Imibuzo Evela Ebafundini
Lokha uDavida nakatlola amezwi afumaneka kuRhubo 61:8 wathi uzokudumisa igama lakaZimu “ngokungapheliko,” inga-kghani lokhu kutjho bona bekacabanga ukuthi angekhe ahlongakale?
Awa, akusinjalo. Lokho uDavida akutlolako bekuliqiniso begodu kunembile.
Akhucabange ngalokho akutlolako okusemitlolweni efanako, wathi: “Ngizokubhinela igama lakho iindumiso ngokungapheliko, njengombana ngenza engikufungileko qobe langa.” “Maye! Jehova Zimami, ngikudumisa ngehliziywami yoke, ngizokuphazimulisa igama lakho ngokungapheliko.” “Ngizokudumisa igama lakho ngokungapheliko.”—Rhu. 61:8; 86:12; 145:1, 2.
UDavida nakatlola amezwi la bekangacabangi bona angeze ahlongakale. Bekazi ukuthi uJehova wathi ngebanga lesono abantu bazokuhlongakala, naye uDavida wavuma ukuthi usisoni. (Gen. 3:3, 17-19; Rhu. 51:4, 5) Bekazi ukuthi ngitjho namadoda uZimu ebekawamukela njengo-Abrahama, u-Isaka noJakopo nabo bahlongakala. UDavida bekazi ukuthi naye ngokukhamba kwesikhathi uzokuhlongakala. (Rhu. 37:25; 39:4) Kodwana amezwakhe afumaneka kuRhubo 61:8 atjengisa isifiso nokuzimisela kwakhe ukudumisa uZimu ngokungapheliko, okutjho ukuthi nakasaphilako.—2 Sam. 7:12.
Ngezinye iinkhathi uDavida bekatlola ngalokho okwenzeka ekuphileni kwakhe njengombana sikubona lokho esethulweni samaRhubo 18, 51 no-52. KuRhubo 23 uDavida uhlathulula uJehova njengoMelusi onikela isinqophiso, ukuqabuleka nesivikelo. UDavida bekangumelusi onjalo. Bekafuna ukulotjha uZimu ‘ukuphila kwakhe koke.’—Rhu. 23:6.
Khumbula ukuthi nguJehova owanqophisa uDavida bona atlole zoke izinto azitlolako. Akutlolako bekuhlanganisa iimphorofido zalokho ebekuzokwenzeka ngokukhamba kwesikhathi. Ngokwesibonelo, kuRhubo 110 uDavida watlola ngesikhathi lapho iKosakhe ‘izokuhlala ngesandleni sokudla [sakaZimu]’ ezulwini ifumane amandla amakhulu. Bona yenzeni? Bona ithobise amanaba kaZimu begodu ‘ikhuphe isahlulelo malungana neentjhaba’ ephasini. UDavida bekangukhokho kaMesiya ozokubusa asezulwini begodu ozokuba ‘mphristi ngokungapheliko.’ (Rhu. 110:1-6) UJesu wathi isiphorofido esifumaneka kuRhubo 110 besimalungana naye nokuthi sizokuzaliseka esikhathini esizako.—Mat. 22:41-45.
UDavida waphefumulelwa bona atlole ngesikhathi sakhe nangesikhathi esizako lapho azokuvuswa khona athabele ukudumisa uJehova ngokungapheliko. IRhubo 37:10, 11, 29 lisisiza sizwisise ihlathululo yobujamo ebebukhona kwa-Israyeli wekadeni nebuzokwenzeka ephasini mazombe esikhathini esizako lapho uZimu azokuzalisa khona iinthembiso zakhe.—Qala isigaba 8 esihlokweni esithi, “Uzokuba nami ePharadesi” esiThalenesi.
IRhubo 61:8 namanye amavesi afana nalo atjengisa bona uDavida bekafuna ukuphazimulisa uJehova kwa-Israyeli wekadeni bekube kulapho ahlongakala khona. Atjengisa nalokho uDavida azokwenza esikhathini esizako lokha nasele uJehova amvusile.