Qinisa Ithemba Lakho NjengomKrestu

1. Ngiliphi ithemba uJehova asinikele lona?

UJEHOVA usinikele ithemba elikarisako lokuphila ngokungapheliko. Abanye banethemba lokuphila ngokungapheliko ezulwini njengeendalwa zommoya. (1 Kor. 15:50, 53) Inengi lethu sinethemba lokuphila ngokungapheliko ephasini sinepilo ehle begodu sithabile. (IsAm. 21:3, 4) Akunandaba bona siqale phambili ekuphileni ngokungapheliko ezulwini namkha ephasini, ithemba lethu liligugu kithi.

2. Ithemba lethu lisekelwe kuphi, begodu kubayini sitjho njalo?

² Igama elithi, “ithemba” njengombana lisetjenziswe eBhayibhelini, lingahlathululwa ngokuthi, “Kulindela ukwenzeka kwezinto ezihle.” Ithemba lethu ngengomuso liqinisekile ngombana livela kuJehova. (Rom. 15:13) Siyazi bona khuyini asithembise khona begodu siyazi ukuthi uhlala awazalisekisa amezwakhe. (Num. 23:19) Siyaqiniseka ngokuthi uJehova unamandla nesifiso sokuzalisekisa iinthembiso zakhe. Ithemba lethu aliksekelwa entweni esingayaziko namkha eemfisweni kwaphela; lisekelwe ebufakazini bamambala.

3. Sizokucoca ngani esihlokwenesi? (IRhubo 27:14)

³ UBabethu wezulwini uyasithanda begodu ufuna simthembe. (Funda IRhubo 27:14.) Ithemba lethu kuJehova naliqinileko, sizokukghona ukukghodlhelelela iinlingo begodu sizokuqala ingomuso sinethemba begodu sithabile. Akhesicoce ngokuthi ithemba lethu lisivikela njani. Ngaphambi kobana senze njalo, sizokuthoma ngokubuyekeza ukuthi ithemba lethu lifana njani ne-ankere kunye nekoporo. Ngemva kwalokho, sizokucoca ngokuthi singaliqinisa njani ithemba lethu.

ITHEMBA LETHU LINJENGE-ANKERE

4. Ithemba lethu linjenge-ankere ngamuphi umqondo? (Hebheru 6:19)

⁴ Encwadinakhe ayitlolela beHebheru, umpostoli uPowula wafanisa ithemba lethu ne-ankera. (Funda amaHebheru 6:19.) UPowula bekajayele khulu ukukhamba elwandle, yeke bekazi ukuthi umsebenzi we-ankere kudzimelelisa umkhumbi bona ungaphetjhulwa mumoya. Kobunye ubujamo, bekakhwele isikepe nakuzakuvela isiwuruwuru esinamandla. Hlangana nesiwuruwureso, wabona abakhweli besikepe baphosela ama-ankera ngemanzini ukwenzela bona isikepe singaphahlazeki emadwaleni ayingozi. (IzE. 27:29, 39-41) Ithemba lethu lidzimelele, kwenzela bona singaphetjhulwa, sisuke kuJehova lokha nasiqalene neentjhijilo ezinjengeenwuruwuru ezinamandla. Ithemba lethu elidzimeleleko lisisiza sikghone ukuba nomoya ophasi lokha nasiqalana neentjhijilo ngombana siyazi ingasikade, kuzokufika iinkhathi ezingcono. Okhunye okufuze sikukhumbule kukuthi uJesu wasiyelelisa ngokuthi sizokuhlunguphazwa. (Jwa. 15:20) Yeke, ukuhlale sicabangisisangengomuso nangomvuzo esizowufumana, kwenza sikghone ukuba maKrestu aqinileko.

