Lingisa Iingilozi Ezithembekileko

1-2. (a) Sihluke njani neengilozi? (b) Khuyini esifana ngayo neengilozi?

NJENGOMBANA sibabantu bakaJehova, simndeni onethando olotjha uJehova, ohlanganisa neengilozi ezinengi khulu ezithembekileko. (Dan. 7:​9, 10) Nasicabanga ngeengilozi, kungenzeka sicabanga ngendlela ezihluke ngayo kithi. Ngokwesibonelo, iingilozi zaba khona kade khulu ukudlula thina. (Job. 38:​4, 7) Zinamandla ukudlula thina. Zicwengile bezilunge khulu kunathi ngombana thina sinesono.—Luk. 9:26.

² Nanyana kunjalo, naphezu kokuhluka okungaka, zinengi izinto esifana ngazo neengilozi. Ngokwesibonelo, nathi sikghona ukuba nobuntu obuhle bakaJehova njengazo. Njengeengilozi, sikghona ukuzenzela iinqunto. Zinamagama, ubuntu nezabelo ezingafaniko, nathi sinjalo. Njengazo, sifisa ukulotjha uZimu uMdalethu.—1 Pit. 1:12.

3. Singafundani eengilozini ezithembekileko?

³ Njengombana sinezinto ezinengi kangaka esifana ngazo neengilozi, isibonelo sazo singasikhuthaza begodu sisifundise izinto ezinengi eziqakathekileko. Esihlokwenesi, sizokufunda ukuthi singakulingisa njani ukuthobeka kweengilozi ezithembekileko, ithando lazo ngabantu, ukukghodlhelela nomsebenzi eziwenzako wokuqinisekisa bona ibandla lihlwengile.

IINGILOZI ZITHOBEKILE

4. (a) Iingilozi zikutjengise njani ukuthobeka? (b) Kubayini iingilozi zithobekile? (IRhubo 89:7)

⁴ Iingilozi ezithembekileko zithobekile. Nanyana zinelemuko elinengi, zinamandla, zihlakaniphile begodu zilalela iinqophiso zakaJehova. (Rhu. 103:20) Njengombana zenza izabelo zazo, azikhambi zizikhakhazisa ngalokho ezikwenzileko namkha ngamandla ezinawo. Zithabela ukwenza intando kaJehova nanyana amagamazo singawazi.a (Gen. 32:​24, 29; 2 Kho. 19:35) Azifuni ukwamukela iphazimulo efanele uJehova. Kubayini iingilozi zithobeke kangaka? Kungebanga lokuthi zithanda uJehova begodu ziimhlonipha ngokusuka ehliziyweni.—Funda iRhubo 89:7.

5. Enye ingilozi yakutjengisa njani ukuthobeka nayilungisa umpostoli uJwanisi? (Qala nesithombe.)

⁵ Cabanga ngesenzakalo sinye esitjengisa ukuthobeka kweengilozi. Ngabo-96 C.E., ingilozi engabizwa ngegama yatjela umpostoli uJwanisi umlayezo orarako. (IsAm. 1:1) UJwanisi wasabela njani embonweni loyo? Walinga ukulotjha ingilozi leyo. Nanyana kunjalo, isibunjwa somoya esithembekilekwesi samlungisa msinya, sathi: “Yelela! Ungakwenzi lokho! Ngiyinceku nje kwaphela ekunye nawe nabafowenu . . . Lotjha uZimu!” (IsAm. 19:10) Qala bona kuthobeka okungangani lokho! Ingilozi le beyingafuni iphazimulo namkha ukubukwa. Msinyana, yatjela uJwanisi bona alotjhe uJehova. Ngesikhathi esifanako, akhenge imnyaze uJwanisi. Nanyana besele ilotjhe uJehova isikhathi eside, inamandla ukudlula uJwanisi, ngokuthobeka yamtjela ukuthi baziinceku boke. Yalungisa indlela kaJwanisi yokuqala izinto kodwana akhenge imkgharameje namkha imphathe kabuhlungu. Kunalokho, yakhuluma naye ngomusa. Kungenzeka yalemuka ukuthi uJwanisi bekenza lokho ngombana bekararwe mbono awubonileko.

6. Singakulingisa njani ukuthobeka kweengilozi?

⁶ Singakulingisa njani ukuthobeka kweengilozi? Lokho singakwenza ngokuthi senze izabelo zethu ngaphandle kokuzikhakhazisa namkha sifune ukubukwa ngalokho esikwenzileko. (1 Kor. 4:7) Ukungezelela kilokho, akukafuzi sizizwe sibakhulu nange sele silotjhe uJehova isikhathi eside kunabanye namkha sinamalungelo athileko. Ngokuhlukileko, nasiba namalungelo angeziweko, kulapho ekufuze sizibone sibancani khona kunabanye. (Luk. 9:48) Njengeengilozi, sifuna ukusebenzela abanye. Asifuni nakancani ukuziphakamisa.

