Singaliqinisa Njani Ithando Esinalo Ngabanye?

1-2. (a) Kubayini umpostoli uPowula athi ithando bubuntu ‘obuphuma phambili’? (b) Ngimiphi imibuzo esizokucoca ngayo?

LOKHA umpostoli uPowula nakakhuluma ngokukholwa, ithemba nethando waphetha ngokuthi ‘ubuntu obukhulu obudlula boke lithando.’ (1 Kor. 13:13) Kubayini uPowula atjho lokhu? Esikhathini esizako angekhe kutlhogeke sikholelwe eenthembisweni zakaZimu zephasi elitjha namkha sithembe ukuthi zizokuzaliseka ngombana zabe sele zizalisekile. Kodwana kuzokutlhogeka bona sibe nethando ngoJehova nangabantu. Kuhlekuhle, ithando lethu ngabo lizokuragela phambili likhula ngokungapheliko.

² Njengombana kuzokutlhogeka bona sihlale sinethando, sizokucoca ngemibuzo emithathu. Wokuthoma, kubayini kufuze sithandane? Wesibili, singatjengisa njani ukuthi siyathandana? Wesithathu, singenza njani ukuthi ithando lethu ngabanye lihlale liqinile?

KUBAYINI KUFUZE SITHANDANE?

3. Ngimaphi amabanga asenza sithandane?

³ Kubayini kuqakathekile ukuthi sithandane? Nasithanda abafowethu sitjengisa ukuthi simaKrestu weqiniso. UJesu watjela abapostoli bakhe ukuthi: “Boke bazokwazi ngalokhu ukuthi nibafundi bami nanithandanako.” (Jwa. 13:35) Ngaphezu kwalokho ukuba nethando kusenza sihlale sibumbene. UPowula wabiza ithando ngokuthi ‘sibopho esipheleleko sobunye.’ (Kol. 3:14) Ngaphezu kwalokho kunelinye godu ibanga eliqakathekileko lokuthi kubayini kufuze sithandane. Umpostoli uJwanisi watlolela abafowabo nabodadwabo ukuthi: “Nanyana ngubani othanda uZimu kufuze athande nomfowabo.” (1 Jwa. 4:21) Nasithandanako sisuke sitjengisa ithando esinalo ngoZimu.

4-5. Fanekisa ukuthi ithando esinalo ngoZimu lihlobana njani nethando esinalo ngabanye?

⁴ Ithando esinalo ngoZimu lihlangana njani nethando esinalo ngabafowethu nabodadwethu? Ukufanekisa, cabanga ngokuhlobana okukhona hlangana nehliziywethu nezinye iingcenye zomzimbethu. Lokha udorhodere nakahlola imithambethu yesandleni ukubona ukuthi ihliziywethu iphile kuhle namkha awa angafumana imininingwana eminengi ngobujamo behliziywethu. Sifundani ekambisweni le?

⁵ Njengombana udorhodere akghona ukufumana ubujamo behliziywethu ngokuthi ahlolisise imithambo esesandleni, singakghona ukufumana imininingwana malungana nendlela ithando lethu ngoZimu eliqine ngayo ngokuhlolisisa indlela esithanda ngayo abanye. Nasilemuka ukuthi asisathandi abafowethu ngendlela ebesibathanda ngayo lokho kungatjengisa ukuthi ithando lethu ngoZimu lithoma ukubogaboga. Kodwana qobe nasitjengisa ukuthi siyabathanda abafowethu nabodadwethu, sitjengisa ithando esinalo ngoZimu.

6. Kubayini kufuze sitshwenyeke nange ithando lethu ngabafowethu nabodadwethu lithoma ukubogaboga? (1 Jwanisi 4:​7-9, 11)

⁶ Kufuze kusitshwenye nasilemuka ukuthi ithando lethu ngabafowethu nabodadwethu lithoma ukubogaboga. Kubayini? Ngombana lokho kungatjho ukuthi ubuhlobo bethu noJehova busengozini. Umpostoli uJwanisi ukwenza kukhanye nakasikhumbuza ukuthi: “Loyo ongamthandi umfowabo ambonileko, angekhe amthanda uZimu angakhenge ambone.” (1 Jwa. 4:20) Khuyini esiyifundako? UJehova uthaba ngathi kwaphela ‘nasithandanako.’—Funda yoku-1 kaJwanisi 4:​7-9, 11.

