Joromiya

44 Ilizwi elafika kuJoromiya nakiwo woke amaJuda ahlala enarheni yeGibhide,+ ahlala eMigidoli,+ eTarhipanirhesi,+ eNofi*+ nenarheni yePatrosi,+ lithi: 2 Nakhu uJehova wamabutho uZimu ka-Israyeli akutjhoko, ‘Niyibone yoke ihlekelele engiyilethe eJerusalema+ nakiwo woke amadorobho wakwaJuda nokuthi namhlanjesi amarubhi, akunazakhamuzi.+ 3 Kungebanga lezinto ezikhohlakeleko abazenzileko bona bangizwise ubuhlungu, ngokuragela phambili benza imihlatjelo+ nokulotjha abanye abozimu abangabaziko, nabokhokho babo+ abangabaziko. 4 Bengisolo ngithumela zoke iinceku zami abaphorofidi kini, ngibathumela ngokubuyelelweko, ngithi: “Ngibawa ningenzi into le enyenyisako, into engiyihloyako.”+ 5 Kodwana akhenge bangilalele namkha bangizwe baphenduke ekukhohlakaleni kwabo ngokungenzeli abanye abozimu imihlatjelo.+ 6 Nje-ke ilaka lami nokusilingeka kwami kwathululwa kwatjhisa amadorobho wakwaJuda neendlela zeJerusalema, zaba marubhi nenarha engatheliko, njengombana zinjalo namhlanjesi.’+

7 “Nje-ke nakhu uJehova uZimu wamabutho, uZimu ka-Israyeli akutjhoko, ‘Kubayini nizibangela ihlekelele engaka, bona woke amadoda nabafazi, abantwana namasana batjhabalale kwaJuda, nisale ninganalitho? 8 Kubayini kufuze ningizwise ubuhlungu ngemisebenzi yezandla zenu ngokwenzela abanye abozimu benarha yeGibhide imihlatjelo lapho enakhamba nayokuhlala khona? Nizokutjhabalala nibe yinto eqalekisiweko nehlazo hlangana nazo zoke iintjhaba zephasi.+ 9 Kghani senizilibele izenzo zokukhohlakala zabokhokho benu, izenzo zokukhohlakala zamakhosi wakwaJuda,+ izenzo zokukhohlakala zabomkawo,+ izenzo zenu zokukhohlakala nezenzo zokukhohlakala zabomkenu+ ezenziwa enarheni yakwaJuda neendleleni zeJerusalema? 10 Bekube kunamhlanjesi, akhenge bazithobe, akhenge basabe,+ namkha bakhambe ngemithethwami nemiyalwami, engibanikele yona nabokhokho babo.’+

11 Nje-ke nakhu uJehova wamabutho, uZimu ka-Israyeli akutjhoko, ‘Ngizimisele ukunilethela ihlekelele bona itjhabalalise woke uJuda. 12 Ngizokuthatha abaseleko bakwaJuda ebebazimisele ukuya enarheni yeGibhide ukuyokuhlala khona begodu boke bazokutjhabalala enarheni yeGibhide.+ Bazokuwa ngesabula, batjhabalale ngendlala; kusukela komncani ukuya komkhulu, bazokufa ngesabula nangendlala. Bazokuba siqalekiso, into yokusatjwa, into yokuthukwa nehlazo.+ 13 Ngizokujezisa labo abahlala enarheni yeGibhide ngendlela engijezise ngayo iJerusalema, ngesabula, ngendlala nangesibetho.*+ 14 Abaseleko bakwaJuda abakhambileko bayokuhlala enarheni yeGibhide, angekhe baphunyurhe namkha basinde bona babuyele enarheni yakwaJuda. Bazokukhanukela ukubuyela bahlale lapho, kodwana angekhe babuyele, ngaphandle kwabambalwa ababalekileko.’”

