“Umumuntu Oligugu”!

1-2. Khuyini engasisiza siqiniseke ukuthi siligugu emehlweni kaJehova?

ABANTU bakaJehova baligugu kuye kodwana kunabanye abangazizwa njalo. Kungenzeka kungebanga lokuthi abantu akhenge babaphathe kuhle namkha babenza bazizwe bangasililitho. Kghani lokho khekwenzeka kuwe? Nange kunjalo, khuyini engakusiza ukghone ukubona ukuthi uligugu emehlweni kaJehova?

² Okhunye okungakusiza kukuthi ufunde iindaba eziseBhayibhelini, ezitjengisa ukuthi uJehova ufuna abantu bakhe baphathwe njani. INdodanakhe, uJesu yaphatha abantu ngehlonipho nangomusa. Ngokwenza njalo yatjengisa ukuthi yona noYise baqala abantu njengabaqakathekileko begodu baligugu kibo. (Jwa. 5:19; Heb. 1:3) Esihlokwenesi sizokucoca: (1) ngendlela uJesu asiza ngayo abanye abantu balemuka indlela abaqakatheke ngayo nokuthi (2) singaziqinisekisa njani ukuthi siligugu kwamambala emehlweni kaZimu.—Hag. 2:7.

INDLELA UJESU ASIZA NGAYO ABANTU BAKGHONA UKUBONA INDLELA ABAQAKATHEKE NGAYO

3. UJesu wabaphatha njani abantu beGalile lokha nabazokubawa isizo kuye?

³ Lokha uJesu nakatjhumayela eGalile, abantu abanengi beza kuye ukuzomlalela nokuthi abalaphe ekuguleni kwabo. UJesu watjheja ukuthi ‘bebahlukumezekile balahliwe njengezimvu ezinganamelusi.’ (Mat. 9:36) Abadosiphambili bezekolo bebabaqala ngasuthi abasililitho begodu badurhisiwe, bebababiza nangokuthi ‘baqalekisiwe.’ (Jwa. 7:​47-49) Nanyana kunjalo, uJesu akhenge abaqalele phasi ngombana wenza isikhathi sokuthi abafundise bekabalaphe. (Mat. 9:35) Ngaphezu kwalokho, bona akghone ukusiza abantu abanengi, wabandula abapostoli bakhe emsebenzini wokutjhumayela begodu wabanikela amandla wokulapha.—Mat. 10:​5-8.

4. Khuyini esiyifundako endleleni uJesu aphatha ngayo abantu ebebaqalelwa phasi?

⁴ Ngokuphatha abantu ebebamlaleleko ngomusa nangehlonipho, uJesu bekatjengisa ukuthi yena noYise baqala abantu abaqalelwa phasi njengabantu abaqakathekileko. Nange ulotjha uJehova begodu uzizwa ngasuthi awusiligugu kuye cabanga ngendlela uJesu ebekaphatha ngayo abantu. Ukwenza njalo kuzokusiza ubone ukuthi uligugu kangangani kuJehova.

5. Khuyini esiyaziko ngomfazi uJesu ahlangana naye eGalile?

⁵ UJesu akhenge afundise isiqubuthu kwaphela kodwana bekatjheja umuntu ngamunye. Ngokwesibonelo, nakatjhumayela eGalile, uJesu wahlangana nomfazi obekaphopha iingazi iminyaka engaba li-12. (Mar. 5:25) Ngebanga lobulwelobu bekaqalwa njengomuntu osilapheleko. Yeke nanyana ngubani obekangamthinta naye bekazokusilaphala. Kungenzeka bekangakatjhaphuluki ukuhlangana nabanye abantu okutjho ukuthi esikhathini esinengi bekaba yedwa. Bengekhe ahlangane nabanye ngesikhathi sokulotjha uJehova esinagogeni namkha ngeenkhathi zeminyanya ethileko. (Lev. 15:​19, 25) Yeke umfazi lo bekangaguli kwaphela kodwana kungenzeka bekazizwa angathandwa namkha azizwa angasililitho.—Mar. 5:26.