SINGATJENGISA NJANI UKUTHI SIYATHANDANA?

7-8. Ngiziphi ezinye iindlela esingatjengisa ngazo ukuthi siyathandana?

⁷ Kanengi eliZwini lakaZimu sifumana umyalo othi ‘sithandane.’ (Jwa. 15:​12, 17; Rom. 13:8; 1 Thes. 4:9; 1 Pit. 1:22; 1 Jwa. 4:11) Ithando yinto engaphakathi kwethu begodu akekho umuntu ongakghona ukubona ngaphakathi ehliziywenethu. Yeke singatjengisa njani ukuthi siyabathanda abanye? Ngamezwi nangezenzo.

⁸ Zinengi iindlela esingatjengisa ngazo ukuthi siyabathanda abafowethu nabodadwethu. Nazi ezinye iimbonelo: “Tjelanani iqiniso.” (Zak. 8:16) ‘Hlalani ninokuthula komunye nomunye.’ (Mar. 9:50) Dosani phambili “ekuhloniphaneni.” (Rom. 12:10) “Yamukelanani.” (Rom. 15:7) “Ragelani phambili . . . nilibalelane.” (Kol. 3:13) “Ragelani phambili nokuthwalisana imithwalo.” (Gal. 6:2) “Ragelani phambili niduduzana.” (1 Thes. 4:18) “Hlalani . . . nakhana.” (1 Thes. 5:11) “Nithandazelane.”—Jak. 5:16.

9. Kubayini ukududuza abanye kuyindlela eqakathekileko yokutjengisa ukuthi siyabathanda? (Qala nesithombe.)

⁹ Akhesihlole enye yeendlela esingatjengisa ngayo ithando lethu ngabanye. UPowula wathi: “Ragelani phambili niduduzana.” Kubayini ukududuza abanye kuyindlela eqakathekileko yokutjengisa ukuthi siyabathanda. Ngokuya ngokwencwadi ekhuluma ngeBhayibheli, ibizo uPowula alisebenzisako elithi ‘ukududuza’ litjho “ukujama eduze nomuntu, umkhuthaze lokha nakaqalene nobujamo obubudisi.” Qobe lokha nasiduduza umfowethu nakaqalene nobujamo obubudisi simsiza aragele phambili alotjha uJehova ngokuthembeka.—2 Kor. 7:​6, 7, 13.

10. Ngikuphi ukuhlobana okukhona hlangana kwesirhawu nenduduzo?

¹⁰ Isirhawu nokududuza kuyahlobana. Ngayiphi indlela? Umuntu nakanesirhawu ufuna ukududuza umuntu oqalene nobujamo obubudisi bekamsize ngokumenzela okuthileko. Yeke nasinesirhawu kuzokuba bulula ukuthi siduduze abanye. UPowula utjengisa ukuthi isirhawu uJehova anaso ngabanye simenza abaduduze. Uhlathulula uJehova ‘njengoBaba wesirhawu noZimu wayo yoke induduzo.’ (2 Kor. 1:3) La umpostoli uPowula usebenzisa amezwi athi ‘isirhawu’ ukuhlathulula indlela arhawukela abanye ngayo. Yeke “UZimu ubizwa ngokuthi nguBaba namkha Mthombo wesirhawu ngebanga lendlela arhawukela ngayo abantu.” Isirhaweso simenza asiduduze “kilo loke isizi lethu.” (2 Kor. 1:4) Njengamanzi aphuma emthonjeni aqabula umuntu owomileko, uJehova uqabula bekaduduze labo abagandelelekileko. Singamlingisa njani uJehova ngokuba nesirhawu nokududuza abanye? Enye indlela esingakwenza ngayo kukuthi sibe nobuntu obuzosisiza sibe nesirhawu besiduduze abanye. Ngibuphi obunye ubuntobo?