5. UJesu wadzimelela njani ethembeni lokha nakaqalene nokufa?

⁵ Tjheja bona uJesu wahlala njani adzimelele nanyana bekazi ukuthi uzokufa ukufa okubuhlungu. Ngelinye ilanga ngePentekoste laka-33 C.E., umpostoli uPitrosi wadzubhula isiphorofido encwadini yamaRhubo esihlathulula kuhle indlela uJesu ebekaqiniseka ngayo begodu anommoya ophasi: “Mina ngizokuhlala ethembeni; ngombana angeze ungitjhiye eThuneni, namkha uvumele othembekileko wakho abone ukonakala. . .  uzongenza ngithabe khulu phambi kobuso bakho.” (IzE. 2:25-28; Rhu. 16:8-11) Nanyana uJesu bekazi ukuthi uzokuhlongakala, bekanethemba eliqinileko lokuthi uZimu uzomvusa begodu uzokuthabela ukuhlangana noBabakhe ezulwini godu.—Heb. 12:2, 3.

6. Omunye umfowethu wathini malungana nethemba?

⁶ Ithemba lethu njengamaKrestu lisize abafowethu nabodadwethu bakghodlhelela. Akhesicoce ngesibonelo sakaLeonard Chinn, umfowethu othembekileko we-England. Hlangana nePi yePhasi yokuThoma wavalelwa ngejele ngombana khenge avume ukuya epini. Kwaphela iinyanga ezimbili avalelwe yedwa ngejele, ngemva kwalokho kwafuze asebenze budisi. Watlola, “okwenzeka kimi kwangitjengisa ukuqakatheka kwethemba ngombana lingisiza ngikghodlhelele. Sineembonelo zakaJesu, abapostoli kunye nesithembiso esihle esiseBhayibhelini. Zoke izintwezi zisinikela ithemba elihle lengomuso begodu ziyasiqinisa bona sikghodlhelele.” Ithemba laba yi-ankera kuLeonard, nakithi ithemba lingaba yi-ankera.

7. Iintjhijilo ziliqinisa njani ithemba lethu? (Roma 5:3-5; Jakopo 1:12)

⁷ Ithemba lethu liyaqina ngemva kokobana siqalene nentjhijilo begodu sabona indlela uJehova asisiza ngayo. (Funda kwebeRoma 5:3-5; noJakopo 1:12.) Ngaphezu kwalokho siba nethemba eliqine khulu kunalelo ebesinalo lokha nasithoma ukuzwa iindaba ezimnandi. USathana ufuna bona iintjhijilo zethu zisigandelele khulu, kodwana ngesizo lakaJehova singaqalana nazo ngokuphumelelako.

ITHEMBA LETHU LINJENGEKOPORO

8. Ithemba lethu lifana njani nekoporo? (1 Thesalonika 5:8)

⁸ IBhayibheli godu limadanisa ithemba lethu nekoporo. (Funda yoku-1 kwebeThesalonika 5:8.) Isotja limbatha ikoporo ukwenzela bona livikele ihlokwalo lokha nalihlaselwa manaba. Epini yethu engokommoya kutlhogeka bona sivikele imikhumbulwethu ekusahlelweni nguSathana. Uhlasela ngeenlingo nangemicabango eyenzelwe ukulimaza imikhumbulwethu. Njengombana ikoporo ivikela ihloko yesotja, ithemba lethu livikela indlelethu yokucabanga ukwenzala bon sihlale sithembekile phambi kwakaJehova.

9. Uyini umphumela wabantu abanganathemba?

⁹ Ithemba lethu lokuphila okungapheliko lizosisiza bona senze ngokuhlakanipha nangokuzwisisa. Ngakwelinye ihlangothi, nange ithemba lethu libogaboga begodu sivumela imicabango engakalungi bona isahlele imikhumbulwethu, sizokulahlekelwa mnqopho wokuphila okungapheliko. Akhesicoce ngalokho okwenzeka kwamanye amaKrestu ebewahlala eKorinte yekadeni. Alahlekelwa kukholwa, okuyinto eqakathekileko esithembisweni sakaZimu, ithemba levuko. (1 Kor. 15:12) UPowula wathi abantu abanganathemba ngevuko baphilela isikhathi sanje. (1 Kor. 15:32) Inengi alinathemba eenthembisweni zakaZimu liphilela okwesikhatjhana bathabela nanyana ngibuphi ubumnandi obuza kibo. Ngakwelinye ihlangothi, thina ithemba lethu lisesikhathini esizako eenthembisweni zakaZimu. Ithemba lethu lifana nekoporo engokomfanekiso evikela indlelethu yokucabanga nesivikela bona singakhethi umhlobo wokuphila kokuzithabisa ongenza bona silahlekelwe litjhebiswano elihle noJehova.—1 Kor. 15:33, 34.

