Iinthombe zesiteji namatjhadi amakhulu phezulu
1922 Iminyaka Elikhulu Eyadlulako
‘UZimu . . . usinikela . . . ukuhlula . . . ngoJesu Krestu.’ (1 Kor. 15:57) Amezwi la bekumTlolo womnyaka ka-1922, begodu aqinisekisa abaFundi beBhayibheli ngokuthi bebazokufumana umvuzo ngebanga lokukholwa kwabo. UJehova wabavuza abatjhumayeli abakhuthelekwaba. Wababusisa njengombana bebathoma ukugadangisa nokugubuzesa iincwadi zabo bathoma nokusebenzisa umrhatjho bona barhatjhe iqiniso lomBuso. Ngokukhamba kwesikhathi ngo-1922, kwakhanya godu ukuthi uJehova uyababusisa abantu bakhe. AbaFundi beBhayibheli bakghona ukuthi bahlangane ndawonye emhlanganweni owenza umlando ebewuseCedar Point, Ohio, ye-U.S.A. Okwenzeka emhlanganweni loyo kwathinta ihlangano kaJehova kusukela mhlokho bekube nje.
“UMBONO OKARISAKO”
Njengombana isibalo sabantu abatjhumayelako besikhula netlhogeko yeencwadi zokufundisa beyikhula. Abafowethu beBethel yeBrooklyn bebabagadangisa abomagazini kodwana bebathembele emakhampanini wangaphandle bona abasize ngeencwadi zesigubuzeso esiqinileko. Ngemva kokobana besekundlule iinyanga ezinengana ikhampani ingasakghoni ukugadangisa iincwadi, umsebenzi wokutjhumayela wathinteka, yeke, umfowethu uRutherford wabuza uRobert Martin obekamphathi wefekthri ukuthi bangakghona na ukuzigadangisela iincwadi.
Isitrada iConcord la kunefekthri eBrooklyn, yeNew York
Umfowethu uMartin uthi, “bekumbono okarisa tle! Ngombana lokho bekutjho ukuthi besizokuba neyethu iindawo ezokugadangisa iincwadi. Abafowethu bafumana indawo e-18 Concord street yeBrooklyn begodu bafumana neensetjenziswa ezitlhogekako.
Akusingiwo woke umuntu owathatjiswa ziindaba ezihlezi. Umongameli wekhampani ebeyisenzela iincwadi wavakatjhela isakhiwo sethu esitjha. Nakafikako wathi: “Ninomtjhini omuhle ophuma phambli wokugadangisa kodwana akekho namunye kinapha okwazi ukuwusebenzisa, enyangeni ezisithandathu umtjhini lo uzobe ungasasebenzi.”
Umfowethu uMartin uthi “lokho kwazwakala kunegqondo kodwana wakhohlwa iKosethu beyisoloko inathi.” Umfowethu uMartin bekaqinisile. Kungasikade umtjhini omutjha wathoma ukugadangisa iincwadi ezi-2 000 ngelanga.
Abasebenza ngomtjhini bajame hlanu kwemitjhini yelinotype efekthri
UKUFIKELELA IINKULUNGWANA NGOMRHATJHO
Ngaphezu kokugadangisa iincwadi zabo abantu bakaJehova bathoma ukusebenzisa indlela etja yokurhatjha iindaba ezimnandi, ukusebenzisa umrhatjho. Ngosondo ntambama, ngoFebherbari 26, 1922, umfowethu uRutherford wakhuluma emrhatjhweni kokuthoma. Wathula ikulumo enesihloko esithi “Millions Now Living Will Never Die” esitetjhini somrhatjho i-KOG eLos Angeles, California, ye-U.S.A.
Isilinganiso sabantu abangaba zii-25 000 bebalilalele ihlelweli. Abanye babo bathumela iincwadi baveza iindlela abathokoza ngayo ngokuzwa ikulumo le. Enye yeencwadi ezathunyelwako beyivela kuWillard Ashford isakhamuzi seSanta Ana yeCalifornia. Wathokoza umfowethu uRutherford “ngekulumo ehle nemnandi ayibekako.” Wangezelela wathi: “Njengombana nginabantu abathathu abagulako ngendlini bengeze kwaba bulula bona siyizwe ikulumo le ngaphandle kokuyilalela emrhatjhweni, ngitjho nanyana bekuthiwa useduze.”
