Okulungileko Nokungakalungi: IBhayibheli—Limthombo Esingawuthemba
Angekhe siqiniseke ukuthi indlela esikhetha ukuziphatha ngayo izokuphumelela nange siyisekela endleleni esizizwa ngayo namkha endleleni abanye abazizwa ngayo. IBhayibheli liyatjho bona kubayini begodu lenza okungaphezu kwalokho. Lisisiza sazi okulungileko nokungakalungi okusenza sithabe.
SIYASITLHOGA ISINQOPHISO ESIVELA KUZIMU
EBhayibhelini, uJehovaa uhlathulula ukuthi umnqophakhe kukobana abantu bafune isinqophiso kuye, ingasi ukuthi bazinqophise bona namkha bazilawule. (Joromiya 10:23) Kungebangelo asinikele iinqophiso zokuziphatha ezifumaneka eBhayibhelini. UJehova uyasithanda begodu akafuni sithathe iinqunto ezizosizwisa ubuhlungu, zenze nokuphila kwethu kube budisi. (Duteronomi 5:29; 1 Jwanisi 4:8) Njengombana aMdalethu, unokuhlakanipha nelwazi okungasinikela indlela ephuma phambili yokuziphatha. (IRhubo 100:3; 104:24) Nanyana kunjalo, uZimu akabakateleli abantu bona baphile ngeenkambiso zakhe.
UJehova wanikela indoda nomfazi bokuthoma, u-Adamu no-Eva koke ebebakutlhoga bona bahlale bathabile. (Genesisi 1:28, 29; 2:8, 15) Wabanikela neenqophiso ezilula ebekufuze bazilalele. Wabanikela nelungelo lokuzikhethela ukuthi bazozilalela iinqophiswezo namkha awa. (Genesisi 2:9, 16, 17) Ngokudanisako, u-Adamu no-Eva bakhetha ukuphila ngeenkambiso zabo, ingasi ngeenkambiso zakaZimu. (Genesisi 3:6) Lokho kube namuphi umphumela? Kghani kuyabathabisa na abantu ukuzikhethela ukuthi ngikuphi okulungileko nokungakalungi? Awa. Ukulandisa kuyatjengisa ukuthi ukungalaleli iinkambiso zakaZimu akukulethi ukuthula nethabo okuhlala ngokungapheliko.—UMtjhumayeli 8:9.
IBhayibheli lisinikela iinqophiso esizitlhogako bona sithathe iinqunto ezihle, kunganandaba bona sihlalaphi namkha sivela emndenini onjani. (2 Thimothi 3:16, 17; funda ibhoksi elithi, “Incwadi Yabo Bonke Abantu.”) Tjheja ukuthi iBhayibheli likwenza njani lokhu.
Funda okungeziweko ngokuthi kubayini iBhayibheli libizwa ngokuthi, ‘lilizwi lakaZimu.’—1 Thesalonika 2:13. Bukela ividiyo ethi, Ngubani UmTloli WeBhayibheli? ku-jw.org.
IBHAYIBHELI LISITJELA LOKHO UZIMU AFUNA SIKWENZE
IBhayibheli lisitjela ngobuhlobo uJehova anabo nabantu kusukela ekuthomeni. Okufumaneka kilo kusisiza sizwisise umbono kaZimu ngokulungileko nokungakalungi, okuzuzisako nokulimazako. (IRhubo 19:7, 11) Iimfundo esizifumanako zihlala ziliqiniso begodu zizosisiza senze iinqunto ezihlakaniphileko ekuphileni kwethu kwaqobe.
Ngokwesibonelo, cabanga ngeseluleko esifumaneka kuzAga 13:20 esithi: “Okhamba nabahlakaniphileko uzokuhlakanipha, kodwana osebenzelana neendlhadlha kuzomkhambela kumbi.” Ikambiso le isasebenza namhlanjesi njengombana beyisebenza nekadeni. IBhayibheli lizele ngeenkambiso ezilisizo nezisebenzako.—Funda ibhoksi elinesihloko esithi, “Ukuhlakanipha KweBhayibheli Okungaphelelwa Sikhathi.”
Kungenzeka uyazibuza, ‘Kghani iBhayibheli lingakghona ukunginqophisa endleleni yokuziphatha namhlanjesi?’ Isihloko esilandelako sizokucoca ngendlela iBhayibheli elingasisiza ngayo namhlanjesi.
a UJehova ligama lakaZimu.—IRhubo 83:18.