6. Khuyini umfazi lo ayenzako bona alapheke?

⁶ Umfazi lo bekafuna uJesu amlaphe. Nanyana kunjalo, akhenge aye kuye ngokunqophileko. Kubayini? Kungenzeka kungebanga lokobana bekaneenhloni ngobujamo bakhe. Namkha kungenzeka bekasaba ukuthi uJesu uzokuthi akhambe nakangena hlangana nesiqubuthu ngebanga lokobana ngokomThetho bekasilaphele. Yeke wathinta isambatho sakaJesu sangaphandle, anesiqinisekiso sokobana uzokuphola. (Mar. 5:​27, 28) Kwamambala ukukholwa kwakhe kwamlapha. Ngemva kwalokho, uJesu wabuza ukuthi ngubani omthintileko umfazi lo waziveza wakhuluma ngalokho akwenzileko. UJesu wamphatha njani?

7. UJesu wamphatha njani umfazi obekezwa ubuhlungu? (Markosi 5:34)

⁷ UJesu waphatha umfazi lo ngomusa nangehlonipho. Walemuka ukuthi ‘bekahlengezela ngokwesaba.’ (Mar. 5:33) UJesu nakabona indlela ebekazizwa ngayo, waba nomusa kuye wabe wamkhuthaza. Wabe wambiza nangokuthi “ndodakazi,” wasebenzisa igameli ingasi ukutjengisa bona uyamhlonipha kwaphela kodwana umtjengisa umusa nethando. (Funda uMarkosi 5:34.) EBhayibhelini, kulapha kwaphela uJesu abiza umfazi ngokuthi “ndodakazi” kungenzeka kungebanga lokobana wabona indlela umfazi lo ebekathukwe ngayo, ungacabanga ukuthi umfazi lo nakezwa lokho wathaba kangangani. Ngathana uJesu akhenge akhulume naye ngomusa nangethando kungenzeka bekazokukhamba alaphekile kodwana azizwa amlandu. Kunalokho uJesu wamsiza wakghona ukubona lokho angikho, ukuthi uyindodakazi eligugu kuYise wezulwini onethando.

8. Udadwethu we-Brazil waqalana naziphi iintjhijilo?

⁸ Namhlanjesi ngendlela efanako abantu abalotjha uJehova baqalene nemiraro yezepilo ethinta amazizwabo. U-Maria,a oliphayona lesikhathi esizeleko e-Brazil, wabelethwa angananyawo nesandla sangesinceleni. Nakahlathululako uthi: “Esikolweni bebahlala bahlekisa ngami ngebanga lokurholophala enginakho. Bebangibiza ngamagama abuhlungu. Ngitjho neemndeninekhaya bebangangiphathi kuhle.”

9. Khuyini eyasiza u-Maria wazibona aligugu kuJehova?

⁹ U-Maria wafumana liphi isizo? Nakaba nguFakazi kaJehova, abafowethu nabodadwethu bebandleni lakhe bamduduza bamsiza wakghona ukuziqala ngendlela uJehova amqala ngayo. Uthi: “Abafowethu nabodadwethu abanengi bangisiza khulu! Ngimthokoza ngehliziywami yoke uJehova ngokunginikela umndeni omuhle kangaka ebandleni.” Abafowethu nabodadwethu basiza u-Maria wakghona ukuzibona ukuthi uligugu emehlweni kaZimu.

10. UMariya Marhdalina bekanamuphi umraro? (Qala neenthombe.)

¹⁰ Cabanga ngendlela uJesu asiza ngayo uMariya Marhdalina. Bekanamadimoni alikhomba! (Luk. 8:2) Amadimoni kungenzeka bekamenza enze izinto ezingakajayeleki begodu kungenzeka ngebanga lalokho abantu bebangafuni ukuzihlanganisa naye. Hlangana nesikhathi esibudisesi ekuphileni kwakhe, bekasaba, ezwa ubuhlungu, acabanga bona akekho umuntu omthandako, angazithembi begodu kunganalapha angafumana isizo khona. Kungenzeka uJesu wakhupha amadimoni la ebekamtshwenya, waba mlandeli othembekileko kaJesu. Kungaziphi ezinye iindlela uJesu asiza ngazo uMariya Marhdalina azwisise bona uligugu kangangani kuZimu?