Kwaba neenkulumo ezinengi ezirhatjhwako eenvekeni ezalandelako. Kwathi ekupheleni komnyaka ka-1922, IsiThala salinganisela ukuthi “okungenani abantu abazizii-300 000 bafumana iindaba ezimnandi ngomrhatjho.”
Bakhuthazwe yindlela abantu abasabela ngayo, abaFundi beBhayibheli baqunta ukwakha isitetjhi somrhatjho endaweni ebizwa ngokuthi yiStaten Island engasikude neBethel yeBrooklyn. Emnyakeni eyalandelako abaFundi beBhayibheli basebenzisa isitetjhesi i-WBBR bona barhatjhe umlayezo womBuso eendaweni ezinengi.
“ADV”
NgoJuni 15, 1922, isihloko sesiThala samemezela ukuthi kuzokuba nomhlangano ozokubanjewa eCedar Point, Ohio, kusukela ngoSeptemba 5 kuya ku-13, 1922. AbaFundi beBhayibheli bebathabe kwamambala kangangokuthi babuthelana eCedar Point.
Ekulumwenakhe yokuthoma umfowethu uRutherford watjela iinlaleli wathi: “Ngiyaqiniseka begodu angizazi nakancani ukuthi iKosi . . . izowubusisa umhlangano lo, beyithumele nobufakazi obungakhenge khebube khona ephasini.” Iinkhulumi emhlanganweni lo nazo zagandelela khulu ukuqkatheka komsebenzi wokutjhumayela.
Isiqubuthu sisemhlanganweni wango-1922 eCedar Point, Ohio
Kwathi ngeLesihlanu Septemba 8, abantu abangaba zizii-8 000 bangena endaweni yomhlangano begodu bebathabele ukuzwa ikulumo kamfowethu uRutherford. Bebaqale phambili ukuzwa nakahlathulula ukuthi atjhoukuthini amaledere athi, “ADV” ebewatlolwe emaphetjhaneni wemmemo ebebawaphethe. Njengombana bebasahlala phasi akunakuzaza ukuthi abanye batjheja amatjhadi amakhulu ebewasendaweni yesikhulumi. U-Arthur Claus obekaye emhlanganweni asuka eTulsa, Oklahoma, ye-U.S.A., wafumana isitulo endaweni ebeyivumela bona akghone ukuzwa kuhle ngombana ngesikhatheso bekungasetjenziswa iinkhulisazwi.
“Besilalelisise kuhle.”
Bona aqinisekise ukuthi akunasiphazamiso, usihlalo wamemezela ukuthi akunamuntu ozokufika lada ozokuvunyelwa ukungena endaweni yesikhulumi lokha umfowethu uRutherford nakanikela ikulumwakhe. Ngo 9:30 ekuseni umfowethu uRutherford wathoma ngokudzubhula amezwi kaJesu afumaneka emtlolweni kaMatewu 4:17: “UmBuso wezulu utjhidele.” Wathi nakacoca ngendlela abantu abazowuzwa ngayo umlayezo womBuso: “UJesu ngokwakhe wathi ngesikhathi sokuba khona kwakhe kuzokuragwa ihlelo lokubuthelelwa kwabantu, yena ngokwakhe uzokubuthelela abantu abathembekileko nabaneqiniso.”
Umfowethu uClaus, obekahleli ngaphakathi ewolweni uyakhumbula: “Besilalelisise kuhle.” Kungakalindeleki wazizwa agula kwatlhogeka bona aphume ewolweni. U-Arthur waphuma ewolweni nanyana bekangafuni, bekazi bonyana angeze avunyelwe bona abuyele ngaphakathi.
