Kghani AboFakazi BakaJehova BaneBhayibheli Labo?
AboFakazi bakaJehova basebenzise amatjhugululo amanengi ahlukahlukeneko ekufundeni kwabo iBhayibheli. Nangabe ikhona ngelimelo, sithanda ukusebenzisa i-New World Translation of the Holy Scriptures ngombana inebizo lakaZimu, inembile begodu iyezwakala.
Isebenzisa ibizo lakaZimu. Abatjhugululi abanengi beBhayibheli babhalelwe kubuka umTloli walo. Ngokwesibonelo, enye itjhugululo yeBhayibheli inamabizo angaphezu kwama-70 wabantu abafake isandla nakutjhugululwa iBhayibhelelo. Kukulapho iBhayibhelelo likhiphe ibizo lomTloli walo ngokupheleleko, uJehova uZimu!
Ngokuhlukileko, i-New World Translation ibuyisele ibizo lakaZimu amahlandla angaba yikulungwana lapha belifumaneka khona, kukulapho ikomodi eyenze itjhugululo le ingaziwa.
Inembile. Akusiwo woke amatjhugululo weBhayibheli adlulisela umlayezo weBhayibheli ngendlela enembileko. Ngokwesibonelo, enye itjhugululo ibeka uMatewu 7:13 nganasi indlela: “Ngenani ngesango elincani, ngombana isango lesirhogweni libanzi begodu indlela eya khona ibulula.” Nanyana kunjalo, lapho iveseli elithethwe khona emtlolweni wokuthoma, lisebenzisa igama elithi “ukubhujiswa” ingasi elithi “isirhogo.” Mhlamunye abatjhugululi bafake igama elithi “isirhogo” ngebanga lokuthi bebakholelwa bona abantu abenza izinto ezimbi bazokuhlutjhwa unomphela esirhogweni somlilo. IBhayibheli aliwusekeli umbono lowo. Ngakelinye ihlangothi, i-New World Translation ifundeka ngokunembileko nayithi: “Ngenani ngesango elincani, ngombana ivulekile begodu ibanzi indlela etjhinga ekubhujisweni.”
Iyezwakala. Itjhugululo ehle akukafuzi inembe kwaphela kodwana kufanele izwakale beyizwisiseke kuhle. Cabanga nganasi isibonelo. KwebeRoma 12:11, umpostoli uPowula wasebenzisa amagama atjho ukuthi “dlhabhazani emmoyeni.” Njengombana amezwi la angazwisiseki ngesiNgisi sanje, i-New World Translation ibeka iveseli ngendlela ezwisiseka bulula ngombana ithi amaKrestu kufuze “avuthe emmoyeni.”
Ngaphezu kokuthi isebenzise ibizo lakaZimu, inembe beyizwakale kuhle, i-New World Translation inenye godu indlela ehluke ngayo: Ifumaneka simahla. Ngebanga lalokho, iingidi zabantu seziyakghona ukufunda iBhayibheli ngamalimazo eziwamunyileko, ngitjho nalabo ebekungekhe babe nemali yokulithenga.