10. Ithemba lingasivikela njani lokha nasifikelwa micabango engakhiko?

¹⁰ Ikoporo yethemba lethu ingasivikela lokha nasifikelwa mkhumbulo wokuthi akusizi ukulinga ukuthabisa uJehova. Ngokwesibonelo, abanye bangathi, ‘Angeze ngaba hlangana nalabo abazokuphila ngokungapheliko. Akungifaneli lokho. Angeze ngakghona ukufikelela iinkambisolawulo zakaZimu.’ Khumbula ukuthi umduduzi wamala kaJobho, u-Elifasi naye bekacabanga ngendlela efanako wathi: “Uyini obhubhako kobana angaba msulwa nobelethwe mfazi kobana angaba ngolungileko?” Waragela phambili wathi ngoZimu: “Nakube uZimu akathembi ngitjho neengilozi zakhe namazulu angakahlanzeki phambi kwakhe.” (Job. 15:14, 15) Lawo bekumamala ahlaza! Khumbula ukuthi ngubani ofuna sicabange ngendlela le, nguSathana. Uyazi bona nawungacabanga ngendlela le ithemba lakho lizokutjhabalala. Kunalokho wabalekele amala la, udzimelele kuJehova neenthembisweni zakhe. Ungakuzazi nakancani ukuthi uJehova ufuna uphile ngokungapheliko begodu uzokusiza bona uwufikelele umgomo lo.—1 Thim. 2:3, 4.

QINISA ITHEMBA LAKHO

11. Kubayini kufuze sibe nesineke njengombana silindele ukuzalisekiswa kwethemba lethu?

¹¹ Akusibulula ngaso soke isikhathi ukuqinisa ithemba esinalo. Ngezinye iinkhathi singaphelelwa sineke sokulinda uZimu. Ngebanga lokuthi uJehova bekasolo akhona, okubonakala ngasuthi sikhathi eside kithi kuye sikhathi esifitjhani khulu. (2 Pit. 3:8, 9) Uzokwenza koke asithembise khona kodwana angeze akwenza ngesikhathi thina esimlindele ngaso. Khuyini engasisiza bona siqinise ithemba lethu njengombana silindele uZimu ngesineke bona azalise umnqophwakhe?—Jak. 5:7, 8.

12. NgokwamaHebheru 11:1, 6, ithemba lihlotjaniswa njani nokukholwa?

¹² Sizokuhlala siqinisa ithemba lethu kwaphela nasitjhidelene khulu noJehova, okunguye osiqinisekisa ngethemba esinalo. Ekhabolakhona, iBhayibheli lihlobanisa ithemba nokukholelwa ukuthi uJehova ukhona nokuthi “uba mvuzi walabo abamfuna ngetjiseko.” (Funda amaHebheru 11:1, 6.) UJehova nakaba ngokwamambala kithi, sizokuqiniseka khulu ngokuthi lokho asithembise khona kuzokwenzeka. Nje akhesicoce ngeendlela ezibonakalako zokudephisa itjhebiswano lethu noJehova begodu ngokwenza njalo siqinise ithemba lethu

13. Singatjhidela njani kuZimu?

¹³ Thandaza kuJehova, bewufunde iliZwi lakhe. Nanyana singeze sambona uJehova, singakghona ukutjhidela kuye. Singakhuluma naye ngomthandazo Sinethemba lokuthi uzokulalela lokho esimtjela khona. (Jor. 29:11, 12) Singalalela uZimu ngokufunda iliZwi lakhe besiqabangisise ngalo. Njengombana sifunda ngoJehova nendlela atlhogomela ngayo labo abathembeka kuye esikhathini sidlulileko, ukuthemba kwethu uJehova kuzokukhula bekuqine. Koke okuseliZwini lakaZimu ‘kwatlolelwa bona kusifundise, ukuze ngokukghodlhelela kwethu nangenduduzo evela emiTlolweni sibe nethemba.’—Rom. 15:4.