7. Singakutjengisa njani ukuthobeka lokha nakufuze silungise namkha siluleke othileko?

⁷ Singatjengisa ukuthobeka lokha nakufuze siluleke namkha silungise othileko, kungaba mumuntu esilotjha naye namkha umntwanethu. Ngezinye iinkhathi kungatlhogeka ukuthi sinikele iseluleko esiqinileko. Njengengilozi eyalungisa uJwanisi ngomusa, nathi singabeka indaba njengombana injalo kodwana singamqedi amandla umuntu esimululekako. Nasingabalekela ukuzibona singcono kunabanye, lokho kuzosenza sinikele iseluleko esivela eBhayibhelini ngendlela enehlonipho nenethando.—Kol. 4:6.

IINGILOZI ZIYABATHANDA ABANTU

8. (a) NgokwakaLukasi 15:​10, iingilozi zitjengise njani ukuthi ziyabathanda abantu? (b) Iingilozi zidlala yiphi indima emsebenzini wokutjhumayela? (Qala esingaphandle.)

⁸ Iingilozi azibabethisi ngomoya abantu namkha zicabange ukuthi abakaqakatheki. Kunalokho, ziyabathanda. Ziyathaba lokha isoni nasitjhugulukako, lokha imvu elahlekileko nayibuyela kuJehova namkha omunye nakatjhugulula indlela aphila ngayo bese eze eqinisweni. (Funda uLukasi 15:10.) Iingilozi zibuye zibe majadu ngomsebenzi wokutjhumayela ngomBuso ephasini loke. (IsAm. 14:6) Nanyana zingatjhumayezi abantu ngokunqophileko, zinganqophisa umrhuweleli emuntwini ofuna ukufunda ngoJehova. Kuliqiniso, angekhe satjho kuzale umlomo bona ingilozi isinqophise emuntwini othileko. Lokhu sikutjho ngombana uJehova angasebenzisa iindlela ezinengi, ezifana nomoya ocwengileko, ukusiza abantu namkha ukunqophisa abantu bakhe. (IzE. 16:​6, 7) Nanyana kunjalo, uJehova usazisebenzisa iingilozi bona zisisize nasitjhumayelako. Yeke, qiniseka bona iingilozi ziyakusekela nawutjhumayelako. Funda ibhoksi elithi, “Imithandazwabo Yaphendulwa.”

9. Singasilingisa njani isibonelo seengilozi sokuthanda abantu?

⁹ Singasilingisa njani isibonelo seengilozi sokuthanda abantu? Nasizwa bona kunomuntu othileko obuyiselwe ebandleni, singathaba njengombana kwenza iingilozi. Singenza esingakghona ukukwenza ukwamukela umfowethu namkha udadwethu besimqinisekise ukuthi siyamthanda. (Luk. 15:​4-7; 2 Kor. 2:​6-8) Singazilingisa godu iingilozi ngokuthi senze koke okusemandlenethu bona sitjhumayele. (UMtj. 11:6) Njengombana iingilozi zisisekela nasitjhumayelako, nathi singafuna iindlela zokusekela abafowethu nabodadwethu nabatjhumayelako. Ngokwesibonelo, kghani angekhe na senza ihlelo lokukhamba nabangakajayeli ukutjhumayela? Kghani singasekela abafowethu nabodadwethu abalupheleko namkha ababuthakathaka, nabayokutjhumayela?

10. Sifundani kilokho okwenzeke ku-Sara?

¹⁰ Kuthiwani nangabe ubujamo bethu bungasivumeli senze okunengi? Singafumana iindlela ezitja zokusebenza neengilozi emsebenzini wokutjhumayela. Cabanga ngalokho okwenzeke ku-Sara,b udadwethu we-Indiya. Ngemva kokuphayona iminyaka engaba ma-20, u-Sara wathoma ukugula begodu wabhalelwa kuvuka embhedeni. Kwamgandelela khulu lokho. Ngesekelo labafowethu nabodadwethu nokufunda kwakhe iBhayibheli qobe, wakghona ukulungisa indlela acabanga ngayo. Kwafuze afumane iindlela ezitja zokutjhumayela. Njengombana bekangakghoni ukuvuka bona atlole iincwadi, bekangatjhumayela kwaphela ngomtato. Yeke, wafowunela abantu egade atjhumayele kibo phambilini bese kuthi abantwaba bamtjele ngabanye abantu abangathanda ukufunda iBhayibheli. Waba yini umphumela? Kungakapheli iinyanga ezinengi, u-Sara waba neemfundo zeBhayibheli ezima-70 begodu bekangakghoni ukuzifundela zoke! Yeke, wahlela bona ezinye iimfundo zakhe zifunde namanye amalunga webandla. Ezinengi iimfundwezo sikhuluma nje ziyaya esifundweni. Cabanga bona iingilozi zithaba kangangani ukusebenza nabafowethu nabodadwethu abanjengo-Sara, abenza koke okusemandlenabo bona batjhumayele.

