UJehova Uyakusiza Bona Uphumelele

1-2. (a) Kubayini kungasirari ukuthi siqalana neentjhijilo? (b) Sizokucoca ngani esihlokwenesi?

NJENGABANTU bakaJehova, akusirari ukuthi sinande siqalana nemiraro. Siyalemuka ukuthi njengombana iBhayibheli latjho, “kufuze singene emBusweni kaZimu ngamatshwenyeko amanengi.” (IzE. 14:22) Siyazi ukuthi eminye yemiraro angekhe ilunge ngokupheleleko bekube kulapho siphila ephasini elitjha lakaZimu, lapho “ukufa angekhe kusaba khona namkha isizi namkha ukulila namkha ubuhlungu angekhe kusaba khona.”—IsAm. 21:4.

² UJehova akasivikeli bona imiraro ingasehleli. Nanyana kunjalo, uyasisiza bona sikghone ukuyikghodlhelelela. Tjheja lokho okwatjhiwo mpostoli uPowula kumaKrestu weRoma. Wathoma ngokukhuluma ngemiraro ehlukahlukeneko yena nabafowabo abaqalana nayo. Wathi: “Siyathumba ngokupheleleko ngebanga laloyo osithandileko.” (Rom. 8:35-37) Lokho kutjho ukuthi uJehova angakwenza uphumelele nanyana isitjhijilo oqalene naso sisaragela phambili. Akhesibone ukuthi uJehova wamsiza njani uJosefa bona aphumelele nokuthi angakusiza njani nawe bona uphumelele.

IZINTO NAZITJHUGULUKA NGOKUPHAZIMA KWELIHLO

3. Ukuphila kwakaJosefa kwatjhuguluka njani msinyana?

³ UJakopo wakwenza kwakhanya ukuthi bekayithanda khulu indodanakhe uJosefa. (Gen. 37:3, 4) Ngebanga lalokho, abanakwabo lakaJosefa bathoma ukuba nomona. Bathi nabafumana ithuba, bathengisa uJosefa esiqubuthwini sabathengisi bakwaMidiyani. Abathengisabo bathatha uJosefa bamusa eGibhide, indawo ebeyikude ngama-100 wamakhilomitha, lapho bamthengisa godu, kilokhu bamthengisela uPothifara, isikhulu sabonogada bakaFaro. Ukuphila kwakaJosefa kwatjhuguluka msinyana, ukusuka ekubeni yindodana kayise ayithanda khulu, kuya ekubeni sigqila seGibhide esingasililitho!—Gen. 39:1.

4. Singaqalana njani nesitjhijilo esifana naleso uJosefa aqalana naso?

⁴ IBhayibheli lithi, ‘izinto ezimbi zehlakalela woke umuntu.’ (UMtj. 9:11, Holy Bible—Easy-to-Read Version) Ngezinye iinkhathi siqalana nobudisi ‘obufikela boke abantu’ okuziintjhijilo boke abantu abaqalana nazo. (1 Kor. 10:13) Namkha singaqalana neentjhijilo ngebanga lokuthi sibalandeli bakaJesu. Ngokwesibonelo, singahlekwa, siphikiswe namkha sihlunguphazwe ngebanga lokukholwa kwethu. (2 Thim. 3:12) Nanyana ngiziphi iintjhijilo ongaqalana nazo, uJehova angakusiza uphumelele. Wakwenza njani lokho kuJosefa?

5. UPothifara waphetha ngani malungana nokuphumelela kwakaJosefa? (Genesisi 39:2-6)

⁵ Funda uGenesisi 39:2-6. UPothifara walemuka ukuthi uJosefa bekalisokana elihlakaniphileko nelikhutheleko. Bekazi nokuthi kubayini anjalo. UPothifara wabona ukuthi “uJehova wamenza [uJosefa] waphumelela kikho koke akwenzako.”b Ngokukhamba kwesikhathi, indoda emGibhide le yenza uJosefa waba sisebenzi sayo. Yambeka nokuthi abe mtlhogomeli wendlwayo yoke. Umphumela waba yini? UPothifara waphumelela.

