Thembela ‘KumaHluleli Wephasi Loke’ Onesirhawu!

1. Ngisiphi isifundo esiduduzako uJehova asifundisa u-Abrahama?

BEKUYIKULUMISWANO u-Abrahama angakhenge ayilibale. UZimu wasebenzisa ingilozi ukutjela u-Abrahama ukuthi uzokutjhabalalisa idorobho leSodoma neleGomora. Kwamtshwenya u-Abrahama lokho. Wabuza uZimu ukuthi: “Kghani uzokutjhabalalisa abantu abalungileko nabakhohlakeleko?. . . Kghani umaHluleli wephasi loke angeze akwenza okulungileko?” UJehova waba nesineke wafundisa umnganakhe amthandako isifundo esizuzisa nesiduduza boke abantu: UZimu angeze atjhabalalisa abantu abalungileko.—Gen. 18:​23-33.

2. Khuyini esiqinisekisako ukuthi izahlulelo zakaJehova zilungile begodu zinesirhawu?

² Singaqiniseka njani ukuthi ukwahlulela kwakaJehova kulungile begodu kunesirhawu? Ngombana siyazi ukuthi uJehova ‘ubona okuseenhliziyweni’ zabantu. (1 Sam. 16:7) Kuhlekuhle, wazi “ihliziyo yawo woke umuntu.” (1 Kho. 8:39; 1 Kron. 28:9) Leli liqiniso elithabisako. UJehova uhlakaniphe khulu ukudlula thina, yeke angeze sihlale sizwisisa ukuthi kubayini enza iinqunto ezithileko. Kungebangelo, umpostoli uPowula aphefumulelwa bona atjho okulandelako ngoJehova uZimu: “Aziphenyeki kangangani izahlulelo zakhe!”—Rom. 11:33.

3-4. Khuyini esingazibuza yona ngezinye iinkhathi begodu khuyini esizokucoca ngayo esihlokwenesi? (Jwanisi 5:​28, 29)

³ Ngitjho nanyana sazi bona uJehova uhlala enza okulungileko, singaba neembuzo efana neyaka Abrahama. Singazibuza ukuthi: ‘Kghani abantu abafana nalaba uJehova abatjhabalalisa eSodoma neGomora bazokuvuswa godu? Kungenzeka na ukuthi abanye babo babe khona ‘nakuvuswa abangakalungi’?’—IzE. 24:15.

⁴ Akhesihlolisise lokho esikwaziko ngokuvuswa kwabahlongakeleko. Muva nje, sihlathulule indlela ebesizwisisa ngayo ‘ukuvuselwa ekuphileni’ ‘nokuvuselwa ekwahlulelweni’.a (Funda uJwanisi 5:​28, 29.) Lokho kwenze salungisa indlela ebesizwisisa ngayo, sizokucoca ngeendlela ezitjezi esihlokwenesi nesilandelako. Malungana nokwahlulela kwakaZimu okulungileko, sizokucoca ngalokho esingakwaziko nesikwaziko.

ESINGAKWAZIKO

5. Khuyini iincwadi zethu ezayitjhoko esikhathi esidlulileko malungana nalabo abatjhatjalaliswa eSodoma neGomora?

⁵ Esikhathini esidlulileko, iincwadi zethu bezikhuluma ngendlela uJehova ahlulela ngayo abangakalungi. Besithe abantu abatjhatjalaliswe nguJehova, njengebeSodoma neGomora angeze bavuswa. Kodwana ngemva kokufundisisa nokuthandaza ngendaba le, kuyakhanya ukuthi asiqiniseki ngalokho.

6. Ngiziphi ezinye zeembonelo zezahlulelo zakaJehova ngabantu abangakalungi begodu khuyini esingayaziko?

⁶ Akhesicoce ngemibuzo ehlobene nale. Kuneendaba ezinengi eBhayibhelini ezisitjela ngendlela uJehova ahlulela ngayo abantu abangakalungi. Ngokwesibonelo, ngesikhathi somThwalela uJehova watjhabalalisa boke abantu ngaphandle kwakaNowa nomndenakhe. Wasebenzisa ama-Israyeli ukutjhabalalisa iintjhaba ezilikhomba ebezihlala enarheni yesiThembiso, wasebenzisa ingilozi yinye ukutjhabalalisa amasotja we-Asiriya azii-185 000 ngobusuku bunye. (Gen. 7:23; Dut. 7:​2, 3; Isa. 37:​36, 37) Kghani iBhayibheli lithi uJehova waqunta ukuthi angeze asabavusa boke abantwaba? Awa, alitjho njalo. Kubayini sitjho njalo?

7. Khuyini esingayaziko ngabantu abatjhatjalaliswa ngomThwalela namkha lokha ama-Israyeli ahlula inarha yeKanana? (Qala esingaphandle.)