IINGILOZI ZIYAKGHODLHELELA

11. Iingilozi ezithembekileko zikutjengise njani ukukghodlhelela?

¹¹ Iingilozi ezithembekileko zisibekela isibonelo esiphuma phambili sokukghodlhelela. Zikghodlhelelele ukungabi nobulungiswa nokukhohlakala iminyaka eminengi. Bezikhona lokha uSathana nezinye iingilozi ebezisebenza nazo zivukela uJehova. (Gen. 3:1; 6:​1, 2; Jud. 6) IBhayibheli lisitjela ngengilozi yinye ethembekileko eyaphikiswa lidimoni elinamandla. (Dan. 10:13) Ukungezelela kilokho, emlandweni woke wabantu, iingilozi zibone idlanzana kwaphela labantu abalotjha uJehova ngendlela ayamukelako. Nanyana kunjalo, iingilozezi ziragele phambili nokulotjha uJehova ngethabo nangakho koke ezinakho. Ziyazi ukuthi ngesikhathi esifaneleko, uJehova uzokuqeda koke ukungabi nobulungiswa.

12. Khuyini engasisiza sikghodlhelele?

¹² Singasilingisa njani isibonelo seengilozi sokukghodlhelela? Njengeengilozi, kungenzeka sibone ukungabi nobulungiswa namkha siqalane nokuphikiswa. Siyaqiniseka njengazo ukuthi uZimu uzokuqeda koke ukukhohlakala ngesikhathi sakhe esifaneleko. Yeke, ‘asilisi ukwenza okuhle’ ngombana silingisa iingilozi ezithembekileko. (Gal. 6:9) UZimu uthembisa ukusisiza sikghodlhelele. (1 Kor. 10:13) Singathandazela bona uJehova asisize ngomoyakhe ocwengileko ozosisiza sibekezele besithabe. (Gal. 5:22; Kol. 1:11) Kuthiwani nangabe siqalene nokuphikiswa? Thembela kuJehova ngokupheleleko begodu ungathukwa. UJehova uzokusekela begodu uzokuqinisa.—Heb. 13:6.

IINGILOZI ZISIZA IBANDLA LIHLALE LIHLWENGILE

13. Ngisiphi isabelo esikhethekileko iingilozi ezinazo emihleni yokuphela? (Matewu 13:​47-49)

¹³ Emihleni yokuphela, uJehova unikele iingilozi isabelo esikhethekileko. (Funda uMatewu 13:​47-49.) Kunabantu ephasini abafuna ukuzwa iindaba ezimnandi. Abanye bathatha amagadango wokuba maKrestu weqiniso, kukulapho abanye bangawathathi. Iingilozi zabelwe bona “ziyokuhlukanisa abambi hlangana nabalungileko.” Lokhu kutjho ukuthi zabelwe bona zivikele ukucwengeka kwebandla. Lokhu akutjho ukuthi abalise ukuhlanganyela nathi angekhe basabuya nokuthi ibandla angekhe libe nemiraro. Nanyana kunjalo, singaqiniseka bona iingilozi zisebenza budisi ukwenza ibandla lihlale lihlwengile.

14-15. Singasilingisa njani isibonelo seengilozi besitjengise nokobana sifisa ibandla lihlale lihlwengile? (Qala nesithombe.)

¹⁴ Singasilingisa njani isibonelo seengilozi besitjengise nokobana sifisa ibandla lihlale lihlwengile? Kufuze sisebenze budisi ukuvikela itjhebiswano lethu noJehova. Lokhu singakwenza ngokuthi sikhethe abangani abathanda uJehova begodu sikhambele kude kinanyana yini engalimaza itjhebiswano lethu naye. Ngendlela le, sizokwenza ibandla lihlale lihlwengile. (Rhu. 101:3) Singasiza nabantu esilotjha nabo bahlale bathembekile kuJehova. Ngokwesibonelo, kuthiwani nangabe sizwe bona umuntu esilotjha naye wenze isono esikhulu? Singakhuthaza owonileko ukuthi ayokukhuluma nabadala ngombana siyamthanda. Nangabe uyahluleka ukwenza njalo, thina sizobatjela abadala. Sifuna umfowethu namkha udadwethu olimaze itjhebiswano lakhe noJehova afumane isizo ngokurhabako!—Jak. 5:​14, 15.

¹⁵ Kuyadanisa ukwazi ukuthi abanye abenze izono ezikulu basusiwe ekuhlanganyeleni. Abantu abanjalo, ‘asizihlanganisi’ nabo.c (1 Kor. 5:​9-13) Ilungiselelweli lisiza ibandla lihlale lihlwengile. Ngaphezu kwalokho, siba nomusa kosusiweko nasingazihlanganisi naye. Ukusekela kwethu isiqunto sokususwa kwabo kungabenza baqaquluke bese babone izinto ngendlela kaJehova. Nange benza njalo, sizokuthaba noJehova neengilozi zakhe zizokuthaba.—Luk. 15:7.

16. Ngiziphi iindlela esingalingisa ngazo iingilozi?

¹⁶ Qala, kulilungelo elihle kangangani lokukghona ukubona lokho okwenzeka ezulwini begodu sisebenze neengilozi! Asilingiseni ubuntu bazo obuhle: Ukuthobeka, ukuthanda abantu, ukubekezela nokutshwenyeka ngokuhlwengeka kwebandla. Nasilingisa ukuthembeka kweengilozi, nathi singaba mndeni kaJehova omlotjha ngokungapheliko.