11. NgokwebeKolose 3:12; neyoku-1 kaPitrosi 3:​8, ngibuphi obunye ubuntu ekufuze silwele ukuba nabo obuzosisiza sithande abanye besibaduduze?

¹¹ Khuyini ezosisiza sihlale sithandana ‘besiragele phambili siduduzana’ qobe langa? Kufuze silwele ukuba nobuntobu njengokuzwelana, ukuthandana njengamalunga womndeni besibenomusa. (Funda kwebeKolose 3:12; yoku-1 kaPitrosi 3:8.) Ubuntobu buzosisiza njani? Nasinesirhawu ngabafowethu begodu sinendaba nabo sizokuba nesifiso sokufuna ukubaduduza nabaqalene nobudisi. Njengombana uJesu wathi, “umlomo ukhuluma lokho okuphuphuma ngehliziyweni. Umuntu olungileko ukhupha izinto ezihle emnonwenakhe omuhle.” (Mat. 12:​34, 35) Ukududuza abafowethu nabodadwethu nabaqalene nobudisi kuyindlela eqakathekileko yokutjengisa ukuthi siyabathanda.

SINGENZA NJANI UKUTHI ITHANDO LETHU NGABANYE LIHLALE LIQINILE?

12. (a) Kubayini kufuze sitjhejisise singalahlekelwa lithando esinalo? (b) Ngimuphi umbuzo esizokucoca ngawo?

¹² Soke sifuna ‘ukuragela phambili sithandana.’ (1 Jwa. 4:7) Nanyana kunjalo kuqakathekile ukuthi sikhumbule bona uJesu wayelelisa ukuthi ‘ithando labanengi belizokuphola.’ (Mat. 24:12) UJesu bekangathi abafundi bakhe angekhe basathandana. Kodwana kufuze sitjheje ukuthi singavumeli indlela abantu abangathandani ngayo ephasini ithinte indlela esiphathana ngayo. Sinalokho emkhumbulweni, akhesicabange ngombuzo naku oqakathekileko: Khuyini ezosisiza sazi ukuthi ithando esinalo ngabafowethu liqinile?

13. Khuyini ezosisiza sazi ukuthi ithando esinalo ngabafowethu nangabodadwethu liqinile?

¹³ Enye indlela yokubona ukuthi ithando lethu liqine kangangani, kuhlolisisa indlela esisabela ngayo kobunye ubujamo bokuphila. (2 Kor. 8:8) Obunye ubujamo obunjalo buvezwe ngumpostoli uPitrosi nakathi: “Ngaphezu kwakho koke, thandanani khulu ngombana ithando ligubuzesa izono ezinengi.” (1 Pit. 4:8) Yeke lokho esizokwenza lokha abafowethu nabenza imitjhapho namkha benza izinto ezisizwisa ubuhlungu, kuzosisiza sibone ukuthi ithando lethu ngabo liqine kangangani.

14. Ngokuya ngeyoku-1 kaPitrosi 4:​8, lihlobo elinjani lethando ekufuze sibe nalo? Fanekisa.

¹⁴ Akhesicabangisise ngamezwi kaPitrosi. Ingcenye yokuthoma yevesi 8 ihlathulula ihlobo lethando ekufuze sibe nalo—‘ithando elikhulu.’ Ibizo uPitrosi alisebenzisako elithi “khulu” lingatjho “ukuthabulula.” Ingcenye yesibili yeveseli ihlathulula ukuthi khuyini esizoyenza nasithandana khulu. Nasithandana khulu lokho kwenza sigubuzese imitjhapho yabafowethu. Lokho singakufanisa ngendlela le: Sibamba ithando ngezandla zethu ezimbili, njengokungathi sibambe itjhila elikhulu, silithabulule beligubuzese isono ingasi sinye, namkha ezimbili kodwana “izono ezinengi.” ‘Ukugubuzesa’ yihlathululo etjho ukulibalela. Njengombana itjhila lingakghona ukugubuzesa ibala, nethando lingagubuzesa ukubogaboga nemitjhapho yabanye.

