Joromiya

33 Ilizwi lakaJehova lafika kuJoromiya kwesibili, nakasavaleleke esiRhodlweni sakaNogada,+ lithi: 2 “Nakhu uJehova uMenzi wephasi akutjhoko, uJehova owalenza, walidzimelelisa; nguJehova igama lakhe, 3 ‘Ngibizani, ngizoniphendula, ngizonitjela izinto ezikulu engekhe nakghona ukuzizwisisa begodu nizazi.’”+

4 “Ngombana nakhu uJehova uZimu ka-Israyeli akutjhoko malungana nezindlu zedorobheli nezindlu zamakhosi wakwaJuda ezigiriziweko ngebanga leendunduma zokuvimbezela nesabula,+ 5 malungana nalabo abeza bazokulwa namaKhaledi,* bazalise iindawezi ngeendumbu zalabo engibabuleleko ngokusilingeka kwami nangelaka lami, labo ukukhohlakala kwabo okubangele bona ngifihlele idorobheli ubuso bami: 6 ‘Ngizomenza aphole, abe nepilo,+ ngizomelapha begodu ngimtjengise ukuthula okukhulu neqiniso.+ 7 Ngizokubuyisa abathunjiweko bakwaJuda nebakwa-Israyeli,+ ngizobakha njengombana ngenza ekuthomeni.+ 8 Ngizobahlambulula kiyo yoke imilandu yezono zabo abazenze kimi,+ ngizobalibalela yoke imilandu yezono zabo nemitjhapho abayenze kimi.+ 9 Igama ledorobheli lizongithabisa, lingidumise nobuhle balo phambi kwazo zoke iintjhaba zephasi ezizwa ngabo boke ubuhle engibenzele lona.+ Bazokusaba bebahlengezele+ ngebanga labo boke ubuhle nokuthula engibenzela lona.’”+

10 “Nakhu uJehova akutjhoko: ‘Endaweni le enizokuthi imarubhi, akunamuntu namkha ifuyo, emadorobheni wakwaJuda neendleleni zeJerusalema ezingakhanjiwako, akunamuntu, isakhamuzi namkha ifuyo, lapho kuzokuzwakala godu 11 itjhada lethabo netjhada lokujekezela,+ ilizwi lakamkhwenyana nelizwi lakamakoti nelizwi labathi: “Thokozani uJehova wamabutho, ngombana uJehova muhle;+ ithando lakhe* lihlala ngokungapheliko!”’+

“‘Bazokuletha iminikelo yokuthokoza endlini kaJehova+ ngombana ngizokubuyisa abathunjiweko benarha, njengekuthomeni,’ kutjho uJehova.”

12 “Nakhu uJehova wamabutho akutjhoko: ‘Enarheni le emarubhi, enganabantu namkha ifuyo, nawo woke amadorobhayo, kuzokubuya godu kube nendawo lapho abelusi bazokudlisela khona imihlambabo.’+

13 “‘Emadorobheni wesifunda seentaba, emadorobheni wenarha ethabaleleko, emadorobheni wesewula, enarheni yakwaBhenjamini, eendaweni ezimagega neJerusalema+ nemadorobheni wakwaJuda,+ imihlambi izokudlula godu ngaphasi kwezandla zaloyo oyibalako,’ kutjho uJehova.”

14 “‘Qala! Amalanga ayeza,’ kutjho uJehova, ‘lapho ngizokuphetha isithembiso esihle engisikhulume malungana nendlu ka-Israyeli nendlu kaJuda.+ 15 Emalangeni lawo ngesikhatheso ngizokubangela bona ihlumela*+ elilungileko lakaDavida lihlume, begodu lizokusekela ubulungiswa nokulunga enarheni.+ 16 Emalangeni lawo uJuda uzokusindiswa+ iJerusalema lizokuhlala ngokuvikeleka.+ Lizokubizwa ngokuthi: UJehova Ukulunga Kwethu.’”+

17 “Ngombana nakhu uJehova akutjhoko: ‘Kuzokuhlala kunesizukulwana sakaDavida esizokuhlala esihlalweni sobukhosi sendlu ka-Israyeli,+ 18 abaphristi abamaLevi bazokuhlala bakhona bona bajame phambi kwami balethe iminikelo epheleleko yokutjhiswa, bona batjhise iminikelo yeenthoro begodu banikele imihlatjelo.’”

19 Ilizwi lakaJehova lafika godu kuJoromiya lithi: 20 “Nakhu uJehova akutjhoko, ‘Nange ungaphula isivumelwano sami malungana nemini nesivumelwano sami malungana nobusuku, ukuvimbela imini nobusuku bona zingafiki ngesikhathi esifaneleko,+ 21 kulapho kwaphela isivumelwano sami nencekwami uDavida singaphulwa khona,+ bona angabi nendodana ezokubusa njengekosi esihlalweni sakhe sobukhosi,+ kuzokwenzeka okufanako ngesivumelwano sami namaLevi abaphristi, iinceku zami.+ 22 Njengebutho lezulwini elingabaleki nehlabathi yelwandle engekhe yalinganiswa, nje-ke ngizokwandisa iinzukulwana zencekwami uDavida namaLevi angisebenzelako.’”

23 Ilizwi lakaJehova lafika godu kuJoromiya lithi: 24 “Akhenge utjheje na bona abantwaba bathi, ‘UJehova uzokulahla imindeni emibili ayikhethileko’? Ababahloniphi abantu bami, begodu abasabaqali njengesitjhaba.

25 “Nakhu uJehova akutjhoko: ‘Njengombana ngidzimelelise isivumelwano sami malungana nelanga nobusuku,+ imithetho yezulu nephasi,+ 26 nje-ke angekhe ngisilahle isizukulwana sakaJakopo nesencekwami uDavida, bona ngingasusi isizukulwana sababusi ababusa phezu kweenzukulwana zaka-Abrahama, u-Isaka noJakopo. Ngombana ngizokubuthelela ngibuyise abathunjiweko babo+ begodu ngibarhawukele.’”+