1 | Umthandazo ‘Niphosele Koke Okunitshwenyako Kuye’

IBHAYIBHELI ITHI: “Kukulapho niphosela koke okunitshwenyako [kuZimu] ngombana unendaba nani.” —1 PITROSI 5:7.

Lokho Kutjho Ukuthini?

UJehova uZimu usimema bona sikhulume naye ngananyana ngimiphi imithwalo edisela iingqondo zethu neenhliziyo. (IRhubo 55:22) Awukho umraro omkhulu khulu namkha omncani bona singathandaza ngawo. Nawusitshwenyako, noJehova uyamtshwenya. Ukuthandaza kuye ligadango eliqakathekileko lokufumana ukuthula komkhumbulo.—Filipi 4:6, 7.

Kungakusiza Njani Lokhu?

Nasinomraro womkhumbulo singazizwa sisodwa. Abanye abantu abakuzwisisi ngokupheleleko esiqalene nakho. (IzAga 14:10) Kodwana nasithandaza ngokusuka ehliziyweni sitjele uZimu indlela esizizwa ngayo, uzokuhlala asilalela begodu asizwisise. UJehova usiqalile, uyabazi ubuhlungu nemiraro esiqalana nayo begodu ufuna sithandaze kuye ngananyana yini esitshwenyako.—2 IinKronike 6:29, 30.

Ukukhuluma noJehova ngomthandazo kuyasiqinisekisa ukuthi unendaba nathi. Singazizwa njengomrhubi, owathandaza wathi: “Ukubonile ukuhlunguphazeka kwami; uyakwazi ukugandeleleka kwami okukhulu.” (IRhubo 31:7) Ukwazi ukuthi uJehova uyakulemuka esiqalene nakho kungasisiza siragele phambili siqalana neenkhathi ezibudisi. Kodwana akalemuki nje kwaphela ukugandeleleka kwethu. Ukuzwisisa kuhle esiqalene nakho ukudlula nanyana ngubani begodu usisiza sifumane induduzo nesikhuthazo eBhayibhelini.

Indlela IBhayibheli Elisiza Ngayo U-Julian

Indlela Ukutshwenyeka Khulu Okungithinta Ngayo

“Ngitshwenywa kugandeleleka ne-obsessive-compulsive disorder (OCD). Ngizizwa ngitshwenyekile ngananyana ngisiphi isikhathi. Kuthi izinto zikhamba kuhle, msinyana ngizizwe ngitshwenyeke khulu ngaphandle kwebanga elizwakalako. Ngigandeleleka khulu nanginabantu. Okungitshwenya khulu kukuthi bacabangani ngami.

“Labo abazi ukuthi ngiqalene nani bangisekela khulu. Ngezinye iinkhathi lokho abakutjhoko akusingilokho engifuna ukukuzwa. Kodwana ngiyithokoza khulu imizamwabo yokulinga ukungisiza.

“Ngezinye iinkhathi, ngebanga lokuthi ngilwisana nokutshwenyeka ne-OCD kuba budisi ukuthandaza. Kutlhogeka ukuthi ngilinge ngamandla bona ngidzimelele nangikhuluma noJehova ngomthandazo, ngingathikaziseki. Ngicabanga nezinto ezinengi ngesikhathi sinye ngigcine sengihlangahlangene. Nangingakghoni ukulawula imicabangwami, kuba budisi ukuhlathululela uJehova ukuthi ngizizwa njani.”

Indlela IBhayibheli Elingisiza Ngayo

“Ekufundeni kwami iBhayibheli ngifumene ukuthi imithandazo akutlhogeki bona ibe mide nayizakwamukelwa nguZimu. Ngezinye iinkhathi angikghoni ukuhlathulula indlela engizizwa ngayo, ngivele ngithi: ‘Jehova, ngibawa ungisize.’ Nanyana kunjalo, ngikghona ukubona ukuthi uJehova uyangizwisisa begodu uyangiphendula, anginikele lokho engikutlhogako ngesikhatheso. Ngaphezu kokuthandaza, ngifumana nesizo labodorhodere. Ngithokoza khulu ngemithombo emibili le engisizileko, ukugulokhu sekungcono khulu. Kungizuzise khulu ukubawa isizo kuBabami wezulwini nokubona indlela angisekele ngayo ngethando.”