15. Nange ithando esinalo ngabafowethu nabodadwethu liqinile khuyini esizokghona ukuyenza? (Kolose 3:13)

¹⁵ Ithando esinalo ngabanye kufuze liqine nasizakulibalela imitjhapho yabafowethu nabodadwethu nanyana lokho kungaba budisi ngezinye iinkhathi ukukwenza. (Funda kwebeKolose 3:13.) Nange silibalela abanye sitjengisa ukuthi ithando lethu liqinile nokuthi sifuna ukuthabisa uJehova. Khuyini enye engasisiza silibalele imitjhapho yabanye besingakwati msinyana nabenza izinto ezisisilingako?

16-17. Khuyini ezosisiza siqale ngale kwemitjhapho emincani yabanye? Fanekisa. (Qala nesithombe.)

¹⁶ Dzimelela ebuntwini obuhle babafowenu nabodadwenu ingasi kobumbi. Cabanga nganasi isibonelo. Zicabange usembuthanweni nesiqhema sabafowenu nabodadwenu. Uthabela isikhathi esimnandi ulapho begodu nasele kuphela umbuthano, utjhuda nawo woke umuntu. Utjhuda nezinye iinthombe ezimbili nakungenzeka sokuthoma singaphumi kuhle. Nje, uneenthombe ezintathu. Kodwana kwesinye sazo ulemuka ukuthi omunye umfowethu akamomotheki. Uzokwenzani ngesithombeso? Uyasisula ngombana unazo ezinye ezimbili kuhlanganise nalesi umfowethu amomotheka khona kiso.

¹⁷ Singamadanisa iinthombe esizibekako neenkhathi ezimnandi esizikhumbulako esibenazo. Kanengi siba neenkhathi ezimnandi khulu nabafowethu nabodadwethu. Kodwana kungenzeka ukuthi ngeenkhathezo umfowethu namkha udadwethu atjho namkha enze into engasiphathi kuhle. Khuyini ekufuze sikwenze ngalokho? Kubayini ungalingi ukuwusula umcabango onjalo njengalokha nawusula isithombe esimbi? (IzA. 19:11; Efe. 4:32) Singasikhohlwa isono esincani esenziwe ngumfowethu namkha ngudadwethu ngebanga leenkhathi ezinengi ezimnandi esibe nazo nabo. Iinkhathi ezinjalo sifuna ukuhlala sizikhumbula begodu siziqale njengeziqakathekileko.

KUBAYINI SILITLHOGA KHULU ITHANDO NAMHLANJESI

18. Ngimaphi amaphuzu ayihloko amalungana nethando esicoce ngawo esihlokwenesi?

¹⁸ Kubayini sifuna ukuhlala sinethando eliqinileko ngabanye? Njengombana sicocile, nasithanda abafowethu nabodadwethu sitjengisa ithando esinalo ngoJehova. Sitjengisa njani ukuthi siyabathanda abafowethu nabodadwethu? Enye indlela kubaduduza. Sizokukghona ‘ukuragela phambili siduduzana’ nange sinesirhawu. Singaragela njani phambili siba nethando eliqinileko? Ngokuthi silibalele abafowethu lokha nabenze imitjhapho nanyana ngezinye iinkhathi kubudisi ukwenza njalo.

19. Kubayini kuqakatheke khulu namhlanjesi ukuthi sithandane?

¹⁹ Kubayini kuqakatheke khulu ukuthi sithandane namhlanjesi? Tjheja ibanga elinikelwa nguPitrosi uthi: “Ukuphela kwazo zoke izinto kutjhidele. Nje-ke, . . . thandanani khulu.” (1 Pit. 4:​7, 8) Njengombana ukuphela kwephasi elimbeli kutjhidele, khuyini ekufuze siyilindele? Nakakhuluma ngabalandeli bakhe, uJesu wathi: “Nizokuhloywa ziintjhaba zoke ngebanga legama lami.” (Mat. 24:9) Bona sihlale sithembekile kuJehova naphezu kwehloyo, kufuze sibumbane. Nasenza njalo, umzamo kaSathana wokusiphadlhula phakathi angekhe uphumelele ngombana sibumbene sisoke ngethando ‘elisibopho esipheleleko sobunye.’—Kol. 3:14; Flp. 2:​1, 2.