6. Kungenzeka uJosefa wazizwa njani ngobujamo bakhe?

⁶ Linga ukucabanga ngendlela uJosefa ebekazizwa ngayo. Khuyini ebekayifuna khulu? Kghani bekafuna ukubukwa nokuvuzwa nguPothifara? Kungenzeka uJosefa bekafuna ukutjhatjhululwa abuyele kuyise. Naphezu kokuba mphathi endlini kaPothifara, uJosefa bekasese sigqila somphathi ongalotjhi uJehova. UJehova akhenge abangele uPothifara bona atjhaphulule uJosefa. Ubujamo bakaJosefa bebusazokuba bumbi khulu.

NANGE UBUJAMO BUBA BUMBI KHULU

7. Ubujamo bakaJosefa basuka njani kokumbi baya kokumbi khulu? (Genesisi 39:14, 15)

⁷ Njengombana kutjhiwo kuGenesisi isahluko 39, umkaPothifara bekathanda uJosefa begodu walinga kanengi ukumyenga. Ngaso soke isikhathi, uJosefa bekala. Ekugcineni umkaPothifara wasilingeka khulu, wabe wamangalela uJosefa ngokuthi ulinga ukumkata. (Funda uGenesisi 39:14, 15.) Nakezwa ngalokhu, uPothifara waphosela uJosefa ngejele begodu wahlala lapho iminyaka ethileko. (Gen. 39:19, 20) Bekunjani ejele? Ibizo lesiHebheru uJosefa alisebenzisako ukuhlathulula ‘ijele’ lingatjho “ipetsi” namkha “umgodi,” okutjho ukuthi lapho bekunzima tshu! Wazizwa anganathemba lokuthi uzokuphuma. (Gen. 40:15) IBhayibheli liveza nokuthi iinyawo zakaJosefa bazibopha ngamakhamandela kwathi intamakhe bayifaka iinsimbi. (Rhu. 105:17, 18) Ubujamo bakaJosefa basuka kokumbi baya kokumbi khulu. Wasuka ekubeni sigqila esithenjwako, waya ekubeni sibotjhwa esingatjho litho.

8. Ngitjho nanyana iintjhijilo zingaba zimbi khulu, khuyini esiqiniseka ngayo?

⁸ Kghani khewaba sebujamweni obugandelelako, obasuka kokumbi baya kokumbi khulu naphezu kokuthandaza ngokusuka ehliziyweni? Lokho kungenzeka. UJehova akasivikeli eentjhijilweni ezibakhona ephasineli elibuswa nguSathana. (1 Jwa. 5:19) Nanyana kunjalo, ungaqiniseka nganakhu: UJehova uyakubona oqalana nakho begodu unendaba nawe. (Mat. 10:29-31; 1 Pit. 5:6, 7) Ngaphezu kwalokho, wathembisa wathi: “Angekhe nginitjhiye begodu angekhe nginilahle.” (Heb. 13:5) UJehova angakusiza ukghodlhelele, nanyana ubona ngasuthi ubujamo bakho angekhe bubengcono. Akhesibone ukuthi wakwenza njani lokho kuJosefa.

9. Khuyini etjengisa ukuthi uJehova bekanoJosefa ejele? (Genesisi 39:21-23)

⁹ Funda uGenesisi 39:21-23. Hlangana nesikhathi esibudisi sokubotjhwa kwakaJosefa, uJehova wamenza waphumelela. Njani? Ngokukhamba kwesikhathi uJosefa wakghona godu ukuhlonitjhwa nokuthenjwa yinduna eyihloko njengombana bekathenjwanguPothifara. Ingasikade, induna le yabeka uJosefa bona abemphathi weembotjhwa. Kuhlekuhle, iBhayibheli lithi, “induna eyihloko yejele beyingazitshwenyi ngalitho engaphasi kwetjhejo lakaJosefa.” Nje, uJosefa besele anomsebenzi ebewuzomenza abemajadu. Leli bekulitjhuguluko ebelingakalindeleki! Kwenzeka njani ukuthi isibotjhwa ebesimangalelwe ngokukata umfazi wesikhulu sekhotho sinikelwe isikhundla esinjengalesi? Kunehlathululo eyodwa kwaphela endabeni le. UGenesisi 39:23 uthi, “uJehova bekanoJosefa begodu uJehova wenza bona koke uJosefa akwenzako kuphumelele.”

