Joromiya
22 Ngilokhu uJehova akutjhoko: “Yehlela endlini yekosi yakwaJuda, ukhambise umlayezo lo. 2 Kufuze uthi, ‘Yizwa ilizwi lakaJehova wena Kosi yakwaJuda ehlezi esihlalweni sobukhosi sakaDavida, wena neensebenzi zakho nabantu bakho abangena ngamasango la. 3 Nakhu uJehova akutjhoko: “Sekelani ubulungiswa nokulunga. Sindisani odlelezelwako esandleni somdlelezeli. Ningaphathi kumbi nanyana ngimuphi umuntu ovela kwenye inarha, ningayilimazi intandani namkha umhlolokazi.+ Ningaphalazi iingazi zomuntu onganamlandu endaweni le.+ 4 Nanitjhejako begodu nenze ngokwelizweli, amakhosi ahleli esihlalweni sobukhosi sakaDavida+ azokungena ngamasango wendlu le, akhwele iinkarana neenjomani, wona neensebenzi zawo nabantu bawo.”’+
5 “‘Kodwana naningekhe nilalele amezwi la, mina ngokwami ngifunga ngami,’ kutjho uJehova, ‘indlu le izokutjhatjalaliswa.’+
6 “Ngombana ngilokhu uJehova akutjhoko malungana nendlu yekosi yakwaJuda,
‘Ube njengeGiliyadi kimi,
Njengesiqongolo seLibhanoni.
Kodwana ngizokwenza ummango;
Alikho nalinye emadorobhenakho elizokuba nezakhamuzi.+
7 Ngizokubeka abatjhabalalisi ngokujamelene nawe,
Ngamunye aphethe iinkhali zakhe.+
Bazokuqunta imisedarakho ekhethekileko
Bayiphosele emlilweni.+
8 “‘Iintjhaba ezinengi zizokudlula edorobheni, zithi kwesinye nesinye: “Kubayini uJehova enze lokhu edorobheni elikhulu kangaka?”+ 9 Bazokuthi: “Ngombana balahle isivumelwano sakaJehova uZimabo, bakhothamela abanye abozimu begodu babalotjha.”’+
10 Ningamlileli ohlongakeleko,
Begodu ningamzweli.
Kunalokho, lilelani khulu okhambako,
Ngombana angekhe asabuya enarheni abelethelwe kiyo.
11 “Ngombana ngilokhu uJehova akutjhoko malungana noTjhalumu*+ indodana kaJosiya ikosi yakwaJuda obusa esikhundleni sakayise uJosiya+ okhambileko endaweni le uthi: ‘Angekhe asabuya. 12 Ngombana uzokufela endaweni adingiselwe kiyo begodu angekhe asayibona indawo le.’+
13 Maye! Kiloyo owakha indlwakhe ngaphandle kokulunga
Neenkumba zakhe eziphezulu ngaphandle kobulungiswa,
Owenza umuntu wekhabo amsebenzele ngelize,
Ongafuni nokumbhadela umrholwakhe;+
14 Loyo othi, ‘Ngizozakhela indlu ekulu
Eneenkumba ezikulu eziphezulu.
Ngizozifakela amafesidere
Ngiyinameke ngomsedari begodu ngiyipende ngepende ebomvu.’
15 Uzokuragela phambili na ubusa ngombana udlula abanye ngokusebenzisa imisedari?
16 Bekavikela amalungelo angokomthetho wogandelelekileko notlhagako,
Bona kubakhambele kuhle.
‘Lokho akutjho na ukungazi mina?’ Kutjho uJehova.
17 ‘Kodwana amehlwakho nehliziywakho kudzimelele enzuzweni engakathembeki,
Ekuphalazeni iingazi ezinganamlandu,
Ekukhwabaniseni nekudlelezeleni.’
18 “Yeke ngilokhu uJehova akutjhoko malungana noJehoyakhimu+ indodana kaJosiya, ikosi yakwaJuda,
‘Angekhe bamlilele bathi:
“Maye! Mfowethu, maye! Dadwethu.”
Angekhe bamlilele bathi:
“Maye! Kosi, maye! Ndabezitha.”
19 Uzokubulungwa ngendlela ekubulungwa ngayo udumbana,+
Uzokudoswa alahlelwe kude,
Ngaphandle kwamasango weJerusalema.’+
20 Khamba uye eLibhanoni, urhuwelele,
Uphakamise ilizwi lakho eBhatjhani,
Urhuwelele use-Abarimu,+
Ngombana boke abakuthandako batjhatjalalisiwe.+
21 Ngakhuluma nawe ngesikhathi uzizwa uvikelekile.
Kodwana wathi, ‘Angekhe ngilalele.’+
Lo bekumumukghwakho kusukela ebutjheni,
Ngombana akhenge ulalele ilizwi lami.+
22 Umoya uzokwelusa boke abelusi bakho,+
Begodu iinthandwa zakho zizokuya ekudingisweni.
Ngemva kwalokho uzokuphathiswa iinhloni, uhlaziseke ngebanga layo yoke ihlekelelakho.
23 Maye! Kuwe ohlala eLibhanoni,+
Ohlala kamnandi hlangana nemisedari,+
Indlela ozokuquma ngayo nawufikelwa ziinhlungu,
Uzokuba seenhlungwini njengomfazi obelethako!”+
24 “‘Nangisaphilako,’ kutjho uJehova, ‘ngitjho nanyana wena Koniya*+ ndodana kaJehoyakhimu,+ kosi yakwaJuda, bewuyidzilamnwana yetshwayo esandleni sami sokudla, bengizokuhluthula lapho! 25 Ngizokunikela esandleni salabo abafuna ukukubulala, esandleni sabantu obasabako, esandleni seKosi uNebukadinetsari* yeBhabhiloni nesandleni samaKhaledi.*+ 26 Wena nommakho okubelethileko ngizoniphosela enarheni eningakabelethelwa kiyo begodu nizokufela lapho. 27 Begodu angekhe babuyele enarheni abayifisako.+
28 Inga-kghani indoda le nguKoniya onyenyisako, ipoto ephukileko,
Isitja esingafunwa mumuntu?
Kubayini yena neenzukulwana zakhe bafuthelwe phasi
Begodu baphoselwe enarheni abangayaziko?’+
29 Maye! Phasi, phasi yizwa ilizwi lakaJehova.
30 Nakhu uJehova akutjhoko:
‘Tlolani phasi bona indoda le ayinabantwana,
Indoda engekhe iphumelele ekuphileni kwayo,
Ngombana akekho esizukulwaneni sakhe ozokuphumelela
Ekuhlaleni esihlalweni sobukhosi sakaDavida, abuse uJuda godu.’”+