INDLELA YOKUHLULA IHLOYO

4 | Hlula Ihloyo Ngesizo Lakazimu

IBhayibheli Ithi:

“Iinthelo zommoya zilithando, ithabo, ukuthula, ukubekezela, umusa, ubuhle, ukukholwa, ukuba nommoya ophasi, ukuzibamba.”—GALATIYA 5:22, 23.

Lokho Kutjho Ukuthini:

Kuyakghoneka ukuhlula ihloyo ngesizo lakaJehova. Ummoya ocwengileko ungasenza ukuthi sibe nobuntu thina engeze saba nabo ngamandlethu. Nje-ke, kunokulinga ukuhlula ihloyo ngamandlethu senza kuhle ngokuthembela esizweni esilifumana kuZimu. Nasenza njalo, singazizwa njengompostoli uPowula, owatlola wathi: “Nginamandla kikho koke ngebanga lalowo ongipha amandla.” (Filipi 4:13) Kwamambala, sizokukghona ukutjho sithi: “Isizo lami livela kuJehova.”—IRhubo 121:2.

Lokho Ongakwenza:

“UJehova ungisizile ngalisa ukuba yindoda enenturhu ngaba yindoda enokuthula.”—U-WALDO

Thandaza kuJehova, ngokusuka ehliziyweni umbawe bona akuphe ummoyakhe oCwengileko. (Lukasi 11:13) Mbawe akusize ube nobuntu obufana nebakhe. Funda ngalokho iBhayibheli elikutjhoko ngokuba nobuntu obuphikisana nehloyo, njengethando, ukuthula, ukubekezela, nokuzibamba. Funa iindlela ongatjengisa ngazo ubuntobo ekuphileni kwakho. Ube nabangani abalwela ukuba nobuntu obunjalo. Abangani abanjalo bangakusiza ‘ukuthi uvuselele ithando nemisebenzi emihle.’—Hebheru 10:24; umtlolo waphasi.

Indaba Eyenzekileko—U-WALDO

Wahlula Ihloyo Nenturhu

U-Waldo wakhula kabuhlungu okwambangela ukuthi abe nehloyo. Uthi: “Bengihlala ngilwa nabantu abathengisa iindakamizwa. . . Ngelinye ilanga, isiqhema ebengilwa naso sangithengela umuntu bona angibulale, kodwana ngaphunyurha nenceba lokuhlatjwa.”

U-Waldo akhenge athabe lokha umkakhe nakathoma ukufunda iBhayibheli naboFakazi bakaJehova. Uthi: “Bengibahloya aboFakazi begodu kanengi bengibathuka. Kodwana bebahlala bangiphendula ngommoya ophasi.”

Ekukhambeni kwesikhathi, u-Waldo naye wathoma ukufunda iBhayibheli. Uthi: “Bekungasilula ngaso soke isikhathi ukusebenzisa ebengikufunda. Bengiqiniseka ukuthi angeze ngakghona ukulawula indlela engisilingeka ngayo.” Kodwana lokho akufunda eBhayibhelini kwenza umehluko omkhulu.

U-Waldo uyahlathulula: “Ngelinye ilanga umuntu ongifundelako, u-Alejandro, wathi ngifunde kwebeGalatiya 5:22, 23. . . . U-Alejandro wahlathulula ukuthi ubuntobu angekhe ngakghona ukuba nabo ngamandlami, kodwana uZimu uzongisiza ngommoyakhe oCwengileko. Iqiniswelo latjhugulula indlela engibona ngayo izinto!”

Ngokuthembela esizweni lakaZimu, u-Waldo ukghonile ukulisa ukuhloya abanye abantu. Uthi: “Iinhlobo zami nabangani bami bakade aziyikholwa indlela engitjhuguluke ngayo.” Ungezelela ngokuthi: “UJehova ungisizile ngalisa ukuba yindoda enenturhu ngaba yindoda enokuthula.”