10. Hlathulula ukuthi kubayini kungenzeka uJosefa khenge azizwe aphumelela kikho koke.

¹⁰ Akhulinge godu ukucabanga ngendlela uJosefa ebekazizwa ngayo. Ngemva kokumangalelwa bekabotjhwe, ucabanga bona wazizwa aphumelela kikho koke? Khuyini uJosefa ebekayifuna khulu? Kghani bekafuna ukuthandwa yinduna yejele? Kungenzeka ukuthi uJosefa bekafuna kuhlanzwe igama lakhe bekatjhatjhululwe. Wabawa nesibotjhwa ebekavalelwe naso ukuthi simkhulumele noFaro, amkhuphe ejele eligandelelako ebekakilo. (Gen. 40:14) Isibotjhweso khenge sikhulume noFaro. Lokho kwenza bona uJosefa ahlale ejele eminye iminyaka emibili. (Gen. 40:23; 41:1, 14) UJehova waragela phambili nokwenza indlela kaJosefa iphumelele. Njani?

11. Ngiliphi ikghono elikhethekileko uJehova alinikela uJosefa begodu ladlala yiphi indima ekuzalisekeni komnqopho kaJehova?

¹¹ Lokha uJosefa nakasejele, uJehova wabangela bona ikosi yeGibhide ibe namabhudango amabili ayitshwenyako. UFaro bekafuna ukwazi ngehliziywakhe yoke ukuthi atjho ukuthini. Ikosi nayizwa ukuthi uJosefa ukghona ukuhlathulula amabhudango, yathi akabizwe. Ngesizo lakaJehova, wakghona ukuhlathululela uFaro amabhudango la bewamnikela neseluleko, lokho kwamthabisa khulu. UFaro nakabona ukuthi uJehova uyalisekela isokaneli, walenza induna yokudla kiyo yoke inarha yeGibhide. (Gen. 41:38, 41-44) Ngokukhamba kwesikhathi kwaba nendlala eGibhide nakwezinye iindawo, kuhlanganise neKanana lapho umndeni kaJosefa bewuhlala khona. UJosefa bekasebujamweni obuhle bokuvikela umndenakhe nokusindisa irhelo leenzukulwana ebekuzokuvela kilo uMesiya.

12. UJehova wamenza njani uJosefa waphumelela?

¹² Cabanga ngezenzakalo ezingakajayeleki ezenzeka ekuphileni kwakaJosefa. Ngubani owabangela bona uPothifara atjheje uJosefa, isigqila esingatjho litho? Ngubani owabangela induna eyihloko yeembotjhwa ukuthi ithande uJosefa, isibotjhwa esingatjho litho? Ngubani owanikela uFaro amabhudango atshwenyako, wanikela noJosefa ikghono lokuwahlathulula? Ngubani owenza bona uFaro abeke uJosefa ukuthi abemphathi wokudla eGibhide? (Gen. 45:5) Kuyakhanya ukuthi nguJehova owenza uJosefa waphumelela kikho koke akwenzako. Abanakwabo lakaJosefa bebafuna ukumbulala kodwana uJehova watjhugulula ubujamobo bona azalise umnqophwakhe.

INDLELA UJEHOVA AKWENZA NGAYO UPHUMELELE

13. Inga-kghani uJehova uyangenelela kibo boke ubujamo esiqalana nabo? Hlathulula.

¹³ Khuyini esiyifundako endabeni kaJosefa? Inga-kghani uJehova uyangenela kibo boke ubujamo esiqalana nabo? Kghani uhlela zoke izinto ezenzeka ekuphileni kwethu, ukwenzela bona nakwenzeka izinto ezimbi, zenzeke ngamabanga amahle? Awa, iBhayibheli aliwusekeli umbono onjalo. (UMtj. 8:9; 9:11) Nakhu esikwaziko: Lokha nasiqalana nesilingo, uJehova uyabona begodu uyakuzwa ukulilela kwethu isizo. (Rhu. 34:15; 55:22; Isa. 59:1) Ngaphezu kwalokho, uJehova angasisiza sikghodlhelelele iintjhijilo ngokuphumelelako. Njani?

