Kghani Ama-Olympics Angenza Abantu Babumbane Kwamambala?—Lithini IBhayibheli?

Kuma-Summer Olympics ka-2024 kuzokuba nabantu abangaba ziingidigidi ezihlanu abazokubukela abadlali abavela eenarheni ezima-206. U-Thomas Bach, ongumongameli we-International Olympic Committee uthi: “Siyingcenye ebumbanisa iphasi bona libe nokuthula.” “Asithabeleni ama-Olympics la ngomoya wokuthula njengabantu ababumbeneko nanyana singafani.”

Kghani ama-Olympics angakghona ukufikelela umnqopho omkhulu kangaka wokubumbanisa abantu? Kghani kungenzeka bona kube nokuthula nokubumbana kwamambala?

Umthombo wokuthula nokubumbana?

Ama-Olympics womnyaka lo awasingewezemidlalo kwaphela. Zemidlalo ziveze imiraro yehlalakuhle neyezepolotiki njengezinto ezihlukanisa abantu. Imiraro le ihlanganisa amalungelo wabantu, ukubandlululana ngokobutjhaba, ngokwekolo nokungalingani.

Nakuba nama-Olympics weentjhaba ezihlukahlukeneko kuba nezokuzithabisa. Nanyana kunjalo, izenzakalwezi zenza abantu batjengise ubujamo bomkhumbulo nezenzo ezibahlukanisako kunokuthuthukisa ukuthula nokubumbana.

IBhayibheli labikezela ngobujamo obenza kube budisi ngabantu bona babumbane namhlanjesi. (2 Thimothi 3:1-5) Bona ufunde okungeziweko ngesiphorofidwesi seBhayibheli funda isihloko esithi “Ingabe IBhayibheli Layibikezela Indlela Abantu Abacabanga Nabenza Ngayo Namuhla?”

Ithemba lamambala labantu abasephasini lokuthula nokubumbana

IBhayibheli linethemba lamambala lokuthi kuzokuba nokuthula nokumbana ephasini loke. Lithembisa ukuthi abantu boke bazokubumbana ngaphasi kwakarhulumende wezulwini obizwa ngokuthi ‘mBuso kaZimu.’—Lukasi 4:43; Matewu 6:10.

IKosi yomBuso loyo uJesu Krestu, izokuletha ukuthula ephasini loke. IBhayibheli lithi:

• “Abalungileko bazokutlhurha, nokuthula kuzokuba kukhulu.”—IRhubo 72:7.

• “Uzokuhlangula abatlhagako abalilela isizo . . . Uzobahlangula ekugandelelweni nenturhwini.”—IRhubo 72:12, 14.

Namhlanjesi, iimfundiso zakaJesu zenze iingidi zabantu zabumbana eenarheni ezima-239. NjengamaKrestu, aboFakazi bakaJehova ephasini loke bafunde ukuba nokuthula. Ukufumana ukuthi bakwenze njani lokho funda IsiThala esinesihloko esithi “Indlela Yokuhlula Ihloyo.”