Kghani Bewazi?
Inga-kghani amaRoma bewangakuvumela ukubulungwa okujayelekileko komuntu onjengoJesu abambethela esigodweni sokuhlunguphazwa?
INENGI lijayelene nendaba kaJesu yokuthi waphanyekwa hlangana neenlelesi ezimbili begodu wabulawa esigodweni. (Mat. 27:35-38) Abanye abantu bathi iBhayibheli alikanembi nalithi umzimba kaJesu walungiselelwa ukubulungwa begodu wafakwa ethuneni.—Mar. 15:42-46.
Ezinye izazi zeBhayibheli ziyakuzaza ukuthi umuntu owabulawa njengoJesu wavunyelwa bona abulungwe ngendlela ejayelekileko bekafakwe nethuneni. Bakholelwa ukuthi labo ababulawa njengabantu abaphula umthetho bebabulungwa ngendlela ehlukileko. Umbiki weendaba u-Ariel Sabar, nakatlola kumagazini i-Smithsonian uhlathulula bona kubayini abantu banombono onjalo: “Ukubulawa bekusijeziso ebesinikelwa abantu abambi khulu emphakathini begodu ezinye izazi zithi kuyinto ehlekisako ukucabanga bona amaRoma bewangavuma bona abantu abanjalo babulungwe ngendlela ehloniphekileko nejayelekileko.” AmaRoma bewafuna ukuhlazisa iingebengu ngendlela ezidlula zoke, yeke bebalisa imizimbazo esigodweni ukwenzela bona izinja zommango zizidle bese kuthi iinsalela zakhona ziphoselwe ethuneni elijayelekileko.
Zomlando zivele nokuthileko okuhlukileko, khulukhulu ngamathambo wamaJuda abulawako. Ngo-1968, kwagujwa amathambo wendoda ethileko eyaphila ngesikhathi sakaJesu. Amathambo la afunyanwa ethuneni lomndeni wamaJuda eduze kweJerusalema. Amathambo la bewasebhoksini lamathambo. Ebhoksinelo kwafunyanwa ithambo lesithende. Labethelwa ngesipikiri ebhodini leplanka, ispikireso sangena ngamamitha ayi-11.5 (4.5 in.) USabar uthi, “Isithende esafunyanwako besingesendoda ibizo layo linguYehochanan.” Uraga uthi, “Lokhu kwasiza ekulungiseni ipikiswano ebesele kusikhathi eside ikhona malungana nokulandisa kwezenzakalo eziseBhayibhelini ngethuna uJesu abulungelwa kilo.” Kuyakhanya ukuthi “isithende sakaYehochanan saba sibonelo sokuthi amaRoma bewavumela umJuda obulewe ngokubethelwa ukuthi abulungwe.”
Kungenzeka kusesenemibono eminengi ehlukahlukeneko ngalokho okungahlathululwa lithambo lesithende kunye nokuphanyekwa kwakaJesu esigodweni. Okukhanyako kukuthi abanye abantu abaphula umthetho ababulawako babulungwa begodu khenge balahlelwe ethuneni elijayelekileko. Kwamambala, lokho iBhayibheli elikutjhoko ngokuthi umzimba kaJesu wabulungwa ethuneni kunembile. Ubufakazi busekela lokho okutjhiwo liBhayibheli ngokulungiselelwa komzimba kaJesu bona uyokubulungwa ethuneni.
Okuqakatheke khulu kukuthi uJehova wabikezela ukuthi uJesu uzokubulungwa ethuneni lomuntu onjingileko begodu akunamuntu ongakhandela ukuzaliseka kweliZwi laZimu.—Isa. 53:9; 55:11.