⁷ Eembonelwenezi asiqiniseki bona uJehova wabahlulela njani abantwaba begodu asazi ukuthi balifumana ithuba lokufunda ngoJehova bebatjhuguluka na. Ngesikhathi somThwalela, iBhayibheli nalikhuluma ngoNowa lithi ‘bekamtjhumayeli wokulunga.’ (2 Pit. 2:5) Alitjho ukuthi njengombana uNowa bekakha umkhumbi omkhulu, ngesikhathi esifanako bekalinga nokutjhumayeza woke umuntu ephasini. Ngendlela efanako, asazi ukuthi abantu beKanana abakhohlakeleko balifumana ithuba lokufunda ngoJehova begodu batjhugulula neendlela zabo.

8. Khuyini esingayaziko ngabantu beSodoma neGomora?

⁸ Kuthiwani ngabantu abahlongakala ngesikhathi uJehova atjhabalalisa iSodoma neGomora? Indoda elungileko, uLothi beyihlala hlangana nabantu beSodoma. Kghani sicabanga ukuthi uLothi watjhumayeza boke abantu? Awa. Bebakhohlakele kodwana bebakwazi na okulungileko? IBhayibheli likhuluma ngesiqubuthu samadoda akhohlakeleko ebesifuna ukukata iimvakatjhi zakaLothi. Isiqubuthweso besihlanganisa “amasokana namadoda amadala.” (Gen. 19:4; 2 Pit. 2:7) Kghani sicabanga bona uZimu onomusa uJehova, wahlulele boke abantwabo ngokuthi babhubhe begodu bangabi nethemba lokuvuswa? UJehova waqinisekisa u-Abrahama ukuthi nanyana bekungaba nabantu abangaphasi kwetjhumi bengekhe alitjhabalalise idorobhelo. (Gen. 18:32) Bebangakalungi begodu uJehova wabahlulela ngokwezenzo zabo. Kghani siyaqiniseka ukuthi akekho namunye kibo ozokuvuselwa ekuvukeni ‘kwabangakalungi’? Awa, asiqiniseki!

9. Khuyini esingayaziko ngoSolomoni?

⁹ Ngakwelinye ihlangothi, eBhayibhelini sifunda ngabantu abalungileko abatjhuguluka baba babantu abangakalungi. Ngokwesibonelo iKosi uSolomoni yanqotjhiswa ngeendlela zakaZimu begodu uJehova wayibusisa khulu kodwana ngokukhamba kwesikhathi yalotjha abozimu bamala. Izono zayo zasilinga uZimu khulu begodu zaletha ihlekelele iminyaka eminengi. Nanyana kunjalo, iBhayibheli lithi, “uSolomoni walaliswa nabokhokho bakhe,” okuhlanganisa indoda ethembekileko iKosi uDavida. (1 Kho. 11:​5-9, 43; 2 Kho. 23:13) Kghani indlela abulungwa ngayo iqinisekisa ukuthi uzokuvuswa? IBhayibheli ayikhulumi ngalokho. Omunye umuntu angathi, “umuntu ohlongakeleko utjhatjululiwe esonweni sakhe.” (Rom. 6:7) Nanyana kunjalo, akutjho ukuthi boke abahlongakeleko bazokuvuswa, kube ngasuthi basebenze budisi ukufumana ilungelo lokuphila godu. Ukuvuswa kwabahlongakeleko sisipho esivela kuZimethu onethando. Usinikela labo afuna ukubanikela ithuba lokuphila ngokungapheliko. (Job. 14:​13, 14; Jwa. 6:44) Kghani uSolomoni uzosifumana isiphweso? NguJehova owazi ipendulo yombuzo loyo, thina asiyazi. Nanyana kunjalo, siyazi ukuthi uJehova uzokwenza okulungileko.

ESIKWAZIKO

10. UJehova uzizwa njani ngokutjhabalalisa abantu? (Hezekiyeli 33:11) (Qala nesithombe.)

¹⁰ Funda uHezekiyeli 33:11. UJehova usitjela indlela azizwa ngayo ngokwahlulela abantu. Umpostoli uPitrosi watlola okupheze kufane nalokho okwatlolwa nguHezekiyeli wathi ‘uJehova . . . Akafisi ukuthi namunye atjhabalale.’ (2 Pit. 3:9) Amezwi la ayasiduduza ngombana asiqinisekisa ngokuthi uJehova angeze atjhabalalisa muntu ngaphandle kwalokha nakanamabanga azwakalako wokwenza njalo. Unesirhawu khulu begodu uhlala akulungele ukusitjengisa nakufaneleko.

