Hezekiyeli
41 Ngemva kwalokho, yangiletha endaweni ecwengileko* engaphandle, yalinganisa iinsika zemahlangothini; bezimakhubhithi* asithandathu ububanzi kwelinye ihlangothi, zimakhubhithi asithandathu ububanzi ngakwelinye ihlangothi. 2 Ubungeno bebumakhubhithi alitjhumi ububanzi, amaboda angeqadi kobungeno bewamakhubhithi amahlanu kwelinye ihlangothi, amakhubhithi amahlanu ngakwelinye ihlangothi. Yalinganisa ubude babo, ebebumakhubhithi ama-40 namakhubhithi ama-20 ububanzi babo.
3 Yangena ngaphakathi,* yalinganisa isika elingehlangothini lobungeno, belimakhubhithi amabili ubudege begodu ubungeno bebumakhubhithi asithandathu ububanzi. Amaboda angeqadi kobungeno bewamakhubhithi alikhomba. 4 Ngemva kwalokho, yalinganisa ikumba eqale ingaphandle lendawo ecwengileko, beyimakhubhithi ama-20 ubude imakhubhithi ama-20 ububanzi.+ Yathi kimi: “Le yindawo eCwengeke Khulu.”+
5 Nje-ke yalinganisa iboda lethempeli, belimakhubhithi asithandathu ubudege. Iinkumba ezingeqadi ezibhode ithempeli bezimakhubhithi amane ububanzi.+ 6 Iinkumba ezingeqadi beziziintezi ezintathu ukuphakama, enye iphezu kwenye, bekuneenkumba ezima-30 esitezini ngasinye. Bekunemiphetho magega neboda lethempeli ebeyisetjenziselwa ukusekela iinkumba ezingeqadi bona iinsekelo zingangeni ebodeni lethempeli ngokwalo.+ 7 Emahlangothini amabili wethempeli bekunephaseji* elizombelezako, liba likhulu njengombana likhuphukela eenkumbeni eziphezulu.+ Ububanzi buyakhula ukusuka esitezini ukuya kwesinye njengombana sikhuphuka ukusuka esitezini esiphasi khulu ukuya kwesiphezulu khulu ngokudlula esitezini esingaphakathi.
8 Ngabona lapho ukuthi bekunendawo yesikhulumi ephezulu magega nalo loke ithempeli, iinsekelo zeenkumba ezingemaqadi bezilingana nomhlanga opheleleko wamakhubhithi asithandathu ukufika ekhoneni. 9 Ububanzi beboda elingaphandle leenkumba ezisemahlangothini bebumakhubhithi amahlanu. Bekunesikhala esivulekileko* magega nomakhiwo weenkumba ezingehlangothini ebeziyingcenye yethempeli.
10 Phakathi kwethempeli neenkumba zokudlela,*+ bekunendawo emakhubhithi ama-20 ububanzi ehlangothini ngalinye. 11 Bekunobungeno phakathi kweenkumba ezisehlangothini nesikhala esivulekileko ehlangothini letlhagwini nobunye ubungeno ehlangothini lesewula. Ububanzi besikhala esivulekileko bebumakhubhithi amahlanu kiyo yoke indawo.
12 Umakhiwo ebewusetjingalanga uqale indawo evulekileko bewumakhubhithi ama-70 ububanzi, umakhubhithi ama-90 ubude; iboda lomakhiwo belimakhubhithi amahlanu ubudege kiyo yoke indawo.
13 Yalinganisa ithempeli, belimakhubhithi ali-100 ubude. Indawo evulekileko, umakhiwo* namabodalo nazo bezimakhubhithi ali-100 ubude. 14 Ububanzi obungaphambili kwethempeli obuqale epumalanga nendawo evulekileko bekumakhubhithi alikhulu.
15 Yalinganisa ubude bomakhiwo ebebuqale indawo evulekileko engemuva, kuhlanganise namaphaseji emahlangothini womabili, bekumakhubhithi ali-100.
Yabuye yalinganisa ilingaphandle lendawo ecwengileko nelingaphakathi lendawo ecwengileko+ namathuri wesirhodlo, 16 kuhlanganise neendawo zokungena, amafesidere amatsikana+ namaphaseji ebekaseendawenezo ezintathu. Hlanu kwendawo yokungena, bekunamekwe iinkuni+ kusukela phasi kufikela phezulu emafesidereni begodu amafesidere bekagubuzesiwe. 17 Iinlinganiso zenziwe phezu kobungeno nangaphakathi kwethempeli, ngaphandle nakiwo woke amaboda. 18 Belinamakherubhi abaziweko,+ likghatjiswe ngemithi yesundu,+ ngalinye linomuthi wesundu phakathi kwamakherubhi amabili begodu ikherubhi ngalinye belinobuso obubili. 19 Ubuso bomuntu bebuhlanu komuthi wesundu ehlangothini linye+ begodu ubuso bebhubezi* bebuhlanu komuthi wesundu kwelinye ihlangothi. Bezibazwe njalo kilo loke ithempeli. 20 Kusukela phasi kufikela endaweni ephezulu yobungeno, bekunamakherubhi abaziweko nemikghabiso yomuthi wesundu ebodeni lendawo ecwengileko.
21 Amagoseni* wendawo ecwengileko bewasikwere.+ Phambi kwendawo ecwengileko bekunento efana 22 ne-aldara lekhuni+ belimakhubhithi amathathu ukuphakama, limakhubhithi amabili ubude. Beyineensika emakhoneni, ubude bayo bebenziwe ngeengodo. Nje-ke yathi kimi: “Leli litafula eliphambi kwakaJehova.”+
23 Ingaphandle lendawo ecwengileko nendawo ecwengileko, ngayinye beyineminyango emibili.+ 24 Iminyango beyinamabadi amabili aya ngapha nangapha, amabadi amabili emnyangweni ngamunye. 25 Bekunamakherubhi abaziweko nemikghabiso yemithi yesundu eminyango yendawo ecwengileko, efana nale esemabodeni.+ Bekubuye kube nomfulelo weengodo phambi kwethuri ngaphandle. 26 Bekunamafesidere aba matsikana+ nemikghabiso yomuthi wesundu hlanu kwamahlangothi womabili wethuri, kuhlanganise neenkumba ezisemahlangothini wethempeli nemifulelo.