11. UJesu watjengisa njani uMariya Marhdalina bona uligugu emehlweni kaZimu? (Qala neenthombe.)

¹¹ UJesu wamema uMariya Marhdalina bona akhambe naye emakhambweni ebekawakhamba nakayokutjhumayela.b Ngebanga lalokho wakghona ukuzuza khulu nakezwa uJesu afundisa abanye. UJesu wabe wavela kuMariya ngelanga avuswa ngalo. Bekungomunye wabalandeli bakhe bokuthoma akhuluma nabo ngelangelo. UJesu wabe wamthuma bona ayokwazisa abanye abapostoli bona uvusiwe. Lokho kwatjengisa kwamambala ukuthi bekaligugu kuJehova!—Jwa. 20:​11-18.

12. Hlathulula bona khuyini eyenza u-Lidia wazizwa angathandwa begodu angasi lilitho.

¹² NjengoMariya Marhdalina, inengi lethu namhlanjesi lilwisana nokuzizwa lingasi lilitho. U-Lidia, udadwethu we-Spain, ngaphambi kobana abelethwe unina bekacabanga ukurhulula umbungu. U-Lidia uyakhumbula ukuthi ngitjho nanyana bekamntwanyana unina bekanganandaba naye bekangamphathi kuhle begodu akhuluma namagama abuhlungu kuye. Uthi: “Umnqophami ekuphileni bekukukuthi abantu bangamukele bebangithande. Benginevalo lokuthi angisumumuntu ofanelwe kuthandwa ngebanga lokuthi umma qobe bekangitjela ukuthi ngimumuntu omumbi.”

13. Khuyini eyasiza u-Lidia wazibona aligugu emehlweni kaJehova?

¹³ Ngemva kobana u-Lidia afunde iBhayibheli izinto zatjhuguluka, ukuthandaza kuJehova, ukufunda iBhayibheli, amezwi anomusa nezenzo ezihle zabafowethu zamsiza wakghona ukuzibona aligugu emehlweni kaJehova. Uthi: “Ngaso soke isikhathi ubabakwami uhlala angitjela ukuthi uyangithanda. Qobe ungikhumbuza ngobuntu bami obuhle. Nabanye abangani bami benza okufanako.” Kghani kukhona umuntu omcabangako otlhoga ukusizwa bona azibone ukuthi uligugu emehlweni kaJehova?

SINGAZIQALA NJANI NGENDLELA UJEHOVA ASIQALA NGAYO?

14. Yoku-1 kaSamyela 16:7 isisiza njani sikghone ukubona indlela uJehova aqala abantu ngayo? (Funda ibhoksi elithi, “Kubayini UJehova Aqala Abantu Bakhe Njengabaqakathekileko?”)

¹⁴ Khumbula ukuthi uJehova akakuqali ngendlela iphasi elikuqala ngayo. (Funda yoku-1 kaSamyela 16:7.) Abantu abanengi ephasini baqala umuntu njengoqakathekileko kibo ngendlela aqaleka ngayo, imali anayo nokuthi ufundephi kodwana uJehova akasiqali njalo. (Isa. 55:​8, 9) Kunokobana uqale ukuqakatheka kwakho ngendlela iphasi elikuqala ngayo, hlolisisa ukuthi uqakatheke kangangani ngokuya ngokwakaJehova. IBhayibheli likhuluma ngabantu eenkhathini ezinengi ebebazizwa bangasililitho njengo-Eliya, uNawomi noHana. Njengombana ufunda ngabo, tjheja ukuthi uJehova bekabathanda kangangani. Ungatlola phasi izinto ezihlukahlukeneko ekhezakwenzakalela ebezitjengisa bona uJehova ukuthanda kangangani begodu unendaba nawe. Ukungezelela kilokho ungabuyela emva uhlolisise isihloko esimalungana nendlela abantu abaqakatheke ngayo kuJehova esifumaneka eencwadini zethu.c