14. UJehova usisiza njani ngeenkhathi ezibudisi?

¹⁴ Enye indlela uJehova asisiza ngayo kusiduduza nokusikhuthaza ngesikhathi esifaneleko. (2 Kor. 1:3, 4) Ngilokho okwenzeka kumfowethu we-Turkmenistan, u-Eziz owabotjhwa iminyaka emibili ejele ngebanga lokukholwa kwakhe. Uthi, “Ekuseni ngelanga lokugwetjwa kwami, umfowethu wangitjengisa u-Isaya 30:15, othi: ‘Amandlenu azokuba sekwehliseni ummoya nokungithemba.’ Iveseli langisiza ngahlala nginommoya ophasi bengathembela kuJehova kikho koke. Ukucabangisisa ngeveseli kwangisiza kiso soke isikhathi ebengibotjhwe ngaso.” Kghani ungacabanga ngesikhathi ekuphileni kwakho uJehova akusiza ngaso ngokukududuza nokukukhuthaza ngesikhathi ebewumtlhoga ngaso khulu?

15-16. Ufundani kilokho okwenzeka kuTori?

¹⁵ Esikhathini esinengi asilemuki indlela uJehova asisiza ngayo sikghodlhelelele iintjhijilo bekube kulapho ziphela khona. Udadwethu uTori wakubona ukuba liqiniso kwamezwi la. Indodanakhe uMason beyinekankere iminyaka esithandathu bekwaba kula ihlongakala khona. UTori wezwa ubuhlungu khulu begodu lokho kuyazwisiseka. Uthi, “Leso bekusikhathi esibuhlungu khulu kimi njengomma.” Ungezelela uthi, “Ngiyaqiniseka ukuthi abanye ababelethi bangavumelana nami nangithi ukubona umntwanakho agula kubuhlungu khulu ukudlula lokha nakugula wena njengombelethi.”

¹⁶ Nanyana ubujamo uTori aqalana nabo bebubuhlungu khulu, wakghona ukubona indlela uJehova amsekela ngayo bona aqalane nobuhlungobo. Uthi, “Nangicabanga ngesikhatheso, ngikghona ukubona indlela uJehova angisekele ngayo ekuguleni kwendodanami. Ngokwesibonelo, ngitjho nanyana uMason bekagula khulu ukuthi angabona abantu abamvakatjheleko, abafowethu nabodadwethu bebakhamba ama-awara amabili bona beze esibhedlela. Bekuhlala kunomuntu endaweni yabazokuvakatjhela iinguli, bebahlala bazimisele ukusisekela. Bebasitlhogomela nangezinto eziphathekako. Nangeenkhathi ezibudisi khulu, besingatlhogi litho.” UJehova wanikela uTori koke ebekakutlhoga bona akghodlhelele, bewenza okufanako nakuMason.—Qala ibhoksi elithi, “UJehova Wasinikela Lokho Ebesikutlhoga.”

UNGAZIKHOHLWA IZINTO UJEHOVA AKWENZELE ZONA

17-18. Khuyini ezokusiza ulemuke bewuthokoze isizo lakaJehova ngeenkhathi ezibudisi? (IRhubo 40:5)

¹⁷ Funda iRhubo 40:5. Umnqopho womuntu okhwela intaba kufika esiqongolweni. Njengombana akhuphuka intaba, kuneendawo angajama kizo aqalaqale ubuhle bendawo. Ngendlela efanako, akhuziphe isikhathi ucabange ngendlela uJehova akwenza ukghodlhelele ngayo ngitjho nalokha uqalene nemiraro. Ekupheleni kwelanga ngalinye, zibuze: ‘Ngisibone njani isibusiso sakaJehova namhlanjesi? Nanyana imirarwami isaragela phambili, uJehova ungisiza njani bona ngiyikghodlhelelele?’ Linga ukubona okunganani isibusiso sinye sakaJehova esikwenze waphumelela.

¹⁸ Kuliqiniso ukuthi kungenzeka uthandazela bona isitjhijilo oqalene naso siphele. Lokho kuyazwisiseka begodu kufanele. (Flp. 4:6) Kodwana akukafuzi sikhohlwe iimbusiso esinazo njenganje. Ngaphezu kwalokho, uJehova uthembisa ukusiqinisa bekasisize sikghodlhelele. Yeke, ungakhohlwa ukuhlala uthokoza indlela uJehova akusekela ngayo. Uzokubona indlela uJehova akusiza ngayo bona uphumelele njengombana enza kuJosefa, ngitjho nanyana iintjhijilo oqalene nazo zisaragela phambili.—Gen. 41:51, 52.