14. Kubayini kufuze sicabange ngalokho uJehova akwenzela abanye?

¹⁴ Cabangisisa ngendlela uJehova azalisekise ngayo iinthembiso zakhe. Akhesicoce ngalokho uZimu akwenzela u-Abrahama noSara. Iminyakabo beyingasabavumeli bona bangaba nabantwana. Nanyana kunjalo, uZimu wabathembisa ukuthi bazokuba nomntwana. (Gen. 18:10) U-Abrahama wasabela njani kilokhu? IBhayibheli lithi: “Wakholwa ukuthi uzokuba nguyise weentjhaba ezinengi.” (Rom. 4:18) Nanyana ngokubona komuntu ubujamo ebebakibo besele bunganathemba, u-Abrahama bekaqiniseka ngokuthi uJehova uzosizalisa isithembiso sakhe. Ngambala indoda enokhukholwa le khenge idane. (Rom. 4:19-21) Iindaba ezinjengalezi zisifundisa ukuthi singamthemba uJehova bona uzozizalisekisa iinthembiso zakhe ngitjho nanyana ubujamo bungabonakala bungathembisi kangangani ngokubona kwethu.

15. Kubayini kufuze sicabangisise ngalokho uzimu asenzele khona?

¹⁵ Cabangisisa ngalokho uJehova akwenzele khona. Akhucabange ngendlela esele uzuze ngayo ekuzalisekeni kwezinye zemphorofido eziseliZwini lakaZimu. Ngokwesibonelo, uJesu wathembisa ukuthi ubabakhe uzositlhogomela ngazo zoke izinto esizitlhogako ekuphileni. (Mat. 6:32, 33) UJesu godu wasiqinisekisa ngokuthi uJehova uzosinikela ummoya ocwengileko nasiwubawako. (Luk. 11:13) UJehova uragele phambili nokuzalisekisa iinthembiswezi. Kungenzeka kunezinye iinthembiso ocabanga ngazo, uJehovaazizalisekisileko kuwe. Ngokwesibonelo usithembisa ukuthi uzosilibalela, asiduduze begodu asinikele izinto ezizosisiza siragele phambili sinetjhebiswano elihle naye. (Mat. 6:14; 24:45; 2 Kor. 1:3) Nawucabangisisa ngalokho uZimu akwenzelekhona uzokuqinisa ithemba lakho kilokho azokwenzela khona esikhathini esizako.

THABA NGETHEMBA ONALO

16. Kubayini ithemba lethu lisisipho esiligugu?

¹⁶ Ithemba lethu lokuphila okungapheliko lisisipho esiligugu esivela kuZimu. Siqale phambili ekubeni nengomuso elikarisako, esiqiniseka khulu ngalo bona lizokwenzeka. Lifana ne-ankera, lenza sidzimelele ukwenzela bona sikghodlhelelele iintjhijilo siqalane nokuhlunguphazwa ngitjho nokufa. Lifana nekoporo, livikela iindlelethu yokucabanga ukwenzela bona sibalekele okumbi sinamathele kokuhle. Ithemba lethu elisekelwe eBhayibhelini lenza bone sitjhidele kuZimu beliveza nendlela asithanda ngayo. Sizuza khulu njengombana ithemba lethu lihlala likhanya begodu liqinile.

17. Kubayini ithemba lethu lingenza bona sithabe?

¹⁷ Encwadini ayitlolela beRoma, umpostoli uPowula wabakhuthaza wathi: “Thabani ethembeni.” (Rom. 12:12) UPowula bekangathaba kwaphela nakahlala anokukholwa bekazokufumana ukuphila okungapheliko kwezulwini. Nathi singthaba ethembeni lethu ngombana siyaqiniseka ukuthi uJehova uzozizalisekisa iinthembiso zakhe. Kunjengombana umrhubi atlola athi: “Ubusisiwe loyo. . . ithemba lakhe likuSomnini uZimakhe . . . olonda iqiniso isiphelani.”—Rhu. 146:5, 6.