15. Kubayini uJehova aqala uDanyela ‘njengomuntu oligugu’? (Danyela 9:23)

¹⁵ Hlala uzikhumbuza ukuthi ukuthembeka kwakho kuJehova kukwenza uqakatheke kuye. Khekwaba nesikhathi umphorofidi uDanyela sele aneminyaka engaphezu kwema-90 wazizwa ‘adinwe khulu’ begodu adanile. (Dan. 9:​20, 21) UJehova wamkhuthaza njani uDanyela? Wathumela ingilozi uGabhariyeli ukukhumbuza uDanyela ukuthi ‘bekamumuntu oligugu’ nokuthi umthandazwakhe uzwakele. (Funda uDanyela 9:23.) Khuyini eyenza uDanyela waqakatheka kuJehova? Hlangana nobuntu obuhle ebekanabo, ithando ngobulungisa nokuthembeka kwakhe ngikho kwamenza wabaligugu. (Hez. 14:14) UJehova wafaka indaba le eBhayibheli bona ikghone ukusiduduza. (Rom. 15:4) UJehova uyayilalela imithandazwakho begodu uqakathekile kuye ngombana uthanda ukwenza okulungileko bewumlotjha ngokuthembeka.—Mik. 6:8; Heb. 6:10.

16. Khuyini engakusiza ubone uJehova njengoBaba olithando?

¹⁶ Bona uJehova njengoBaba okuthandako. Ufuna ukukusiza ingasi ukufumana imitjhaphakho. (Rhu. 130:3; Mat. 7:11; Luk. 12:​6, 7) Ukucabanga ngalokho kusize abanengi baqalana nokuhlula ukuzizwa ngasuthi abasililitho. Ngokwesibonelo, cabanga ngodadwethu u-Michelle we-Spain, wazizwa angasililitho ngemva kweminyaka eminengi atlhoriswa ngubabakwakhe ngamagama. Uthi “Nangithoma ukuzizwa ngasuthi angisililitho ngilinga ukucabanga uJehova angisingathe ngezandla zakhe anginikela ithando nesivikelo.” (Rhu. 28:9) U-Lauren udadwethu weSewula Afrika, uthi uzikhumbuza ngalokhu: “Nange uJehova angidosele kuye ngomusa nangethando asolo angibeke eduze kwakhe yoke iminyaka le, bekangisize ukuthi ngikghone ukufundisa abantu, kwamambala ungiqala njengomuntu oligugu, oqakathekileko nosebenzisekako.”—Hos. 11:4.

17. Khuyini engakusiza uqiniseke ukuthi uJehova uyakuthanda? (IRhubo 5:12) (Qala nesithombe.)

¹⁷ Qiniseka bona uJehova uyakuthanda. (Funda iRhubo 5:12.) UDavida wamadanisa ithando lakaJehova ‘njengesihlangu esikhulu’ esivikela abantu abalungileko. Ukwazi ukuthi uJehova uyasithanda begodu uyasisekela kungasisiza bona singasolo sizizwa kabuhlungu begodu sizizwa singasililitho. Ungazi njani bona uJehova uyakuthanda? Njengombana sibonile uJehova usiqinisekisa ngeliZwi lakhe. Ukungezelela kilokho usebenzisa abadala, abangani nabanye ukukukhumbuza bona uligugu kangangani emehlwenakhe. Kufuze uzizwe njani ngesikhuthazwesi?

18. Lokha abantu nabakubuka ngezinto ezihle kubayini kufuze ukwamukele lokho?

¹⁸ Abantu abakwaziko, abakuthandako nabakutjela izinto ezihle ozenzako ungacabangi ukuthi bakuleyela amala. Khumbula bonyana uJehova usebenzisa bona ukutjengisa ukuthi uyakuthanda. U-Michelle ekukhulunywe ngaye ngaphambilini uthi: “Kancani kancani ngifunda ukwamukela amezwi anomusa. Kubudisi kodwana ngiyazi bona ngilokho uJehova afuna ngikwenze.” U-Michelle uzuze khulu ngesizo alifumene kubadala abanethando. Nje uliphayona begodu usiza e-Bethel asekhaya.

19. Kubayini ungaqiniseka ukuthi uligugu emehlweni kaJehova?

¹⁹ UJesu uyasikhumbuza ukuthi siqakatheke khulu kuBabethu wezulwini. (Luk. 12:24) Yeke singaqiniseka bona usiqala njengabantu abaligugu. Kwanga singahlala sikukhumbula lokhu. Asenzeni koke okusemandlenethu ukusiza abanye bazibone baligugu emehlweni kaZimu!