Joromiya
34 Ilizwi elafika kuJoromiya livela kuJehova, lokha iKosi yeBhabhiloni uNebukadinetsari* nawo woke amabuthwakhe nemibuso yephasini yoke engaphasi kokubusa kwakhe nabo boke abantu ebebalwa ngokujamelene neJerusalema nawo woke amadorobhalo:+
2 “Nakhu uJehova uZimu ka-Israyeli akutjhoko, ‘Khamba ukhulume noTsedekhiya+ iKosi yakwaJuda uyitjele ukuthi: “Nakhu uJehova akutjhoko, ‘Nginikela idorobheli esandleni sekosi yeBhabhiloni begodu izolitjhisa ngomlilo.+ 3 Angekhe uphunyurhe esandleni sakhe, ngombana uzokubanjwa nakanjani begodu uzokunikelwa kiyo.+ Uzokubona ikosi yeBhabhiloni ngamehlwakho, uzokukhuluma nayo ubuso nobuso begodu uzokuya eBhabhiloni.’+ 4 Nanyana kunjalo, lalela ilizwi lakaJehova, Wena Kosi Tsedekhiya Kosi yakwaJuda, ‘Nakhu uJehova akutjhoko malungana nawe: “Angekhe ubulawe yisabula. 5 Uzokufa ngokuthula+ begodu bazokwenzela umnyanya wokutjhiswa njengombana benzela aboyihlo namakhosi abusa ngaphambi kwakho, bazokulilela bathi, ‘Maye! Kosi,’ ngombana, ‘Ngikhulume ilizwi,’ kutjho uJehova.”’”’”
6 Nje-ke umphorofidi uJoromiya wakhuluma woke amezwi la eKosini yakwaJuda uTsedekhiya eJerusalema, 7 lokha amabutho wekosi yeBhabhiloni nakalwa neJerusalema nawo woke amadorobho wakwaJuda aseleko,+ iLakhitjhi,+ i-Azekha;+ ngombana bekungiwo kwaphela amadorobho aseleko avikelekileko emadorobheni wakwaJuda.
8 Ilizwi elafika kuJoromiya livela kuJehova ngemva kokuthi iKosi uTsedekhiya yenze isivumelwano nabo boke abantu eJerusalema bona amemezele itjhaphuluko kibo,+ 9 bona woke umuntu atjhaphulule iingqila zakhe zamaHebheru, zembaji nezengubo bona kungabi nomuntu owenza umJuda wekhabo isigqila. 10 Nje-ke woke amakhosana nabo boke abantu balalela. Benza isivumelwano sokuthi bazokutjhaphulula iingqila zabo zembaji nezengubo zingasaba ziingqila begodu bangasazenza iingqila. Balalela, bazilisa zakhamba. 11 Nanyana kunjalo, ngokukhamba kwesikhathi bazibuyisa iingqila zembaji nezengubo ebebazitjhaphululile, bazikatelela bona zibe ziingqila godu. 12 Yeke ilizwi lakaJehova lafika kuJoromiya livela kuJehova, lithi:
13 “Nakhu uJehova uZimu ka-Israyeli akutjhoko, ‘Ngenza isivumelwano nabokhokho bakho+ ngelanga enganikhupha ngalo enarheni yeGibhide, endlini yobugqila,+ ngathi: 14 “Ekupheleni kweminyaka elikhomba, ngamunye wenu kufuze atjhaphulule umfowabo omHebheru owathengiselwa yena bona akusebenzele iminyaka esithandathu; kufuze umtjhaphulule.”+ Kodwana abokhokho benu akhenge balalele namkha bangizwe. 15 Mva nje* nina ngokwenu nitjhugulukile nenza okulungileko emehlwenami ngokubikezela itjhaphuluko ebantwini bekhenu, nenza isivumelwano phambi kwami nendlini enegama lami. 16 Kodwana ningifulathele, nasilaphaza igama lami+ ngokubuyisa iingqila zenu zembaji nezengubo enizitjhaphululileko malungana neemfiso zazo, nazikatelela bona zibuyele ebugqilini.’
17 “Nje-ke nakhu uJehova akutjhoko: ‘Akhenge ungilalele ekumemezeleni itjhaphuluko, ngamunye kumfowabo nakumnganakhe.+ Nje-ke ngizokumemezela itjhaphuluko kuwe,’ kutjho uJehova, ‘ngesabula, ngesibetho,* nangendlala+ begodu ngizokwenza into ethusako kiyo yoke imibuso yephasi.+ 18 Ngilokho okuzokwenzeka ebantwini abaphule isivumelwano sami ngokungenzi amezwi wesivumelwano abasenze phambi kwami lokha nabahlahlela ikonyana bayihlukanise kabili, badlule phakathi kwayo,+ 19 amakhosana wakwaJuda, amakhosana weJerusalema, iinkhulu zesigodlo, abaphristi, nabo boke abantu benarha abadlule ngaphakathi kwekonyana ehlukaniswe kabili: 20 Ngizobanikela emanabenabo nakilabo abafuna ukubabulala, iindumbu zabo zizokuba kukudla eenyonini zezulu neembandaneni zephasini.+ 21 Ngizokunikela iKosi yakwaJuda uTsedekhiya namakhosanayo esandleni samanababo, esandleni salabo abafuna ukubabulala nesandleni samabutho wekosi yeBhabhiloni,+ abalisako ukunivimbezela.’+
22 “‘Ngizokukhupha umyalo,’ kutjho uJehova, ‘ngizobabuyisela edorobheneli, bazokulwa ngokujamelene nalo bazolithumba balitjhise ngomlilo;+ namadorobho wakwaJuda ngizowenza amarubhi, kungabi nezakhamuzi.’”+