Lithini IBhayibheli Ngokurhulula Umbungu?

Ipendulo YeBhayibheli

Nanyana iBhayibheli lingasebenzisi amezwi athi “ukurhulula umbungu,” amavesi amanengi weBhayibheli asivezela indlela uZimu aqala ngayo ukuphila komuntu, okuhlanganisa nokuphila komntwana ongakabelethwa.

Ukuphila sisipho esivela kuZimu. (Genesisi 9:6; IRhubo 36:9) Uqala koke ukuphila njengokuqakathekileko, okufakahlangana nokuphila komntwana ongakabelethwa. Nange umuntu abulala umntwana ongakabelethwa ngehloso, kufana nokuthi umbulali.

UmThetho kaZimu bewuthi kuma-Israyeli: “Nangabe amadoda ayalwa bekalimaze umfazi osidisi abelethe kungakabi sikhathi kodwana kungabi nohlongakalako, omlimazileko kufuze abhadele ihlawulo ebekwa yindoda yomfazi lo begodu kufuze ayibhadele ngokwesiqunto sabahluleli. Nangabe kuba nohlongakalako, obuleleko kufuze abhadele ukuphila ngokuphila.”—Eksodusi 21:22, 23.a

• Ukuphila komuntu kuthoma nini?

• Kghani uZimu uzomlibalela umuntu okhe warhulula umbungu?

• Kghani kumbi ukurhulula umbungu nange ukuphila komma osidisi namkha komntwana ongakabelethwa kusengozini?

Ukuphila komuntu kuthoma nini?

KuZimu, ukuphila komuntu kuthoma lokha umma nakabasidisi. EliZwini lakhe iBhayibheli, uZimu uhlathulula umntwana ongakabelethwa njengomuntu wamambala. Akhuqale ezinye iimbonelo ezitjengisa bona uZimu akaboni umehluko phakathi komntwana osesibelethweni sakanina naloyo obelethiweko.

• IKosi uDavida, ngaphasi kokunqotjhiswa nguZimu yatlola yathi: “Amehlwakho angibone ngaphambi kobana ngibelethwe.” (IRhubo 139:16) UZimu bekaqala uDavida njengomuntu ngitjho nangaphambi kokobana abelethwe.

• Ukungezelela kilokho, uZimu bekazi ukuthi uzokuba nomnqopho okhethekileko ngomphorofidi uJoromiya ngaphambi kokobana abelethwe. UZimu wathi kuye: “Ngaphambi kobana ngikubumbe esibelethweni, bengikwazi, ngaphambi kobana ubelethwe ngakucwengisa. Ngikwenze umphorofidi eentjhabeni.”—Joromiya 1:5.

• Umtloli weBhayibheli uLukasi, udorhodere, wasebenzisa igama lesiGirigi linye nakahlathulula umntwana ongakabelethwa nomntwana osanda ukubelethwa.—Lukasi 1:41; 2:12, 16.

Kghani uZimu uzomlibalela umuntu okhe warhulula umbungu?

UZimu angabalibalela labo ekhe barhulula umbungu. Nange sebaqala ukuphila njengoZimu, akutlhogeki bona batshwenywe sisazela ngokudluleleko. “UJehova unesirhawu nomusa . . . Njengombana ipumalanga ikude netjingalanga, uyibeke kude kangako nathi imitjhaphwethu.”b (IRhubo 103:8-12) UJehova uzobalibalela boke abatjhuguluka ngokusuka ehliziyweni ezonweni zabo, kuhlanganise nalabo abarhulule umbungu.—IRhubo 86:5.

Kghani kumbi ukurhulula umbungu nange ukuphila komma osidisi namkha komntwana ongakabelethwa kusengozini?

Ngokwalokho okutjhiwo yiBhayibheli malungana nomntwana ongakabelethwa, akukalungi ukurhulula umbungu ngebanga lengozi engavelela umma osidisi namkha umntwana ongakabelethwa.

Kuthiwani ngobujamo obungakavami lokha nakubelethwa umntwana, kube nemiraro eyingozi evelako ebangela bona kukhethwe hlangana kokusindisa ukuphila kwakamma namkha komntwana? Ebujamweni obunjalo, abantu ababandakanyekileko kuzokufuze bakhethe ukuthi bazokulinga ukusindisa ukuphila kwakabani.