ubungani bakho nabafowenu nabodadwenu. Abanye ababuyela ebandleni bangatshwenyeka ngokuthi abanye ebandleni bangabaqala kumbi. U-Larissa uthi: “Bengineenhloni. Bengizizwa ngasuthi ngibazwise ubuhlungu abafowethu nabodadwethu. Amazizo la ahlala isikhathi eside.” Ungaqiniseka ukuthi abadala namaKrestu avuthiweko bazimisele ukukusiza uvuselele itjhebiswano lakho noZimu. (Qala ibhoksi elithi “Khuyini Abadala Abangayenza?”) Bathabe khulu ukuthi ubuyile begodu bafuna ukuthi uthabe!—IzA. 17:17.

Khuyini engakwenza utjhidelane nebandla? Iba khona esifundweni bewuzijayeze ukukhamba namanye amaKrestu esimini. Kuzokusiza njani lokhu? U-Felix wathi: “Ibandla beliqale phambili ekubuyeni kwami. Ngazizwa ngithandwa. Bangisiza ngazizwa ngililunga lomndeni godu, ngilitjalelwe begodu ngikghone ukuragela phambili ngilotjha uJehova.”—Qala ibhoksi elithi “Khuyini Ongayenza?”

UNGAPHELI AMANDLA!

USathana uzokuragela phambili akubekela iintjhijilo ezizokuzama ukubogabogisa imizwamwakho yokuvuselela itjhebiswano lakho noJehova. (Luk. 4:13) Zilungiselele ngokuthi uragele phambili uqinisa itjhebiswano lakho noJehova.

Malungana nezimvu zakhe, uJehova uthembisa ukuthi: “Ngizakufuna ezilahlekileko, ngibuyise ezidurhileko ngibophe ezilimeleko, ngiqinise ezigulako.” (Hez. 34:16) UJehova usize abanengi bona bavuselele itjhebiswano naye. Qiniseka bona ufuna ukukusiza ukuthi urage nokwakha itjhebiswano eliqinileko naye.

Khuyini Abadala Abangayenza?

Abadala badlala indima ekulu ekusizeni ababuyiselwe ebandleni bavuselele itjhebiswano labo noJehova. Naku abangakwenzela ababuyiselweko.

Baqinisekise. Umpostoli uPowula bekazi bona isoni esitjhugulukileko ‘singahlulwa kudana okudluleleko.’ (2 Kor. 2:7) Singazizwa sineenhloni. U-Powula wathi: “Nimlibalele ngomusa begodu nimduduze.” Ababuyiselwe ebandleni batlhoga ukuqinisekiswa ukuthi uJehova namaKrestu akunye nabo babathanda kwamambala. Abadala nabababuka qobe begodu babasiza, kungabenza ukuthi bangapheli amandla.

Thandaza nabo. “Ukurabhela komuntu olungileko kunomphumela onamandla” (Jak. 5:16) U-Larissa, ekhesakhuluma ngaye, uthi: “Ngatjela abadala ngokuzaza nokusaba ebenginakho. Bathandaza nami. Lokho kwangenza ngazwisisa ukuthi abadala bebangakangikwateli. Bebafuna ukungisiza ngilungise ubuhlobo bami noJehova.” U-Theo uthi: “Imithandazo yabadala yangenza ngaqiniseka ukuthi uJehova ungithanda khulu begodu ubona okuhle kimi, ingasi okumbi kwaphela.”

Yakha ubungani nabo. Ababuyiselwe ekuhlanganyeleni batlhoga abangani ebandleni. U-Justin, ongumdala, uthi: “Funa amathuba wokubamema nawutjhumayelako begodu ubavakatjhele la bahlala khona. Ubungani buqakatheke khulu.” Omunye umdala u-Henry, uthi, “Abanye ebandleni nababona abadala benza ubungani nalaba abasanda ukubuyiselwa, nabo bazokwenza okufanako.”

Basize bafunde iBhayibheli. Umngani ovuthiweko angasiza umuntu obuyiselweko ukuthi abe nehlelo elihle lokufunda iBhayibheli. U-Darko, ongumdala, uthi: “Ngiyathanda ukucoca ngamaphuzu aqakathekileko engiwafumene esifundweni sami somuntu mathupha nokuthi kungithabisa kangangani ukufunda iBhayibheli. Vane ngihlele nokufunda nabo iinhloko ezikhuthazako.” U-Clayton, naye ongumdala, uthi: “Ngibakhuthaza ukuthi bafunde ngeembonelo eziseBhayibhelini zabantu ebebaqalene nobujamo obufana nebabo.”

Yiba ngumelusi omuhle. Ababuyiselwe ekuhlanganyeleni bebanabadala nabasuswako. Njengombana sele babuyiselwe, batlhoga ukuthi abadala babe belusi abahle kibo. (Jor. 23:4) Balalele begodu ubabuke. Hlala ukhuluma nabo. Tjheja lokho u-Marcus akwenzako nakakhambela ukwelusa, uthi: “Sicoca ngemiTlolo, sibabuke besibaqinisekise ukuthi siyazikhakhazisa ngabo begodu noJehova uyazikhakhazisa ngokuzimisela kwabo ukubuyela ebandleni. Ekupheleni kwevakatjho lethu, sihlela ilanga esizokubuya ngalo.”

a Amagama atjhugululiwe.