Joromiya
37 IKosi uTsedekhiya+ indodana kaJosiya yathoma ukubusa esikhundleni sakaKoniya*+ indodana kaJehoyakhimu, ngombana iKosi uNebukadinetsari* yeBhabhiloni yamenza ikosi enarheni yakwaJuda.+ 2 Kodwana yena neensebenzi zakhe nabantu benarha akhenge balalele amezwi uJehova awakhuluma asebenzisa uJoromiya umphorofidi.
3 IKosi uTsedekhiya yathumela uJehukali+ indodana kaTjhelemiya+ noZefaniya indodana kaMaseya umphristi kuJoromiya umphorofidi, yathi: “Sibawa usithandazele kuJehova uZimethu.” 4 UJoromiya bekazikhambela ngokutjhaphulukileko hlangana nabantu ngombana bebangakabi ukumfaka ejele.+ 5 Nje-ke ibutho lakaFaro laphuma eGibhide,+ begodu amaKhaledi* ebewavimbezele iJerusalema ezwa umbiko ngalokho. Nje-ke alisa ukuvimbezela iJerusalema.+ 6 Nje-ke ilizwi lakaJehova lafika kuJoromiya umphorofidi, lathi: 7 “Nakhu uJehova uZimu ka-Israyeli akutjhoko, ‘Nakhu okufuze ukutjele ikosi yakwaJuda, ekuthumele kimi bona ubuze ngami: “Qala! Ibutho lakaFaro elizako lizokusiza kuzokufuze libuyele enarhenalo, eGibhide.+ 8 AmaKhaledi* azokubuya alwe nedorobheli, alithumbe begodu alitjhise ngomlilo.”+ 9 Nakhu uJehova akutjhoko, “Ningazikhohlisi nithi, ‘amaKhaledi* azokukhamba nakanjani angasalwa nathi,’ ngombana angekhe akhambe. 10 Ngitjho nanyana ningalihlula loke ibutho lamaKhaledi* alwa nani kusale kwaphela amadoda alimeleko, azokuvuka ematendenawo atjhise idorobheli ngomlilo.”’”+
11 Lokha ibutho lamaKhaledi* lihlehlela emuva ekulweni neJerusalema ngebanga lebutho lakaFaro,+ 12 uJoromiya wakhamba eJerusalema waya enarheni yakwaBhenjamini+ bona afumane ingcenyakhe hlangana nabantu bakhe. 13 Kodwana nakafika eSangweni lakaBhenjamini, induna kanogada, igama lakhe okunguJiriya indodana kaTjhelemiya indodana kaRhananiya, wabamba uJoromiya umphorofidi, wathi: “Uhlubukela kumaKhaledi!” 14 UJoromiya yena wathi: “Akusiliqiniso! Angihlubukeli kumaKhaledi.”* Kodwana akhenge amlalele. Nje-ke uJiriya wabopha uJoromiya, wamusa emakhosaneni. 15 Amakhosana asilingeka ngebanga lakaJoromiya,+ ambetha, amvalela+ endlini kaJehonathana unobhala, ebesele yenziwe ijele. 16 UJoromiya wavalelwa ejele elisemgodini, wahlala lapho amalanga amanengi.
17 Ngemva kwalokho, iKosi uTsedekhiya yathumela bona ayokubizwa, ikosi yambuza imibuzo ngemsitheleni endlinayo.*+ Yathi, “Kukhona na okhunye uJehova akutjhwileko?” UJoromiya wathi, “Kukhona!” Waragela phambili wathi, “Uzokunikelwa esandleni sekosi yeBhabhiloni!”+
18 UJoromiya wathi godu ekosini uTsedekhiya: “Ngikonele ngani wena neensebenzi zakho nabantwaba, bona ungifake ejele? 19 Nje-ke baphi abaphorofidi abaphorofida kuwe, ‘Bathi ikosi yeBhabhiloni angekhe ize ngokujamelene nawe nangokujamelene nenarha le’?+ 20 Nje-ke ngibawa ungilalele, maye! Kosami. Ngibawa uvumele isibawo sami ungirhawukele. Ungangibuyiseli endlini kaJehonathana+ unobhala, bona ngingafeli khona.”+ 21 Nje-ke iKosi uTsedekhiya yayala bona uJoromiya asiwe ngesiRhodlweni sakaNogada+ begodu wanikelwa uburotho oburondo qobe langa obuvela endleleni yababhagi+ bekwaba kulapho uburotho buphela khona edorobheni.+ UJoromiya wahlala esiRhodlweni sakaNogada.