Ngemva kwemizuzu embalwa wazizwa angcono. Uthi njengombana bekabuyela emuva ewolweni wezwa itjhada elikhulu lokuwahlwa kwezandla. Lokho kwamthabisa khulu! Waqunta ukuthi akhuphuke aye ephahleni ukwenzela bona ezwe yoke ikulumo emnandi. Umfowethu uClaus obekaneminyaka ema-23 ngesikhatheso, wayifumana indlela yokukhuphuka asebenzisa iboda ngitjho nanyana kwafuze akhuphuke iboda elide ngamamitha amane, waphumelela! Phezulu iphahla belivulekile begodu bekukhanya kuhle, njengombana atjhidela walemuka ukuthi “bekuzwakala kuhle.”
U-Arthur bekangasiyedwa. Abanye babangani bakhe bebasephahleni. Omunye wabo uFrank Johnson, watjhidela kuye wambuza wathi, “Kghani unawo umukhwa osika kuhle ngesikhwameni sakho?”
U-Arthur wathi, “Nginawo.”
UFrank waphendula wathi: “Uyipendulo yemithandazwethu,” “Uyawabona amatjhadi amakhulu la asongiweko? Njengombana abotjhwe kuhle. Mlalelisise kuhle umaHluleli.a Lokha nakathi, ‘Kufuze nikhangise, nikhangise,’ usike iintambo ezine ezibambe itjhadeli.”
Yeke, u-Arthur aphethe umukhwa ngesandla akunye nabangani bakhe bebalinde itshwayo elizokutjengisa bona sele kusikhathi sokusika iintambo. Kungasikade umfowethu uRutherford wafika engcenyeni ekhethekileko yekulumwakhe. Aphethwe mimizwa yetjiseko nekuthalo kungenzeka bona warhuwelela kwazwakala wathi; “Yibani boFakazi abathembekileko nebeqiniso beKosi, ragelani phambili epini beniveze ukuthi iBhabhiloni yikolo yamala. Rhatjhani umlayezo kude naseduze. Iphasi kufuze lazi ukuthi uJehova unguZimu, nokuthi uJesu Krestu yiKosi yamakhosi. Namhlanjesi lilanga elikhethekileko ukundlula woke amalanga. Tjhejani iKosi iyabusa. Ninikelwe umsebenzi wokobana nimemezele kiwo woke umuntu. Yeke, khangisani, khangisani, khangisani iKosi nomBuswayo!”
U-Arthur uthi yena nabanye abafowethu basika iintambo ebezibambe itjhadi elikhulu, begodu itjhadelo lavuleka kuhle khulu kwavela amaledere athi, “ADV,” itjhadelo belithi: “Khangisani iKosi nomBuswayo.”(i-ADV bekumaledere wesingisi arhunyeza amezwi amlayezo athi, ‘khangisani’ aveza umqondo wokutjhumayela namkha ukunikela ubufakazi.)
UMSEBENZI OQAKATHILEKO
Umhlangano ebewuseCedar Point wasiza abafowethu bona bandzimelele emsebenzini oqakathekileko wokutjhumayela ngomBuso begodu labo ebebazimisele ngokusebenza bathaba khulu ukuba nengcenye emsebenzini lo. Icolporteur (nje eyaziwa ngokuthi liphayona) lase-Oklahoma, ye-U.S.A. latlola lathi, “Isifunda ebesisitjhumayela besisendaweni yamalahle begodu abantu bebatlhage khulu lapho.” Uthi qobe abantu nabezwa umlayezo ebebawufumana kumagazini iGolden Age “bebalila.” Uphetha nganasi indlela, “Kuyisibusiso ukubaduduza.”
AbaFundi beBhayibhelaba bakubona ukurhaba kwamezwi kaJesu afumaneka kuLukasi 10:2: “Isivuno sikhulu kodwana iinsebenzi ziimbalwa.” Njengombana bekuphela umnyaka bebazimisele kunangaphambilini ukukhangisa umlayezo womBuso eendaweni ezikude nezisemaphandleni.
a Umfowethu uRutherford ngezinye iinkhathi bekabizwa ngokuthi ‘ngumaHluleli’ ngombana ngezinye iinkhathi bekasebenza njengomaHluleli okhethekileko eMissouri, ye-U.S.A.