11. Bobani engeze bavuswe begodu sikwazi njani lokho?

¹¹ Khuyini esiyaziko ngabantu engeze bavuswe? IBhayibheli lisinikela iimbonelo ezimbalwa kwaphela.b UJesu wathi uJudasi Iskariyodi angeze avuswe. (Mar. 14:21; funda godu noJwanisi 17:12.) UJudasi bekazi ukuthi akwenzako kuphikisana noJehova neNdodanakhe kodwana wakwenza nanyana kunjalo. (Funda uMarkosi 3:29 nomtlolo waphasi.)c Ngokufanako, uJesu wathi abanye abadosi phambili bezekolo bazokuhlongakala bebangavuswa. (Mat. 23:33; funda uJwanisi 19:11.) Umpostoli uPowula wayelelisa ukuthi iinhlubuki ezingatjhugulukiko angeze zivuswe.—Heb. 6:​4-8; 10:29.

12. Khuyini esiyaziko ngesirhawu sakaJehova? Nikela iimbonelo.

¹² Nanyana kunjalo, khuyini esikwaziko ngesirhawu sakaJehova? UJehova utjengise njani ukuthi “akafisi namunye bona atjhabalale”? Cabanga ngomusakhe kilabo abenza isono esikhulu. IKosi uDavida yenza izono ezimbi khulu ezihlanganisa ukufeba nokubulala. UDavida watjhuguluka begodu uJehova waba nesirhawu wamlibalela. (2 Sam. 12:​1-13) IKosi uManase beyikhohlakele khulu pheze ukuphila kwayo koke. Ngitjho nebujamenobo, uJehova waba nesirhawu, wayilibalela ngombana yatjhuguluka. (2 Kron. 33:​9-16) Iimbonelwezi zitjengisa ukuthi uJehova uba nesirhawu nakutlhogekako. Uzokuvusa abantwabo ngombana bayazi ukuthi benze isono esimbi khulu begodu batjhuguluka.

13. (a) Kubayini uJehova arhawukela abantu beNiniva? (b) Khuyini uJesu ayitjhoko ngokukhamba kwesikhathi ngabantu beNiniva?

¹³ Siyawazi nomusa uJehova awutjengisa abantu beNiniva. UZimu watjela uJona ukuthi: ‘Uyabubona ubukhohlakali babo.’ Kodwana nabatjhugulukako ezonweni zabo uJehova waba nomusa wabalibalela. Waba nesirhawu khulu ukudlula uJona. Wahlathululela umphorofidakhe osilingekileko ukuthi abantu beNiniva ‘bebangakghoni ukuhlukanisa phakathi kokumbi nokuhle.’ (Jona 1:​1, 2; 3:10; 4:​9-11) Ngemva kwesikhathi, uJesu wasebenzisa isibonelwesi ukufundisa ngobulungiswa nesirhawu sakaJehova. Wathi abantu abatjhugulukako beNiniva bazokuvuka “ngesikhathi sesahlulelo.”—Mat. 12:41.

14. Kutjho ukuthini “ukuvuselwa ekwahlulelweni” ngabantu beNiniva?

¹⁴ ‘Ngisiphi isahlulelo’ abantu beNiniva ‘abazokuvukela’ kiso? UJesu wakhuluma ngesahlulelo sokuvuswa kwabahlongakeleko. (Jwa. 5:29) Bekakhuluma ngeMinyaka eyiKulungwana yokuBusa kwakhe, lapho “abalungileko nabangakalungi” abazokuswa khona. (IzE. 24:15) Kabangakalungi kuzokuba ‘livuko lokwahlulela.’ UJehova noJesu bazokuqala indlela abangakalungi abaziphatha ngayo, baqale ukuthi bayalalela bebenze abakufundako na. Nange umuntu ovusiweko weNiniva angavumi ukulotjha uJehova angeze avunyelwe ukuragela phambili nokuphila. (Isa. 65:20) Abantu abakhetha ukulotjha uJehova ngokuthembeka bazokusinda begodu bazokufumana ithuba lokuphila ngokungapheliko.—Dan. 12:2.

15. (a) Kubayini kungakafuzi sithi boke abatjhatjalaliswa eSodoma neGomora angeze bavuswe? (b) Singawazwisisa njani amezwi atlolwe kuJuda 7? (Funda ibhoksi elithi, “Bekatjho Ukuthini UJuda?”)