15 Woke amadoda ebewazi ukuthi abomkawo bebenzela abanye abozimu imihlatjelo nabo boke abafazi ebebajame lapho, ebekusiqhema esikhulu nabo boke abantu ebebahlala enarheni yeGibhide,+ ePatrosi,+ baphendula uJoromiya, bathi: 16 “Angekhe sililalele ilizwi olikhulume kithi egameni lakaJehova. 17 Kunalokho, sizokwenza lokho esithe sizokwenza, sizokwenzela iNdlovukazi yeZulwini* imihlatjelo begodu siyithululele iminikelo yesiselo,+ njengombana thina, abokhokho bethu, amakhosethu namakhosanethu senza emadorobheni wakwaJuda neendleleni zeJerusalema lokha nasaneliswe burotho begodu siregile, kunganahlekelele. 18 Kusukela ngesikhathi esalisa ngaso ukwenzela iNdlovukazi yeZulwini* imihlatjelo nokuthululela iminikelo yesiselo kiyo, satlhoga koke begodu satjhabalala ngesabula nangendlala.”

19 Abafazi bangezelela ngokuthi: “Amadodethu asivumela bona senze imihlatjelo begodu sithululele iminikelo yesiselo eNdlovukazini yeZulwini* nokuthi senze amakhekhe enziwe ngesithombe sakazimukazi.”

20 Nje-ke uJoromiya wathi kibo boke abantu, emadodeni nakibomkawo nakibo boke abantu ebebakhuluma naye: 21 “Imihlatjelwenu, yabokhokho benu, amakhosenu, amakhosanenu neyabantu benarheni enayenza emadorobheni wakwaJuda neendleleni zeJerusalema,+ uJehova wayikhumbula begodu ifike ehliziywenakhe! 22 Emaswapheleni uJehova akhenge asazikghodlhelela izenzo zenu zokukhohlakala nezinto ezinyenyisako enizenzileko, inarhenu ibe marubhi, into ethusako nesiqalekiso, enganazakhamuzi bekube kunamhlanjesi.+ 23 Kungebanga lokuthi nenze imihlatjelo le begodu nonile kuJehova ngokuthi ningalaleli ilizwi lakaJehova, ningalandeli imithethwakhe, imiyalwakhe neenkhumbuzo zakhe bona nehlelwe yihlekelele, njengombana kwenzeka namhlanjesi.”+

24 UJoromiya waragela phambili nokuthi kibo boke abantu nakibo boke abafazi: “Lalelani ilizwi lakaJehova noke nina bakwaJuda enisenarheni yeGibhide. 25 Nakhu uJehova uZimu wamabutho, uZimu ka-Israyeli, akutjhoko, ‘Lokho nina nabomkenu enikukhulumileko, nikuzalise ngezandla zenu, ngombana nithe: “Nakanjani sizokwenza ngokweemfungo zethu, sizokwenzela iNdlovukazi yeZulwini* imihlatjelo, sithululele iminikelo yesiselo kiyo.”+ Nina bafazi ngokuqinisekileko nizokwenza ngokweemfungo zenu begodu nizizalise.’

26 “Nje-ke, lalelani ilizwi lakaJehova, noke nina bakwaJuda abahlala enarheni yeGibhide: “Ngifunga ngegama lami elikhulu,” kutjho uJehova, “nanyana ngubani wakwaJuda+ angekhe asabiza igama lami bona afunge ngalo, enarheni yoke yeGibhide angekhe basathi, ‘Sifunga ngeKosi ePhakemeko uJehova ophilako!’+ 27 Nje-ke ngizimisele ukuletha ihlekelele, ingasi into ehle;+ kibo boke abantu bakwaJuda abasenarheni yeGibhide bazokutjhabalala ngesabula nangendlala, bekube kulapho bangasekho khona.+ 28 Bambalwa abazokuphunyurha esabuleni abavela enarheni yeGibhide babuyela enarheni yakwaJuda.+ Boke abaseleko bakwaJuda abeze ukuzokuhlala enarheni yeGibhide, bazokwazi ukuthi ngelakabani ilizwi elibe liqiniso, ngelami namkha ngelabo!”’”

29 “‘Lokhu kuzokuba litshwayo kini,’ kutjho uJehova, ‘bona ngizonijezisa endaweni le, ukwenzela bona nazi ukuthi amezwami wokunithembisa ihlekelele nakanjani azokuba liqiniso. 30 Nakhu uJehova akutjhoko: “Nginikela uFaro Rhofira, ikosi yeGibhide, esandleni samanabakhe nesalabo abafuna ukumbulala, njengombana nganikela iKosi yakwaJuda uTsedekhiya esandleni seKosi yeBhabhiloni uNebukadinetsari,* obekalinaba layo ebelifuna ukumbulala.”’”+