¹⁵ UJesu wathi, “Ngelanga leSahlulelo” abantu beSodoma neGomora bazokuba ngcono kunabantu abangamukeli iimfundiso zakhe. (Mat. 10:​14, 15; 11:​23, 24; Luk. 10:12) Bekatjho ukuthini? Singacabanga ukuthi uJesu bekenza umfanekiso nakakhuluma ngendaba le. UJesu bekasebenzisa ikulumo yokufanisa ukutjengisa ukuthi abantu bangesikhathi sakhe bebabambi khulu ukudlula abantu beSodoma neGoroma?d Kilokhu uJesu bekangenzi umfanekiso. ‘ILanga leSahlulelo’ akhuluma ngalo lifana nalelo akhuluma ngalo ngabantu beNiniva. Abantu beNiniva benza izinto ezimbi njengabantu beSodoma neGomora. Kodwana abantu beNiniva baba nethuba lokutjhuguluka. Khumbula uJesu akutjho ‘ngokuvuselwa ekwahlulelweni.’ Kuzokuvuswa nabantu “ebebanomukghwa wokwenza okumbi.” (Jwa. 5:29) Yeke kubonakala ngasuthi likhona ithemba ngabantu beSodoma nebeGomora. Kubonakala ngasuthi abantu bazokuvuswa begodu sizokuba nethuba lokubafundisa ngoJehova nangoJesu Krestu!

16. Khuyini esiyaziko malungana nendlela uJehova aqunta ngayo ukuthi ngubani ozokuvuswa? (Joromiya 17:10)

¹⁶ Funda uJoromiya 17:10. Iveseli lisisiza sirhunyeze esikwaziko ngendlela uJehova ahlulela ngayo. Bekusolo kunguJehova, ‘ophenyisisa ihliziyo ahlolisise nemicabango edephileko.’ Naziza endabeni yokuvuswa okuzokwenzeka esikhathini esizako, uzokuhlala enza “ngokuvumelana neendlela” zomuntu ngamunye. UJehova uzokwahlulela ngokuqinileko kodwana uzokuba nesirhawu nakutlhogekako. Yeke akukafuzi siphethe ngokuthi umuntu akanalo ithemba lokuvuswa, ngaphandle kwalokha nasiqinisekako ngalokho!

“UMAHLULELI WEPHASI LOKE” ‘UZOKWENZA OKULUNGILEKO’

17. Khuyini ezokwenzeka ebantwini abahlongakeleko?

¹⁷ Kusukela u-Adamu no-Eva bahlanganyela noSathana ekuhlubukeni kuJehova uZimu, abantu abanengi bahlongakele. Ukufa, “kusisitha” esimbi esibulele abantu abanengi! (1 Kor. 15:26) Kuzokwenzekani ngabantwaba? Abalandeli bakaKrestu abathembekileko abayi-144 000 bazokuvuselwa ezulwini, bafumane ukuphila okungafiko. (sAm. 14:1) Inani elikhulu lamadoda nabafazi abathanda uJehova lizokuba yingcenye ‘yokuvuswa kokulunga’ begodu bazokuphila ngokungapheliko ephasini, bahlale balungile hlangana neMinyaka eyiKulungwana yokuBusa kwakaKrestu nahlangana kokulingwa kwamaswaphela. (Dan. 12:13; Heb. 12:1) Ngesikhathi seminyaka eyiKulungwana, “abalungileko” kuhlanganise abangakhenge balotjhe uJehova, nalabo “ebebanomukghwa wokwenza okumbi” bazokufumana ithuba lokutjhugulula iindlela zabo bathembeke. (Luk. 23:​42, 43) Nanyana kunjalo, abanye bebakhohlakele khulu, bakhetha ukuhlubuka kuJehova nehloswakhe, kangangokuthi waqunta ukuthi angekhe bavuswe.—Luk. 12:​4, 5.

18-19. (a) Kubayini singaqiniseka ngezahlulelo zakaJehova ngalabo abahlongakeleko? (Isaya 55:​8, 9) (b) Khuyini esizokucoca ngayo esihlokweni esilandelako?

¹⁸ Kghani singaqiniseka ukuthi lokha uJehova nakahlulela abantu uzokuhlala enza isiqunto esifaneleko? Iye! Njengombana u-Abrahama bekazwisisa kuhle bona uJehova akanasono, uhlakaniphile, ‘ungumaHluleli onesirhawu wephasi loke.’ Ubandule iNdodanakhe bewayinikela ilungelo lokwahlulela. (Jwa. 5:22) Bobabili uBaba neNdodana, bakghona ukufunda ihliziyo yomuntu ngamunye. (Mat. 9:4) Yeke nabahlulelako bazokuhlala benza ‘okulungileko’!

¹⁹ Asizimiseleni ukuhlala sithemba ukuthi uJehova wazi okungcono khulu. Siyazi ukuthi asinalungelo lokwahlulela kodwana nguJehova onalo. (Funda u-Isaya 55:​8, 9.) Kungebangelo sithemba uJehova neNdodanakhe bona kube ngibo abahlulelako. Yeke siyazi ukuthi iKosethu uJesu izokulingisa ubulungisa nomusa kaJehova. (Isa. 11:​3, 4) Khuyini-ke esingayitjho malungana nesahlulelo sakaZimu esimalungana nesizi elikhulu? Khuyini esingayaziko? Khuyini esiyaziko? Isihloko esilandelako sizokuphendula imibuzo le.